Ro 4 - Chuj San Sebastian Bible

A Abraham ch'oxnb'il yaji

¹ A qui mam quichmec Abraham, ¿tas 'ajnc 'a sat Dios tze na'a?

² Caw wach' 'a sat Dios, palta man̈ yujoc tas wach' sb'ojnac. Q'uinloc yuj tas sb'ojnac wach' 'a sat Dios, toto 'ixta', tecn am tztac' yijnac chan̈ sb'a. Palta 'a sat Dios, ma'ix stac' sb'an̈n sb'a,

³ yujto tzyal 'ixtc 'a Ch'an̈ U'un̈: A Abraham 'ix ya'ch sc'ojl 'a Dios, yuj cha, wach' xcan 'a sat, xchi.

⁴ A ticnec, q'uinloc tzon̈ munlj 'a junc 'anma', tzqui chan qui tojol. A jun cha, man̈ siylab'oc, yujto sb'ocx jun 'anma cha.

⁵ Palta ax Dios, wach'xam matz on̈ munljec 'a 'a, cojn toto tzca'c 'och 'a qui c'ojol, to 'ixta', wach'n̈ec 'a sat. 'Ixta tz'aj junjn mach to tz'och smul 'a sat Dios, toto tzya'ch wal sc'ojl 'a 'a.

⁶ A David yaljnac cani, to caw wach' yic eb' 'aj tzyal Dios to wach' 'a sat, palta man̈ yujoc tas wach' tzb'o eb', tzyaln Dios 'ixta'.

⁷ Yaljnac can David 'ixtic: Caw wach' yic eb' to 'ix 'ajx can lajwc smasnil smul, 'ix sucx pax satc smaysch'olnilal eb'.

⁸ A eb' x'och spaltail, toto man̈xtzac 'och jun chi smulc eb' yuj Cajlil, caw wal wach' yic eb', xchi.

⁹ A jun wach'l tzyal tic, man̈ cojnoc eb' 'ac'b'il circuncidar 'ay yico', yic pax eb' man̈ 'ac'b'ilc circuncidar yet' eb'. Tox 'ix walb't 'ayex, yujto a win Abraham, ya'jnac 'och sc'ojl 'a Dios. Yujn̈ej cha, yaln Dios to wach' win 'a sat.

¹⁰ Palta nac coti, b'a'n̈i yaljnac Dios 'ixta'. ¿Tom 'ac'b'ilx 'och jun senya chi 'a win ta'? Ma'ay, mantzac 'ajx 'och jun senya chi 'a winac.

¹¹ Palta c'ojnc'ojnilt chab'il jun circuncisión chi yuj winac. A jun cha, ch'oxnb'il yaji, chajtlto wach' win 'a sat Dios, yujn̈ej to ya'jnac 'och win sc'ojl 'a Dios, yic mantzac 'ajx 'och jun senya chi 'a winac. Yuj cha, a win mamb'il yaj 'a jantcn̈ej eb' man̈ 'ac'b'ilc circuncidar, toto tzya'ch eb' sc'ojl 'a Dios. Mamb'il yaj 'a eb' yujto wach' pax eb' 'a sat yet' winac.

¹² An̈jtona', mamb'il yaj pax win 'a eb' 'ac'b'il circuncidar. Tzyal 'el'chi, atn eb' matz ya'ch jun senya chi yipc sc'ojol, atn eb' tzya'ch sc'ojl 'a Dios, 'icha ya'jnac Abraham cha yic mantzac 'ajx circuncidar.

Ya'jnac can Dios sti'

¹³ Ya'jnac can Dios sti 'a win Abraham yet' 'a eb' yin̈til, chajtlto 'oj yac' yolyib'n̈q'uinl tic yico'oc eb'. Man̈ yujoc syicljnac win sley Dios, ya'n can sti 'a winac, palta yujn̈ej to wach' win 'a sat, yujto ya'jnac 'och win sc'ojl 'a 'a.

