Ro 11 - Chuj San Sebastian Bible

'Ay eb' israel tzcolchji

¹ A eb' schon̈b' Dios cha, ¿tom patcab'il can 'el eb' yuj 'a jun 'ejmn̈ej? Ma'ay. 'Ilt in an tic, israel in yet' eb', yin̈tl in pax Abraham yet' eb'. Yic in junc'aj xo eb' yin̈tl Benjamín.

² Yictax pecti', yaljnac Dios yuj eb' israel to yic eb'. Ax ticnec, ma'oj spatquilc can 'el eb'. Cojquec yab'xil win Elías 'a Ch'an̈ U'un̈. A 'a jun 'el, xleslwi Elías 'a Dios, yalni tas smul eb' yit israelal cha. Yaln yuj eb' 'ixtic:

³ Mamin, a eb' wit chon̈b' tic, 'ix smil cham eb' jun tzo'n̈ xo eb' a checab'. 'Ix sma'n juwc eb' jun tzo'n̈ yet'l a xajmb'al. A ticnec, cojxn̈ej in cani, palta 'in tznib'j eb' tzin smil jun xo, xchi 'a Dios.

⁴ Palta yaljnac Dios 'ixtc 'a 'a: Ma'ay, 'ayt uque mil winc sic'b'il 'el wu'uj. May 'aj 'ix 'em cumn eb' 'a Baal, jun tzalx 'och diosal, xchi Dios 'a 'a.

⁵ An̈jtona', 'ixta pax ticnec. 'Ay eb' yic xon Dios 'a scal eb' wit israelal. Atn eb' sic'b'il can 'el yuj Dios yuj swach'c'ojlal.

⁶ Yuj wal swach'c'ojlal cha, si'n can 'el eb', man̈ yujoc junc tas tzb'o eb'. Q'uinloc yuj tas tzb'o eb', si'n 'el eb', to 'ixta', man̈ yujoc swach'c'ojlal Dios tzcolchj eb'.

⁷ Palta ¿tas tz'aj eb' wit israelal tze na'a? 'Ix ya'lj eb' sayni chajtl tz'aj eb' yoch wach'l 'a sat Dios, palta ma'ix stac' yuj eb'. Cojn eb' sic'b'il 'el yuj Dios 'a scal eb' cha, a eb' stac' yu'uj. Ax jun tzo'n̈ xo eb', ton̈j 'ix wach' 'ajx pitb'oc 'el eb'.

⁸ Yujto tzyal 'ixtc 'a Ch'an̈ U'un̈: A Dios 'ix wach' 'a'n pitb'oc 'el eb'. Yuj cha, wach'xam tzyil eb' spoder, palta matz nachj 'el yuj eb'. Wach'xam tzyab' eb' spaxti', palta an̈j 'ijnoc matz nachj 'el yuj eb'. An̈jtona', 'ixtan̈ej pax eb' ticnec, xchi 'a Ch'an̈.

⁹ An̈jtona yaljnac can pax David 'ixtic: A wal jun tzo'n̈ sq'uin̈ eb' tzlaj ya'chi, meltzj cab' 'och 'a eb' 'icha junc ch'an̈ ya'al, juw cab' 'el eb' yu'uj. Telw cab' eb' yuj jun tzo'n̈ sq'uin̈ cha. 'Och cab' yailal spacc 'a eb'.

¹⁰ 'Och cab' 'a sat eb' yuj 'a jun 'emn̈ej. 'Icha cab' junc winc tzquilx 'ejm n̈ojn yuj tas tzcuchu, 'ixta cab' tz'ajcn eb' 'a smasnil tiempo, xchi David cha.

A tz'aj eb' man̈ israeloc scolchji

¹¹ Tzin c'anb'j 'ayex, a yic sjuw 'el eb' israel cha, ¿tom caw juwnac 'el eb' 'a jun 'ejmn̈ej? Ma'ay. Yujto juwnac 'el eb', yuj cha, 'ay eb' man̈ israeloc tzcolchji. Ax eb' israel 'oj 'ilnoc, 'oj tz'a sc'ojl eb' yilni.

¹² Yujto juwnac 'el eb' israel cha, yuj wal cha, caw wach' yic eb' 'anma smasnil 'a yolyib'n̈q'uinl tic. Yujto cannc eb' israel chi 'a yalan̈, yuj cha, caw wach' yic eb' man̈ israeloc. Toto 'ixta', ¿jantc tom wal swach'l quiquec qui masnil, yic 'oj meltzjoc pax 'och snab'en smasnil eb' wit israelal jun 'ejm xo?

