Ro 15 - Chuj San Sebastian Bible

A eb' creyente te'nxo

¹ An̈ec tic, te'n on̈c xo 'a yic Dios, yujto tznachj 'el cujec, to may yowlal jun tzo'n̈ cha. Palta 'ay eb' mant 'a ste'nal, tzxiw eb' yu'uj. Yuj cha, yowlal tzca'c techjoc tas tzna eb', sec matz somchj 'el eb' cujec. Matz tac' qui comn b'onec 'icha tzqui nib'ej.

² Junjn on̈ec, qui b'oc 'icha tznib'j eb' quit creyenteal, sec caw wach' yic eb'. Toto 'ixta', 'oj 'och ste'nal eb' 'a screyenteal.

³ Yujto a Cristo, man̈toc mun sb'ojnac 'icha snib'ej. Palta caw jawnac 'a yib'n̈ 'icha tzyal 'a Ch'an̈ U'un̈, 'a 'aj tzyal 'ixtic: A yic sb'uchwj eb' 'anma 'ayach, caw locn in tzwab' syail, xchi.

⁴ Jantcn̈ej tas tz'ib'b'il can 'a Ch'an̈ Un̈ pecti', 'ay yopiso on̈ scuynec. A Ch'an̈ tz'a'n qui te'nalec, tzya'n pax sniwnal qui c'ojlec, sec wach' tzca'c 'och Dios yipc qui c'ojol.

⁵ A Dios tz'a'n qui te'nalec, tzya'n pax sniwnal qui c'ojlec. Tzin c'an 'a Dios eyu'uj yic tzcolwj eyet'oc, sec wach' 'ay junc'ojlal 'a e cal, 'icha tas tzch'oxjnac can Cristo Jesús.

⁶ Sec wach' junxn̈ej 'oj 'aj e nab'en, junxn̈ej 'oj eyutc eyaln wach' paxti 'a Dios, atn 'a Smam Cajlil Jesucristo.

'Ec' yaljnac Pablo*r* wach' 'ab'x 'a eb' man̈ israeloc

⁷ Yuj cha, yowlal tzqui chajec 'och smasnil eb' quit creyenteal quet'oc, yujto 'ixta on̈ yutjec Cristo on̈ schan 'och yico'oc, sec tzcheclj 'eli, to caw niwn swach'l Dios.

⁸ Tzwalb't jun tzo'n̈ tic 'ayex, yujto a Cristo wul ya'jnac sb'a ya'malc servil eb' quit israelal. A wul 'a'jnac 'el'choc tas yaljnac can Dios 'a eb' qui mam quichmec, yic ya'n can sti 'a eb'. 'Ixta yutjnac Cristo sch'oxni, to caw yel tzyal Dios.

⁹ An̈jtona', yuj pax eb' man̈ israeloc swulc' Cristo, sec wach' tzyal eb' wach' paxti 'a Dios, yujto 'ix 'o'ch sc'ojl 'a eb'. Yujto tzyal 'ixtc 'a Ch'an̈ U'un̈: Yuj cha, tzwaln wach' paxti 'aych 'a scal eb' 'anma 'a junjn nacion̈, tzin b'itnan pax wal a b'i, xchi.

¹⁰ Tzyaln pax junx tic 'a Ch'an̈: Ex nacion̈ tzaljan̈c yet' jun schon̈b' Dios tic, xchi.

¹¹ 'Ay 'aj tzyal pax 'ixtic: E masnil ex nacion̈ yet' e masnil ex chon̈ab', alc wach' paxti 'a Cajlil, xchi.

¹² A Isaías a tz'ib'jnac can 'ixtc 'a Ch'an̈ U'un̈: 'Ay jun yin̈tl Isaí 'oj pitzwc cha'an̈, a 'oj 'ajxc 'och syajlilc eb' nacion̈. Atn jun chi 'oj ya'ch eb' yipc sc'ojol, xchi 'a Ch'an̈.

¹³ A Dios, a yipc'ojlal yaj cujec. Tzin nib'ej a tzwach' 'a'n e tzaljc'ojlal, yet' e junc'ojlal, yujto tzeya'ch e c'ojl 'a 'a. Toto 'ixta', a 'oj e wach' 'a'c 'och yipc e c'ojol, yujto a Yespíritu tz'a'n spoder 'ayex.

¹⁴ Ex wu'tac, ex wanab', wojc xoni, to caw wach' e nab'en, caw jeln ex 'a yic Dios. Wojc paxi, to caw tztac' laj eya'lanc e nab'en ta'.

¹⁵ Wach'xam 'ixta ex, palta caw matz in xiw in tz'ib'n 'at jun tzo'n̈ cuynb'il tic 'ayex, sec matz sat e c'ojl 'a 'a. 'Ixta tzwutj in b'a, yujto a Dios 'a'jnac jun wopiso tic yuj swach'c'ojlal.

¹⁶ A 'a'jnac wopiso wa'n servil Jesucristo 'a scal eb' man̈ israeloc. 'Ay wopiso waln 'el wach' 'ab'x yic Dios, sec wach' 'ay eb' man̈ israeloc 'oj wi'ch 'a yol sc'ab'. 'Icha junc xajmb'al caw wach' 'a sat Dios, tz'ajx 'a 'a, 'ixta eb' 'a sat, yujto a Yespíritu tz'i'n 'och eb' yico'oc.

