Ro 6 - Chuj San Sebastian Bible

Junxn̈ej on̈ 'ajc yet' Cristo

¹ ¿Tas tze na'a? ¿Tom wach' an̈ja qui b'onec maysch'olnil, sec yel xo wal 'oj yac' Dios niwnc'ojlal 'ayn̈ec, ax swach' checlj 'el swach'c'ojlal 'ixta'?

² Ma'ay, caw wal matz tac'a. A 'a sat Dios chamnc on̈c xo, man̈x 'a yaln maysch'olnil yic 'ayn̈ec. Yuj cha, ¿tom an̈ja tzat stac' qui b'eylb'anec maysch'olnil?

³ 'In eyojc xoni, a yic on̈ 'ajx bautisar junjn on̈ec, 'ix checlj 'eli, to junxn̈ej on̈ 'ajc can yet' Cristo Jesús. Ata xcheclj 'eli, to 'icha x'aj schami, 'ixta 'on̈ 'aj qui chamc yet'oc.

⁴ Yuj qui bautismo xcheclj 'eli, to on̈ chamec, junxn̈ej cajc qui mucx yet' Cristo. Yuj cha, 'icha 'ajxnac pitzwc pax Cristo 'a scal eb' chamnc yuj sniwn poder qui Mam Dios, 'ixta on̈ 'ajxec pax pitzwc jun xo. Tzyal 'el'chi, an̈j wal jun 'ac' b'eyb'al tzqui b'eylb'ejec ticnec.

⁵ Junn̈j on̈ 'ajc qui cham yet' Cristo 'icha x'aj schami. Yuj cha, 'icha x'aj spitzw paxi, 'ixta 'oj cajc qui pitzw pax jun xo, yujto junxn̈ej 'oj cajc yet'oc.

⁶ Cojquec, a jun qui nab'enec 'a yic yalan̈, a 'a sat Dios, t'un̈xnac q'ue yet' Cristo 'a spenc culus, sec wach' tzsatl qui tu nab'enalec, 'icha to caw tzchami. 'Ixta on̈ 'ajec, sec wach' man̈xtzac ca'c servil maysch'olnil ticnec.

⁷ Yujto a mach chamnc xo, man̈x 'ayc 'ec' 'a yol sc'ab' maysch'olnil.

⁸ An̈ec tic, chamnc on̈c xo yet' Cristo 'a sat Dios. Yuj cha, tzca'c 'och 'a qui c'ojol, to pitzn on̈c 'a jun 'ejmn̈ej yet'oc.

⁹ Yujto cojquec, ye'xn̈ej pitzwnac can pax Cristo 'a scal eb' chamnac. Man̈x 'a b'a'n̈ 'oj cham jun 'ejmoc xo, yujto man̈x 'ayc 'och 'a yol sc'ab' chamel, caw man̈x 'a yel'ch spoder jun chaml chi 'a 'a.

¹⁰ Yujto a yic schami, man̈x 'a yel'ch jac maysch'olnil 'a sat 'a jun 'ejmn̈ej. Ax ticnec, pitzn 'a jun 'ejmn̈ej, yic tzya'n servil Dios.

¹¹ An̈jtona', 'ixta 'on̈c cab'i', nachj cab' 'el cujec to chamnc on̈c xo, man̈x 'a yaln maysch'olnil yic 'ayn̈ec. Qui nac paxi, to pitzn on̈ec, yic tzca'nec servil Dios, yujto junxn̈ej cajc yet' Cristo Jesús, [atn Cajlil.]

¹² Yuj cha, a wal maysch'olnil, caw man̈xtzac qui chajec 'och yac' yajlil 'a yib'n̈ qui niwnalec. Yujto a qui niwnalec tic, yic chaml yaji. Caw man̈xtzac qui yicljec qui b'on jun tzo'n̈ maysch'olnil tzqui nib'jec 'ochi.

¹³ Matz tac' ca'nec 'och qui niwnal tic 'a yol sc'ab' maysch'olnil tzqui b'onec jun tzo'n̈ tu'al. Yowlal an̈j 'a yol sc'ab' Dios tzca'c 'och qui b'a, yujto chamnc on̈c xo 'a sat, on̈ pitzwec paxi. Yuj cha, caw ca'c 'och qui niwnal tic 'a yol sc'ab' Dios, sec wach' cojxn jun tzo'n̈ tas wach' tzqui b'oc yet'oc.

