Ro 14 - Chuj San Sebastian Bible

Matz tac' qui b'eyc'ojlanec qui b'a

¹ 'Ay eb' creyente mant 'a ste'nal, yujto mantzac nachj 'el wal scuynb'il Cristo yuj eb'. A eb' 'ixta cha, chajec 'och eb' eyet'oc. Palta man̈ comnoc tze tej e b'a yet' eb' yuj jun tzo'n̈ tas mantzac nachj 'el yuj eb'.

² Yujto a eb' creyente 'ayx ste'nal, yojc eb', to tzann̈j tas tztac' sc'uxn eb'. Palta 'ay pax eb' mant 'a ste'nal. Yuj cha, tzat xiw eb' schin chib'ej, cojxn jun tzo'n̈ te 'itj tzlo eb'.

³ An̈ec tzqui c'uxc smasnil tas, matz tac' qui b'uchwjec 'a eb' matz c'uxn jun tzo'n̈ cha. An̈jtona', a eb' matz c'uxn jun tzo'n̈ cha, matz tac' sb'uchwj pax eb' 'ayn̈ec, yujto chab'iln̈ec yuj Dios yet' eb'.

⁴ Q'uinloc 'ay junc mach tzmunlj 'a junc spatron̈. ¿Tom 'ay calnec quic qui b'eyc'ojlan jun cha? Cojxn jun spatron̈ chi 'ay yaln yic yalni, toto wach' 'a sat, mto ma'ay. An̈jtona', 'ixta on̈c 'a Cajlil. Palta wach' 'oj cajc 'a sat, yujto 'ay spoder yoch quet'ec, sec caw wach' tzcutjec qui b'a.

⁵ 'Ay eb' creyente tzalni, to 'ay jun tzo'n̈ c'u yel xo niwn yel'chi. 'Ay pax eb' tzalni, to lajnn̈ej junjn c'u, may junc yel xo niwn yel'chi. Yuj cha, qui nac jun tic 'a qui jolm junjn on̈ec, 'aj tzon̈ canec.

⁶ A mach tz'a'n 'och yopiso jun tzo'n̈ c'u tzwal tic, 'ixta tzb'o'o, sec tzch'oxo to 'ay yel'ch Cajlilec 'a sat. [An̈jtona', a mach matz 'a'n 'och yopiso jun tzo'n̈ c'u tic, 'ixta tzb'o'o, sec tzch'oxo, to 'ay yel'ch Cajlilec 'a 'a.] Yet' pax junx tic, a mach tzann̈j tzc'uxni, tzc'uxn̈ej, sec tzch'oxo, to 'ay yel'ch Cajlilec 'a 'a, yujto tzyac' yuj diosal 'a Dios tzc'uxni. A pax mach matz c'uxn jun tzo'n̈ chi smasnil, 'ixta tzb'o'o, sec tzch'oxo, to 'ay yel'ch Cajlilec 'a 'a, yujto tzyac' pax yuj diosal 'a Dios yuj tas tzc'ux cha.

⁷ Ya' sb'a pitzn on̈ec, man̈ munoc quiquec qui b'a. An̈jtona', 'ixta 'a yic 'oj qui chamec, man̈ pax quico'oquec qui b'a.

⁸ Yuj cha, wach'xam pitzn on̈ec, mto tzon̈ chamec, palta yic on̈cn̈ej Cajlil.

⁹ Yujto 'ix cham Cristo, 'ix pitzw paxi, sec wach' tz'och Yajlil 'a yib'n̈ eb' chamnac, yet' 'a quib'n̈ an̈ pitzn on̈c to tic.

¹⁰ Yuj cha, caw matz tac' qui b'eyc'ojlanec junc quit creyenteal. Matz tac' calnec paxi to may yel'ch eb'. Yujto qui masnilec, yowlal 'oj qui c'ochc 'a yojltac Dios, ax qui b'eyc'ojlaxc yu'uj.

¹¹ Yujto tzyal 'ixtc 'a Ch'an̈ U'un̈: An Yajl in tic, an tzwac' in ti', caw 'oj 'em cumn smasnil 'anma 'a wojltac, ax yaln eb' smasnil, chajtlto cojxn in Dios in, xchi.