¹³ Palta 'ay jun tzin nib'j tzwalb't 'ayx man̈ ex israeloc. A Dios 'a'jnac wopiso in munlj 'a e cal. Yuj cha, caw niwn yel'ch jun wopiso tic 'a in sat.

¹⁴ Yujto tzin nib'ej to tzyil eb' wit chon̈b' cha, to wan e colchji, ax stz'a sc'ojl eb' eyu'uj. To 'ixta', toq'ue 'ay eb' 'oj colchjoc paxi.

¹⁵ A eb' israel cha, patcab'il can 'el eb' yuj Dios jun tiempoal. Yuj wal cha, smasnil jun tzo'n̈ xo 'anma', tztac' junc'ojlal tz'aj eb' yet' Dios. Ax 'a yic 'oj chaxoc pax 'och eb' israel chi jun 'ejm xo, man̈ jantcoc am wal swach'l 'oj scha eb' 'anma smasnil. 'Icha to 'oj pitzwc pax eb' 'a scal eb' chamnac, yujto caw niwn swach'l 'oj scha eb'.

¹⁶ A eb' sb'ab'l mam 'ichm eb' israel, cojxn Dios 'ay yic eb'. Yuj cha, 'ixta pax eb' yin̈tl eb', yic Dios pax eb'. 'Icha junc te te', toto yic Dios yaj sch'an̈lyib', an̈jtona sc'ab' te', yicn̈ej paxi, 'ixta yaj eb'.

¹⁷ Palta 'ay eb' wit israelal 'elnc 'a yol sc'ab' Dios. 'Icha junc sc'ab' te olivo tzu'x 'el 'a snun, 'ixta 'ajnc eb' yeli. Ax xo, 'icha sc'ab' junc te olivo mun pa'nac, 'ixta 'ex, yujto man̈ ex israeloc. Palta 'icha to ex c'on̈x can 'och sjelc eb' 'a jun sc'ab' 'aj tzuc'b'il 'elt 'a snun cha, yujto 'ay eyaln eyic yet' eb' qui mam quichm an̈ israel on̈ tic on̈.

¹⁸ Palta matz tac' e nani, to caw yel xo wach'x 'a yib'n̈ eb' wit israelal cha. Yujto 'icha junc sc'ab' te', 'ixta exn̈ej. A junc sc'ab' te', matz tac' a tz'a'n yaxb'oc te yib' cha, palta a sch'an̈lyib', a tz'a'n yaxb'oc te sc'ab' cha.

¹⁹ Tecn 'ayx 'oj eyal 'ixtic: A eb' israel cha, 'icha to tzuc'b'il 'el eb' 'a snun, sec wach' an̈ec xo tzon̈ 'ochx can pax sjelc eb', tecn 'oj e chioc.

²⁰ Yel toni, 'icha to tzuc'b'il 'el eb' israel cha, yujto ma'ix ya'ch eb' sc'ojl 'a Dios. Ax xo, yujn̈ej to tzeya'ch e c'ojl 'a 'a, ex 'ochcn sjelc eb'. Yuj cha, xe b'an̈t e b'a, tzeyil wal e b'a.

²¹ 'In ma'ix yac' Dios niwnc'ojlal 'a eb' yic xoni. An̈jtona', 'ixta ex paxi, ma'oj yac' pax niwnc'ojlal 'ayx jun xo, toto tzeyij 'el e nab'en 'a 'a.

²² Nachj cab' 'el eyu'uj, to niwn swach'c'ojlal Dios. Palta an̈jtona', caw 'a'm cuenta pax si'mb'il. A eb' juwnac 'el cha, caw 'ajxnac cuenta eb' yu'uj. Palta ax xo, til wal swach'c'ojlal tzch'ox 'ayex. Yowlal tzex can 'a swach'c'ojlal cha. To ma'ay, an̈jtona 'ex, 'oj eyijx pax 'el jun xo.

²³ A eb' wit israelal cha, toto 'oj ya'ch pax eb' sc'ojl 'a 'a, 'oj yi'x 'och eb' yico'oc jun 'ejm xo. 'Icha to 'oj sc'on̈x pax 'och eb' 'a jun snun chi jun 'ejm xo. Yujto a Dios 'ay spoder sb'on 'ixta'.

