Ro 10 - Chuj San Sebastian Bible

¹ Ex wu'tac, ex wanab', caw tzin nib'j tzcolchj eb' wit israelal. Atn wal jun tic tzin c'an 'a Dios.

² Yel toni, caw 'aych ton snab'en eb' ya'n servil Dios. Palta man̈ yojcoc eb' tas tzyutj eb' ya'w servil 'icha tznib'j Dios.

³ Man̈ yojcoc eb' tas tz'aj eb' yoch wach'l 'a sat Dios. Tznib'j eb' to mun tzya'ch sb'a eb' wach'l 'a sat. Yuj cha, matz chaj 'och wach'l sb'a eb' 'a sat Dios 'a 'icha tznib'ej.

⁴ A Cristo 'a'jnac lajwc yopiso ley yic Moisés. Yujto tzann̈j mach tzya'ch sc'ojl 'a 'a, wach' eb' 'a sat Dios ticnec.

⁵ A Moisés aljnac cani, tas yowlal tzcutjec qui b'a, toto tzqui nib'jec tzon̈ 'ochc wach'l 'a sat Dios yuj jun ley cha. Yaljnac can 'ixtic: Toto 'ay mach c'uxn tzyiclni smasnil tas tzyal ley, 'oj scha sq'uinl yu'uj, xchi.

⁶ Palta 'ay pax junx tzalni, to cojn tzca'c 'och qui c'ojl 'a Dios, ax yalni, to wach'n̈ec 'a sat. Tzyal pax 'ixtic: Man̈ e na 'ixtc 'a e nab'en, ¿mach wal junc 'oj q'ue'chc 'a satcha'an̈? xchi. Tzyal 'el'chi, man̈ e na', mach tz'at 'i'nc 'emt Cristo.

⁷ Tzyaln pax 'ixtic: Man̈ e na', ¿mach wal junc 'oj 'ejmc 'a yol lu'um? xchi. Tzyal 'el'chi, man̈ e na', mach tz'at 'i'nc q'uet Cristo 'a scal eb' chamnac.

⁸ Palta 'ay jun tzaln pax 'ixtic: A jun 'ab'x tic, eyojc xoni, tztac' eyaln yet' e ti'. 'Ayx 'och 'a e nab'en, xchi. A jun 'ab'x tzyal tic, atn jun 'ab'x tzcalc 'eli. A tzalni, to yowlal tzca'c 'och qui c'ojl 'a Cristo.

⁹ Toto tzcalc yet' qui ti', to a Jesús Cajlilec, toto 'a smasnil qui pixnec tzca'c 'och 'a qui c'ojol, to a Dios 'a'jnac pitzwc pax Jesús 'a scal eb' chamnac, to 'ixta', 'oj qui colchjec.

¹⁰ Tzyal Dios to wach'n̈ec 'a sat, yujn̈ej to tzca'c 'och qui c'ojl 'a Cristo yet' smasnil qui pixan. Tzon̈ colchjec, yujto tzcalc yet' qui ti', to a Jesucristo Cajlilec.

¹¹ A 'a Ch'an̈ U'un̈, ata tzyal 'ixtic: A smasnil eb' 'oj ya'ch sc'ojl 'a 'a, may junc eb' 'oj somchjc 'el yu'uj, xchi.

¹² Wach'xam israel on̈ec, wach'xam man̈ on̈ israeloc, lajn on̈c qui masnil 'a sat Dios. Yujto a Cajlilec, Yajl yaj 'a quib'n̈ec qui masnil. Tzann̈j on̈ tzcalc qui b'a 'a 'a, til wal swach'c'ojlal tzyac' 'ayn̈ec.

¹³ Tzyal 'ixtc 'a Ch'an̈ U'un̈: Jantcn̈ej eb' tzyal sb'a 'a Cajlil, c'uxn 'oj colchjoc eb', xchi.

¹⁴ Palta a eb' mantzac ya'ch sc'ojl 'a Cajlilec, ¿tas 'oj yutc eb' yaln sb'a 'a 'a? ¿Tas 'oj yutc eb' ya'n 'och sc'ojl 'a 'a, toto mantzac yab' eb' yab'xil? An̈jtona', ¿tas 'oj yutc eb' yab'n yab'xil, toto may mach tzaln yab'xil 'a eb'?

¹⁵ ¿Tas 'oj yutc eb' 'at yalnc 'el wach' 'ab'ix, toto may mach tzchecn 'at eb'? Yuj cha, tzyaln pax 'a Ch'an̈ Un̈ chi 'ixtic: Til wal sja'l yilxi yic tzjaw junc win alm 'ab'ix, junc 'et'jnac wach' 'ab'ix, [atn yab'xil junc'ojlal], xchi.

¹⁶ Palta man̈ smasnilc eb' tzyiclni jun 'ab'x yic colnb'il tic. 'Icha yaj yaln can Isaías: Mamin, ¿toc 'ay mach xchan 'ab'nc tas 'ix cal on̈? xchi.

¹⁷ An̈ec tic, 'ix cab' jun wach' 'ab'x 'ix alx 'ayn̈ec. Yuj cha, tzca'c 'och 'a qui c'ojol. A jun 'ab'x 'ix cab'c tic, atn yab'xil Cristo.

¹⁸ Palta ¿tas tze na'a? A eb' israel, ¿tom ma'ix yab' eb' jun wach' 'ab'x tic? Ma'ay, c'uxn xyab' eb'. Yujto 'ixtc tzyal 'a Ch'an̈ U'un̈: C'uxn tzpucb't yab'xil 'a smasnil chon̈ab', masnto tzc'och 'a 'aj tzlajw c'och yolyib'n̈q'uinl tic, xchi.

¹⁹ Palta an̈ja ma'ix ya'ch eb' sc'ojl 'a 'a. ¿Tas tze na yuj eb'? ¿Tom ma'ix nachj 'el jun 'ab'x chi yuj eb' israel cha? 'In a Moisés aljnac cani, tas xchi Dios 'a eb', yic yaln can 'ixtic: 'Oj wac' tz'a sc'ojl eb' yic 'oj yilnc eb' wa'n in wach'c'ojlal 'a yib'n̈ junc chon̈b' to man̈ chon̈b'oc yaln eb'. An̈jtona', 'oj in tzuntzc cot yowl eb' yic 'oj in ch'oxnc in wach'c'ojlal 'a yib'n̈ junc chon̈b' to mantzac nachj 'el yu'uj, xchi 'a Ch'an̈.

²⁰ An̈jtona Isaías, ste'wtzej sb'a yalni, tas yaljnac Dios yuj eb' man̈ israeloc, 'a 'aj tzyal 'ixtic: A eb' 'anma man̈ in nanoc yu'uj, a eb' xjaw 'ayin, a eb' matz in c'anb'n 'eq'ui, a eb' 'aj xin ch'ox in b'a, xchi.

²¹ A Isaías cha, yaljnac can paxi tas yaljnac can Dios yuj eb' yit israelal. Yaljnac 'ixtic: An xo tic, smasnil tiempo cob' b'achn 'at in c'ab' 'a jun chon̈b'al eb' 'anma caw pit tic, yic tzcob' wi'nc cot eb' 'ayin, xchi.