Ro 7 - Chuj San Sebastian Bible

'Icha to 'ichmilab'il yaj Cristo

¹ Ex wu'tac, ex wanab', 'ayx eyojc xon ley yic Moisés. Eyojc xoni to a jun ley cha, 'ay yaln yic 'a junc mach, ya' sb'a pitznto.

² Q'uinloc 'ay junc 'ix 'ay yichmil, ya' sb'a pitznto yichmil cha, 'icha to pixb'il 'ix yet' win yuj jun ley cha. Toto tzcham yichmil 'ix cha, libre yaj 'ix 'a jun ley cha.

³ Q'uinloc pitznto yichmil 'ix cha, tzyi'n 'ix junc xo winac, to 'ixta', tz'och 'ix 'ajmulal. Al toto tzcham yichmil 'ix, libre yaj 'ix 'a jun ley cha. Toxn̈ej tzyij sb'a 'ix yet' junc xo winac, matz 'och smul 'ix.

⁴ Ex wu'tac, ex wanab', a ticnec, junn̈j on̈ 'ajc yet' sniwnal Cristo yic schami. Yuj cha, a 'a sat Dios, chamnc on̈c xo 'elt 'a yol sc'ab' ley yic Moisés. Palta 'ay junx 'icha to 'ichmilab'il yaj 'ayn̈ec, atn jun pitzwnac pax 'a scal eb' chamnac. 'Ixta cajc yet'oc, sec wach' 'ay copisoec 'a Dios.

⁵ A 'a yic yalan̈, an̈j qui tu nab'enalec qui b'eylb'ejnac. Yuj wal ley yic Moisés, spitzw jun tzo'n̈ maysch'olnil qui nib'jnaquec 'och yet' qui niwnalec tic. A jun tzo'n̈ chi tzon̈ 'i'nec 'at 'a chaml 'a jun 'ejmn̈ej.

⁶ A 'a yic yaln̈ cha, a jun ley chi 'ay yaln yic 'ayn̈ec. Al ticnec, chamnc on̈c 'elt 'a yol sc'ab' jun ley chi 'a sat Dios. Yuj cha, mun quiquec qui b'a ticnec, sec cojxn Dios tzca'c servil. Yuj cha, wan qui b'eylb'anec jun 'ac' b'eyb'al ya'jnac Yespíritu Dios 'ayn̈ec. Ax jun 'ichm ley tz'ib'b'il can cha, man̈x 'a yaln yic 'ayn̈ec ticnec.

A maysch'olnil 'aych 'ayn̈ec

⁷ Palta ¿tas tze na'a? A ley yic Moisés, ¿tom maysch'olnil tze na'a? Caw ma'ay. Yujn̈ej jun ley cha, tznachj 'el cujec to maysch'olnil tas tzqui b'o'ec. Q'uinloc 'ay junc tas tzin nib'j 'och ticnec. Wojtac, to maysch'olnil wan in b'oni, yujto tzyal jun ley chi 'ixtic: Man̈ a nib'c 'och junc tas, xchi. Q'uinloc may tas tzyala, to 'ixta', man̈ wojcoc, toto maysch'olnil tas wan in nani.

⁸ Palta yuj jun tzo'n̈ checnb'il cha, 'ix wach' pitzw jun tzo'n̈ maysch'olnil 'ayin. Yuj cha, til wal maysch'olnil xin wach' nib'j 'ochi. Q'uilnloc may jun ley cha, to 'ixta', may yel'ch jun tzo'n̈ maysch'olnil cha.

⁹ A 'a yic mant wojcoc jun ley cha, pitzn in 'a sat Dios in nani. Ax yic 'ix wojcan 'eli, 'ix nachj 'el wu'uj, to caw may in ch'olnil. 'Ixta to b'i'an, 'ix wojcan 'eli, to chamnc in 'a sat Dios yu'uj.

¹⁰ A ley cha, yopiso ya'n qui q'uinlec. Palta a 'ix 'i'n cot chaml 'a wib'an̈.