¹² Yuj cha, junjn on̈ec yowlal 'oj ca'c 'och qui cuenta 'a Dios.

A mach tz'an juwc snab'en*r* junc yit creyenteal

¹³ Yuj cha, man̈xtzac stac' laj qui b'eyc'ojlanc qui b'a. Yel xo wach' a junx tic tzqui b'o'ec, to caw wach' tzcutjec qui b'eyb'al yil eb' quit creyenteal, sec wach' may junc eb' 'oj 'ixtxoc cujec, may junc eb' 'oj somchjc 'el snab'en 'a screyenteal.

¹⁴ An tic, yujto 'aych in c'ojl 'a Cajlil Jesús, caw wojc si'mb'il, may junc tas 'ay yowlal yu'uj. Palta toto 'ay mach tznani, to 'ay yowlal junc tas yuj Dios, caw matz tac' sb'oni, yujto 'ay ton yowlal yuj Dios 'a 'a.

¹⁵ Q'uinloc 'ay junc tas 'ay yowlal sc'uxx yuj jun tzo'n̈oc eb' quit creyenteal. Toto yuj tzqui c'uxu, yuj cha, tzcus eb', toto 'ixta', may qui chamc'ojlalec 'a eb'. Palta a Cristo 'ix cham pax yuj eb' quet'ec. Yuj cha, caw 'ay smay toto tzjuw 'el snab'en eb' yuj junc tas tzqui c'uxc cha.

¹⁶ An̈ec tic, cojquec to wach' jun tzo'n̈ cha. Palta toto 'ay eb' tzalni, to maysch'olnil yic tzqui c'uxnec, yel xo wach' matz qui c'uxc 'a sat eb'.

¹⁷ A ticnec, 'ayn̈ecx 'och 'a yol sc'ab' Dios, yuj cha, man̈x smojc tzca'c 'och qui nab'en 'a jun tzo'n̈ tas tzqui c'uxec, mto tas tzcu'jec. Palta smoj tojl tzcutjec qui nab'en, junc'ojlal tzcutjec qui b'a. Tzqui chanec pax jun tzaljc'ojlal tzyac' Yespíritu Dios 'ayn̈ec.

¹⁸ Toto 'ixta tzcutjec ca'n servil Cristo, 'oj tzaljoc Dios quet'ec. Ax yiln pax eb' quit 'anma'il, to wach' qui b'eyb'alec.

¹⁹ Yuj cha, caw tzqui na'ec, tas tzcutjec qui b'a, sec junc'ojlal tzon̈ 'ajc qui masnil. Tzqui nanec paxi, chajtl tzcutjec qui mol 'a'nec 'och qui te'nal.

²⁰ Caw 'ay smay sjuw 'el smunljel Dios 'a spixn eb' quit creyenteal yuj tas tzqui c'uxec. Yuj cha, caw man̈ qui b'oc 'ixta'. Yel toni, may junc tas 'ay yowlal qui c'uxnec yuj Dios. Palta toto 'ay eb' tzsomchj 'el snab'en yuj tas tzqui c'uxec, yowlal tzcactjec can qui c'uxni.

²¹ Yuj cha, toto 'ay eb' tzsomchj 'el snab'en, yujto tzqui chic chib'ej, mto yuj tzcu'jec yal uva jawnc sti', mto yuj junc xo tas tzlaj qui b'o'ec, yel xo wach' tzcactjec can qui b'on jun tzo'n̈ cha.

²² Yujto 'aych qui c'ojlec 'a Dios, yuj cha, tznachj 'el cujec, to may junc tas 'ay yowlal yu'uj. Palta mun tzqui nac jun tzo'n̈ tic 'a sat Dios. A jun tzo'n̈ tas tzqui b'o'ec, toto cojtac may yowlal yuj Dios, caw wach' quiquec.

²³ Palta a yic tzqui c'uxnec junc tas, toto tzqui na'ec to 'ay yowlal yuj Dios, toto 'ixta', tz'och qui mulc 'a 'a, yujto matz ca'c 'och 'a qui c'ojol to wach' tzcutjec qui b'a. Tzann̈j tas tzqui b'o'ec, toto matz ca'c 'och 'a qui c'ojol, to wach' 'a sat Dios, to 'ixta', tz'och qui mulc 'a Dios yu'uj.