Ro 16 - Chuj San Sebastian Bible

Tz'ajx 'at stzatzl sc'ojl eb' creyente

¹ A canb' Febe, diaconisa 'ix 'a jun iglesia 'a chon̈b' Cencrea. Tzwac' 'ab'enal 'ix 'a yol e cab'.

² Wach' tzeyutj e chan sc'och ta', yujto yic xo Cajlil 'ix quet'ec. Yujto an̈ creyente on̈c tic, smoj 'ixta tzcutjec qui chan eb' quit creyenteal tzlaj 'ec' 'ayon̈. Caw tzex colwj 'a 'ix yuj tastc 'ay tz'och yu'uj, yujto til wal mach 'aj tzlaj colwj 'ix. An̈jtona', 'ix colwj pax 'ix 'ayin.

³ Tic tzwa't stzatzl sc'ojl canb' Prisca yet' cu'tac Áquila, yujto junn̈j in munlj yet' eb' 'a yic Cristo Jesús.

⁴ 'Ijn milxnac cham eb' 'a jun 'el, yic xit' 'in scolnc 'elt eb' 'a yol sc'ab' chamel. Yuj cha, caw tzwac' yuj diosal 'a eb'. An̈jtona eb' creyente 'a junjn iglesia 'a scal eb' man̈ israeloc, tzyac' pax eb' yuj diosal 'a eb'.

⁵ Tic tzwa't stzatzl sc'ojl eb' creyente tzyam sb'a 'a yol yatut eb' cha. Tzwa'n pax 'at stzatzl sc'ojl cu'tac Epeneto. Caw chamc'ojlb'il wu'uj, yujto a sb'ab'l 'a'jnac 'och sc'ojl 'a Cristo 'a yol yic Asia.

⁶ Tzwa'n pax 'at stzatzl sc'ojl María, jun caw xmunlj 'a e cal.

⁷ Tzwa'n pax 'at stzatzl sc'ojl Andrónico yet' Junias. To wit chon̈b' in b'a yet' eb', witb'eym pax in b'a yet' eb', yic woch 'a preso yet' eb' 'a jun 'el. Caw 'ay yel'ch eb' 'a qui cal an̈ schecb' on̈ Cristo on̈. Sb'ab'l 'a'jnac 'och eb' sc'ojl 'a Cristo 'ayin.

⁸ Tzwa'n pax 'at stzatzl sc'ojl cu'tac Amplias. Caw chamc'ojlb'il pax wu'uj, yujto 'aych sc'ojl 'a Cajlilec.

⁹ Tzwa'n pax 'at statzl sc'ojl cu'tac Urbano, yujto junn̈j tzmunlj quet'ec 'a yic Cristo Jesús. Tzwa'n pax 'at yic cu'tac Estaquis, yujto chamc'ojlb'il pax wu'uj.

¹⁰ Tzwa'n pax 'at stzatzl sc'ojl cu'tac Apeles. A jun cha, caw chequel to 'aych sc'ojl 'a Cristo. Tzwa'n pax 'at stzatzl sc'ojl eb' yic win Aristóbulo.

¹¹ Tzwa'n pax 'at stzatzl sc'ojl jun wit chon̈ab' atn Herodión, yet' eb' yic win Narciso, win creyente xo.

¹² Tzwa'n pax 'at stzatzl sc'ojl canb' Trifena yet' Trifosa, yujto caw tzmunlj eb' 'a yic Cajlilec. Tzwa'n pax 'at stzatzl sc'ojl canb' Pérsida, chamc'ojlb'il wu'uj, yujto caw niwn xo smunljel 'a Cajlilec.

¹³ Tzwa'n pax 'at stzatzl sc'ojl cu'tac Rufo, atn jun niwn yel'ch 'a scal eb' yit creyenteal, yet' pax snun. Ax snun cha, 'icha wal yune yutjnac in.

¹⁴ Tzwa'n pax 'at stzatzl sc'ojl jaywn̈ xo eb' cu'tac tic: Asíncrito, Flegonte, Hermes, Patrobas, Hermas, yet' jun tzo'n̈ xo eb' 'ayc' eyet' ta'.