¹¹ Yuj jun ley cha, 'ix wach' pitzw jun tzo'n̈ maysch'olnil 'ayin. Caw in 'ixtx yuj jun tzo'n̈ cha. A jun tzo'n̈ maysch'olnil chi 'ijnac cot chaml 'a wib'n̈ yuj jun ley cha.

¹² A jun ley cha, may jac spaltail. An̈jtona', 'ixta pax smasnil jun tzo'n̈ checnb'il 'ay 'a jun ley cha, caw tojol, caw wach'n̈ej.

¹³ Palta ¿tas tze na'a? ¿Tom a jun wach' chi x'i'n cot chaml 'a wib'an̈? Ma'ay, caw man̈o'oc. Atn jun tzo'n̈ maysch'olnil toxn 'aych 'ayin, a 'ix 'i'n cot 'a wib'an̈. 'Ixta x'aj scheclj 'eli, to yel maysch'olnil jun tzo'n̈ cha. A jun tzo'n̈ chi 'ix 'i'n cot chaml 'a wib'n̈ yuj jun wach' cha. 'Ixta tzyutj jun ley chi sch'oxn 'eli, to a jun tzo'n̈ maysch'olnil cha, caw tu'.

¹⁴ Cojquec, a Yespíritu Dios 'a'jnac cot jun ley cha. Palta an tic, an̈ja wet' jun in tu nab'enal tic. 'Icha to chon̈b'iln 'och ya'malc servil maysch'olnil.

¹⁵ Yujto a jun tzo'n̈ tas tzin b'o'o, man̈ wach'c tzwila. 'Ay jun tzo'n̈ tas wach' tzin nib'j in b'o', palta matz in b'o'o. Ax wal jun tzo'n̈ tas maysch'olnil 'a in sat, a tzin b'o'o.

¹⁶ Palta a jun tzo'n̈ maysch'olnil tzin b'o cha, toto man̈ wach'c 'a in sat, tzyal 'el'chi, wojtac to caw wach' jun ley cha.

¹⁷ Yujto caw man̈oc in tzin b'o jun tzo'n̈ cha. A jun maysch'olnil chi toxn 'aych 'ayin, a tzb'oni.

¹⁸ Wojtac, yuj jun in tu nab'enal tic, may jac tas wach', tzcheclj 'el 'ayin. Yujto caw tzin nib'j tzin b'o jun tzo'n̈ tas wach', palta matz tac' in b'oni.

¹⁹ Matz in b'o jun tzo'n̈ tas wach' 'icha tzin nib'ej. A jun tzo'n̈ maysch'olnil matz in nib'ej, axn̈ej tzin b'o'o.

²⁰ Palta toto tzin b'o jun tzo'n̈ tas matz in nib'ej, tzyal 'el'chi, man̈oc in wan in b'oni. A jun maysch'olnil chi toxn 'aych 'ayin, a tzb'oni.

²¹ Yuj cha, 'ixtc tzin 'aji, a yic tzin nib'j tzin b'o jun tzo'n̈ tas wach', ax tzwilni, an̈j jun tzo'n̈ maysch'olnil tzin b'o'o.

²² A 'in pixan, caw tzalj yet' sley Dios.

²³ Palta wojtac, a 'a jun in niwnal tic, 'ay junx 'icha ley tz'a'n mandar, atn maysch'olnil. A tz'a'n owl yet' junx ley 'aj tzalj in pixan. Yuj cha, 'icha to preso waj yuj maysch'olnil, yujto a tz'a'n mandar in niwnal tic.

²⁴ Caw 'oltac tzin 'aj yu'uj. A jun in niwnal tic, a tzin 'i'n 'at 'a chaml 'a jun 'ejmn̈ej. Palta ¿mach tztac' in scoln 'el 'a yol sc'ab' jun in niwnal tic?

²⁵ Atn Dios, yet' Cajlil Jesucristo. Yuj cha, caw tzwac' yuj diosal 'a Dios ticnec. A ticnec, yet' in pixan tzwac' servil Dios. Palta ax jun in tu nab'enal tic, 'aych ya'malc servil jun 'icha ley toxn 'aych 'ayin, atn maysch'olnil.