¹⁷ Yujto 'ayx 'och in c'ojl a Cristo Jesús, yuj cha, tztac' walni, chajtlto caw 'ay yel'ch jun munljel tic tzin b'o 'a Dios.

¹⁸ Matz tac' walni, tas b'ob'il yuj jun tzo'n̈ xo eb' tz'a'n servil Dios. Palta matz in xiw walni, tas 'ix sb'o Cristo wet'oc, yic 'ix ya'n syiclc eb' man̈ israeloc. Yujto an x'ec' wal-l yab'x eb', xin ch'oxn jun wach' b'eyb'al 'a eb'.

¹⁹ 'Ay pax jun tzo'n̈ milagro ch'oxb'il wuj 'a eb', yet' jun tzo'n̈ xo tas tzch'oxn 'el spoder Dios. Ax Yespíritu Dios 'ix yac' spoder 'ayin. 'Ixta xwutj 'ec' walnc 'el wach' 'ab'x yic Cristo 'a junjn chon̈ab'. A 'a Jerusalén, ata in b'ab'l yamj 'och waln 'eli. C'uxn x'ec' wal-l 'a junjn chon̈ab', masnto in c'och 'a chon̈b' Ilírico.

²⁰ Yujto caw tzwac' 'ip waln 'el wach' 'ab'x yic colnb'il 'a junjn lugar 'ajtil mantzac yab' eb' yab'xil Cristo. Matz in nib'j tz'ec' wal-l 'a jun tzo'n̈ lugar 'ajtil tox x'ec' yal-l jun tzo'n̈ xo eb'.

²¹ 'Icha tzyal 'a Ch'an̈ U'un̈: A eb' 'aj mantzac c'och yab'xil, 'oj yab' eb'. Yet' eb' mantzac yab'xon yab'xil, 'oj nachjoc 'el yuj eb', xchi.

Tznib'j Pablo tz'at 'a Roma

^22-23 Til wal 'ejm tzin nib'j 'at ex wila'. Niwn xo yab'lil in yamn 'och in nani. Palta yuj wopiso tic, matz tac' 'at ex wilnoc. Al ticnec, man̈x 'a in munljel 'a jun tzo'n̈ lugar tic.

²⁴ Yuj cha, tzin na'a, a yic 'oj in 'at 'a España, 'oj 'ec' ex wila', sec 'oj jawc in tzaljc'ojlal eyet' ta'. 'Oj lajwc in can jaye'oc c'u eyet' ta', tzin nib'j 'oj e colwj 'ayin, sec 'oj in c'och 'a España cha.

²⁵ Palta a ticnec, 'oj in b'ab'l 'ec' 'a Jerusalén. 'Oj wi't jun ofrenda 'a eb' creyente ta'.

²⁶ Yujto a eb' 'aj Macedonia yet' eb' 'aj Acaya, x'el 'a sc'ojl eb', xyij chan̈ eb' jun ofrenda yic tz'at 'a eb' creyente meb'a 'ay 'a Jerusalén.

²⁷ 'Ix 'el 'a sc'ojl eb', to xyac' eb' jun ofrenda cha. Caw wach' 'ixta', yujto 'icha to 'ay sb'oc eb' 'a eb' 'aj Jerusalén cha. Yujto a eb' israel cha, a eb' colwjnac 'a eb' man̈ israeloc chi 'a yic espiritual. Yuj cha, a eb' man̈ israeloc cha, 'ay yaln eb' yic scolwj pax yet' yofrenda 'a eb' israel cha.

²⁸ Yuj cha, yowlal 'oj 'ec' wa'cn jun ofrenda tic 'a eb' 'aj Jerusalén. 'Oj lajwc cha, ax 'ec' ex wilnoc, yic wan in 'at 'a España.

²⁹ Wojtac, a yic 'oj in c'och eyet' ta', til wal swach'c'ojlal Cristo 'oj sch'ox 'ayx wet'oc.

³⁰ Ex wu'tac, ex wanab', a Yespíritu Dios, a tz'a'n qui chamc'ojloquec qui b'a. Yu'uj, tzin tew 'at 'ayex, caw tzeyac' eyip eyoch wet' 'a lesal. Caw tzex leslwi 'a Dios wu'uj, yujto 'ixta tznib'j Cajlil Jesucristo.

³¹ Tze c'an 'a Dios wu'uj, sec 'oj in scolcn 'el 'a yol sc'ab' eb' man̈ creyenteoc 'aj Judea. Tzex leslwi pax yuj jun ofrenda tic 'oj wi't 'a eb' creyente 'a Jerusalén, sec tzaljc'ojlal 'oj scha eb'.

³² Tzex leslwi pax wu'uj, sec tzaljc'ojlal 'oj in c'och eyet' ta', toto 'ixta tznib'j Dios. 'Oj wilj jaye'oc c'u 'aj 'ayx cha.

³³ A Dios 'a'm junc'ojlal, tzin nib'ej a tz'och eyet' e masnil ta'. 'Ixta cab' tz'aji.