²⁴ Ax xo man̈ ex israeloc, 'icha to tzuc'b'ilx 'elt 'a jun te olivo mun pa'nc cha, ex c'on̈x 'och 'a sc'ab' jun snun te olivo wach'. Wach'xam man̈ ex yico'oc jun chi 'a yic yalan̈, palta ex 'och yico'oc. Toto 'ixta 'ex 'aji, an̈jtona', 'ixta pax eb' wit israelal, 'icha to 'oj c'on̈x pax 'och eb' 'a jun snun 'aj 'elncta. Atn jun 'ay xon yic eb' 'a pecti'. Yuj cha, yel xo wal 'oj wach' 'och eb' yico'oc jun 'ejm xo.

'Ay jun tiempoal 'oj colxoc eb' israel

²⁵ Ex wu'tac, ex wanab', a jun tzo'n̈ tzwalb't 'ayx tic, may wal mach 'ojtnac 'a yic pecti'. Palta ticnec tzin nib'j tzeyojquej 'eli, sec ma'oj e b'an̈ e b'a yuj e jelnal. A eb' wit israelal cha, niwn eb' pitb'nac 'eli. 'Oj cann̈j eb' 'ixta', masnto 'oj tz'acwc 'och nan̈l eb' man̈ israeloc.

²⁶ 'Ixta to b'i'an, ax scolchj pax smasnil eb' wit israelal. Yujto tzyal 'ixtc 'a Ch'an̈ U'un̈: A 'a chon̈b' Sión, 'a scal eb' israel, ata 'oj q'ue wan jun Colwjum. A 'oj 'i'nc 'el smul eb' yin̈tl Jacob.

²⁷ 'Ixtc 'oj wutc wa'n in trato yet' eb', yic 'oj wa'n lajwc smul eb', xchi Dios.

²⁸ A eb' wit israelal cha, 'ajc'ojl yajch eb' 'a Dios, yujto matz ya'ch eb' sc'ojl 'a jun wach' 'ab'x yic colnb'il. 'Ixta tz'aj eb', sec ax xo tztac' e colchji. Palta an̈ja schamc'ojlan Dios eb', yujto a si'jnac can 'el smam yichm eb'.

²⁹ Yujto a tas tzyac' Dios, jun 'ejmn̈ej tzyac'a. Man̈xtzac yij 'ec' jun 'ejm xo. A eb' tzyawtj 'och Dios yico'oc, jun 'ejmn̈ej tzyawtj 'och eb' yico'oc.

³⁰ A 'a yic yalan̈, man̈ ex yiclumoc 'a Dios. Al ticnec, tz'o'ch sc'ojl 'ayex, yujto a eb' wit israelal, man̈ yiclumoc pax eb' 'a 'a.

³¹ Yel toni, man̈ yiclumoc eb' israel ticnec. Palta 'ixta tz'aj eb', sec 'oj 'o'ch pax sc'ojl Dios 'a eb', 'icha tzyutj yo'ch sc'ojl 'ayex.

³² A 'a sat Dios, man̈ on̈ yiclumoc qui masnil an̈ 'anman̈ec tic. 'Ixta 'on̈ yutjec, sec wach' jun lajnn̈ej tzyutj yo'ch sc'ojl 'ayn̈ec qui masnil.

³³ A Dios, man̈ jantcoc swach'il, man̈ jantcoc sjelnal. Caw yojcn̈ej smasnil tas. May junc mach tztac' snachj 'el yu'uj, tas tzyutj Dios snan 'el tas tzb'o'o. May pax junc mach tznachj 'el sb'eyb'al Dios yu'uj.

³⁴ 'Icha tzyal 'a Ch'an̈ U'un̈: ¿Toc 'ay junc mach 'oj stac' yojcan 'el snab'en Cajlilec? ¿Toc 'ay junc mach 'oj stac' ya'n snab'enoc?

³⁵ ¿Toc 'ay junc mach tzb'ab'l 'a'j junc tas smajnc Dios, yic tzya'n Dios tzmeltzjoc 'a 'a? xchi.

³⁶ Yujto smasnil tas, an̈j 'a Dios tzcoti. Smasnil tas b'ob'il yu'uj, sec tzcheclj 'el swach'il. Niwn cab' yel'ch Dios 'a smasnil tiempo. 'Ixta cab' tz'aji.