¹⁵ An̈jtona', tzwa'n pax 'at stzatzl sc'ojl cu'tac Filólogo, yet' canb' Julia, yet' cu'tac Nereo, yet' yanb' Nereo cha, yet' canb' Olimpas, yet' pax smasnil eb' quit creyenteal 'ayc' yet' eb'.

¹⁶ A yic tzlaj e chanc e b'a, tzlaj eya'lac stzatzl e c'ojl 'a chamc'ojlal, yujto yic ex xo Dios. A eb' 'a junjn yiglesia Cristo 'a jun lugar tic, tic tzya't eb' stzatzl e c'ojl ta jun xo.

¹⁷ Ex wu'tac, ex wanab', 'ay eb' 'a e cal, wan ya'lni eb' laj e pojl e b'a, tzya'lni eb' ya'n somchjc 'el e nab'en, palta caw man̈ 'ichcta tzyal jun tzo'n̈ cuynb'il 'aj cuywnac ex, yuj cha, caw tzeyil wal e b'a 'a eb'. Yowlal tzeyij 'el e b'a 'a scal eb'.

¹⁸ Yujto a eb' cha, man̈oc Cajlil Jesucristo tzyac' servil eb', an̈j jun tzo'n̈ tas tznib'j 'och sniwnal eb', an̈j tzyac' servil eb', caw tzyixtj paxti eb' jun tzo'n̈ eb' mantzac nachj 'el yu'uj. C'un tzcob' yutc eb' yalni, 'icha to wach' cob' chi tzyal eb', palta man̈ wach'oc.

¹⁹ Palta ax xo, smasnil 'anma 'ojtnac, chajtlto yiclum ex 'a Dios. Yuj cha, caw 'ay in tzalc'ojlal eyu'uj. Tzin nib'ej caw jeln tzeyutj e b'on jun tzo'n̈ tas wach', ax jun tzo'n̈ maysch'olnil, man̈ e comn b'o'oc.

²⁰ A Dios 'a'm junc'ojlal, a 'oj 'a'nc e tec' 'ejm win Satanás muc'uc, caw 'oj can win 'a yaln̈ eyu'uj. Tzin nib'j tzyac' Cajlil Jesucristo swach'c'ojlal 'ayx ta'.

²¹ A Timoteo tic, junn̈j tzmunlj wet' 'a tic, a tz'a'n 'at stzatzl e c'ojl yet' eb' wit chon̈b' tic, atn Lucio, Jasón, yet' Sosípater.

²² An Tercio in tic, wan in tz'ib'n 'at jun scarta Pablo tic 'ayex. Tzwa't stzatzl e c'ojol, yujto yic ex xo Cajlil quet' on̈.

²³ A cu'tac Gayo, tzya't pax stzatzl e c'ojol. A 'a yatut tic 'ayn̈ 'ec' on̈. A 'a tic, tzyam sb'a eb' creyente smasnil. A cu'tac Erasto, molm tumn yaj 'a jun chon̈b' tic, yet' cu'tac Cuarto, tic tzya't pax eb' stzatzl e c'ojol.

²⁴ [Tzin nib'ej, a Cajlil Jesucristo tzyac' swach'c'ojlal 'ayx e masnil ta'. 'Ixta cab' tz'aji.]

A swach' paxti Pablo 'a Dios

²⁵ A ticnec, calc wach' paxti 'a Dios, yujto a tztac' ya'n qui te'nalec 'a smasnil tiempo. 'Ixta tzyal jun wach' 'ab'x tzwalcn 'eli, atn yab'xil Jesucristo. Yictax mantzac sb'o Dios yolyib'n̈q'uinl tic, molb'il xon yab'xil Cristo yu'uj.

²⁶ Palta ax ticnec, a tz'a'n 'ojcaxc 'el jun 'ab'x tic atn tas tz'ib'b'il can 'a Ch'an̈ Un̈ yuj eb' schecab'. A Dios 'ayc'n̈ej 'a smasnil tiempo. A tzalni, chajtlto a eb' 'anma 'a junjn chon̈ab', yowlal tzyojquej 'el eb' jun 'ab'x tic, sec 'oj ya'ch eb' sc'ojl 'a 'a, ax syiclni eb'.

²⁷ Cojxn Dios 'ojtnac smasnil tas. Smasnil tiempo calc wach' paxti 'a yuj Jesucristo. Ya' cab'i'.