¹⁴ A eb' 'aych snab'en 'a jun ley cha, q'uinloc an̈j 'a eb' 'oj yac' Dios yolyib'n̈q'uinl tic yico'oc. Toto 'ixta', nab'an̈ej am tzca'c 'och qui c'ojl 'a 'a, ax jun sti ya'jnac cani, may am pax yopiso.

¹⁵ Yujn̈ej jun ley cha, tz'ajx cot yailal 'a yib'n̈ eb' 'anma'. Q'uinloc may jun ley chi ticnec, toto 'ixta', may am mach tztenn 'ec' jun ley cha.

¹⁶ Yujn̈ej to ya'jnac 'och win Abraham sc'ojl 'a Dios, yuj cha, ya'jnac can Dios sti 'a winac. 'Ixta tz'aj scheclj 'eli, to yujn̈ej swach'c'ojlal Dios, ya'n can sti'. Yuj cha, an̈ec yin̈tl on̈c Abraham tic, caw yel quiquec pax qui masnil yet' winac. Man̈ cojnoc eb' tzyiclni jun ley chi 'ay yico', palta quiquec pax qui masnil an̈ tzca'c 'och qui c'ojl 'a Dios, 'icha ya'jnac win Abraham cha. Yujto a winac, mamb'il yaj 'ayn̈ec 'a sat Dios, yujto ya'jnac 'och win sc'ojl 'a 'a.

¹⁷ 'Icha yaj yaln can Dios 'a Ch'an̈ U'un̈, a 'aj tzyal 'ixtic: Yujto niwn nacion̈ 'oj ach wa'ch smam 'ichmoc, xchi Dios 'a win Abraham cha. A Dios a tz'a'n pitzwc pax eb' chamnac. Ton̈j tzyala, tzcheclj chan̈ pax jun tzo'n̈ tas mant 'ayc 'ec' xoni.

¹⁸ A 'a jun 'el, may junc tas wach' ya'n 'och Abraham yipc sc'ojol, palta ya'jnac 'och sc'ojl 'a Dios. A wal tas yaljnac Dios 'a 'a, a ya'jnac yipc sc'ojol. Yuj cha, niwn nacion̈ 'aj 'ochnc can mam 'ichmab'ilal, 'icha yaj yaln can Dios 'a winac, yic yaln can 'ixtic: 'Ixta 'oj 'aj sb'isl eb' en̈til, xchi.

¹⁹ A win Abraham cha, jab'xoj wal yel win 'a jun ciente ab'il. Yojtac to caw 'ichm xo, yojc paxi to caw chichm xo pax 'ix Sara. 'Icha to man̈x b'a'n̈ 'oj 'aljoc junc yunnal eb', palta an̈ja ya'jnac 'och win 'a sc'ojl yuj tas yaljnac Dios 'a 'a.

²⁰ A yic ya'n can Dios sti 'a winac, man̈ chab'c'ojlalc yutjnac win yab'ni. Caw ya'jnac 'och win 'a sc'ojol. Caw te'n yutjnac win snab'en. Yaljnac win wach' paxti 'a Dios,

²¹ yujto yojc win si'mb'il, to 'ay spoder Dios sb'on 'icha yaj yaln can 'a winac.

²² Yujn̈ej wal cha, yaln Dios to wach' win 'a sat, yujto ya'jnac 'och win 'a sc'ojol.

²³ Tz'ib'b'il can 'a Ch'an̈ U'un̈, chajtlto wach' win 'a sat Dios, yujto ya'jnac 'och win 'a sc'ojol. Palta man̈ yujocn̈ej winac tz'ib'b'il cani.

²⁴ Tz'ib'b'il can pax cujec. Yuj cha, tzyaln Dios to wach'n̈ec pax 'a sat, toto tzca'c 'och qui c'ojl 'a 'a. A 'a'jnac pitzwc pax Cajlil Jesús 'a scal eb' chamnac.

²⁵ Atn jun 'ajxnac 'och 'a yol sc'ab' chaml yuj qui mulec. Xlajw cha, xpitzw paxi, sec tzon̈ 'ochc wach'l 'a sat Dios yu'uj.