¹⁴ A maysch'olnil, man̈x 'a yaln yic 'ayn̈ec, yujto man̈xtoc 'ayn̈ec 'ec' 'a yol sc'ab' ley yic Moisés. A 'a yol sc'ab' swach'c'ojlal Dios 'ayn̈ec 'ec' ticnec.

Man̈xtoc yic on̈c maysch'olnil

¹⁵ A ticnec, 'ayn̈ec 'ec' 'a yol sc'ab' swach'c'ojlal Dios, man̈xoc 'a yol sc'ab' ley yic Moisés. Palta ¿tas tze na'a? ¿Tom yuj cha, tztac' an̈ja qui b'onec maysch'olnil? Ma'ay, caw wal man̈xtzac stac'a.

¹⁶ Cojquec, toto 'ay junc mach tzya'ch sb'a smoosoc junc winac, to man̈x yico'oc sb'a, toto 'ixta', an̈j win 'ay yic 'a jun 'ejmn̈ej. Yowlal tzyiclj tas tzyal winac. An̈jtona', 'ixta on̈c paxi. Toto tzca'c 'och qui b'a ya'malc servil maysch'olnil, tzqui yiclni tas tznib'ej, to 'ixta', an̈j 'ayn̈ec yico'. Ax qui chamc yuj 'a jun 'ejmn̈ej. Palta toto tzca'c servil Dios, tzqui yiclniec tas tznib'ej, to 'ixta', an̈j 'ayn̈ec yico'. Ax swach' tojlb'i qui nab'enec yu'uj.

¹⁷ Palta tzwac' yuj diosal 'a Dios eyu'uj. Yujto wach'xam eya'jnac servil maysch'olnil 'a yic yalan̈, ax ticnec, wal 'a smasnil e c'ojol, wan eyiclni jun tzo'n̈ cuynb'il 'ajtil ex 'ajx 'ochi.

¹⁸ Ex colchj 'el 'a yol sc'ab' maysch'olnil, man̈xtoc ya'mal ex servil ticnec, ex 'och ya'malc servil wach'il.

¹⁹ A jun tzo'n̈ wan waln 'at 'ayx tic, 'icha to comn 'ab'xn̈ej tzwutj walni, yujto mantzac nachj 'el wal jun tzo'n̈ cuynb'il tic eyu'uj. A 'a yic yalan̈, ca'jnaquec 'och qui niwnal ya'malc servil tu'al, yet' maysch'olnil. Yuj cha, caw maysch'olnil cutjnaquec qui b'a ta'. Ax ticnec, yowlal 'ixta tzcutjec ca'n 'och qui niwnal tic ya'malc servil wach'il, sec wach' cojxn Dios 'aj tzca'c 'och qui nab'en.

²⁰ A yic ca'nec servil maysch'olnil 'a yic yalan̈, ax wach'il, may yaln yic 'ayn̈ec ta'.

²¹ Palta ¿tom 'ay jac qui ganar 'a spatc jun tzo'n̈ qui b'ojnaquec cha? Caw tzon̈ q'uixwec yuj jun tzo'n̈ chi ticnec. Yuj wal jun tzo'n̈ cha, tz'at eb' 'anma 'a chaml 'a jun 'ejmn̈ej.

²² Ax ticnec, colchjnacn̈ec can 'elt 'a yol sc'ab' jun tzo'n̈ maysch'olnil cha. Man̈x 'a yaln yic 'ayn̈ec. On̈ 'ochc ya'malc servil Dios. Yuj cha, caw 'ay qui ganar ticnec, yujto a tz'a'n ca'c 'och qui nab'en 'a 'a. Ax qui chanec pax qui q'uinl 'a jun 'ejmn̈ej.

²³ Toto a maysch'olnil tzqui b'o'ec, 'oj qui chac stojol, atn chaml 'a jun 'ejmn̈ej. Palta ax jun siylab' tzyac' Dios 'ayn̈ec, atn qui q'uinlec 'a jun 'ejmn̈ej, yujto junxn̈ej cajc yet' Cristo Jesús, atn Cajlilec.