Pr 9 - Chuj San Sebastian Bible

Matz chaj sb'a tojlal yet' man̈ nab'enal

¹ 'Icha waychil xwutj wiln jun 'ix, sb'o 'ix jun yatut, caw wach' yilx x'aj yu'uj, xya'n 'och uque yoyal.

² Xlajw cha, smiln cham 'ix jun tzo'n̈ no noc', sb'on wal 'ix tas wach' tzc'uxx 'a jun sq'uin̈, sb'on pax 'ix yal uva to caw wach', sb'on 'ejm smexa.

³ Xlajw cha, schecn 'at 'ix jun tzo'n̈ eb' 'ix schecab', yic tz'at eb' 'awjoc 'a jun tzo'n̈ lugar caw chan̈ yaj chan̈ 'a yol chon̈ab'.

⁴ Xyaln eb' 'ix 'ixtic: Cotn̈ec 'a tic ex quelmtac winc to mant 'a e jelnal, mant 'a e nab'en.

⁵ Cotn̈ec wa'oc, wul 'u'jec jun yal uva 'ix b'o tic.

⁶ 'Actjec can e man̈ nab'enal, sec wach' pitzn exn̈ej; b'eylb'ejc sb'eyb'al eb' 'ay snab'en, xchi eb' 'ix schecb' 'ix cha. A jun 'ix cha, tzyal 'el'chi, atn jelnal.

⁷ Toto tzca'c cuenta eb' b'uchwjum, cojxn tu paxti'al 'oj sc'an eb' yal 'ayn̈ec. Toto tzca'c cuenta eb' maysch'olnil, ton̈j 'oj qui b'ajxec yuj eb'.

⁸ Toto tzqui tenc 'och wan eb' b'uchwjum, 'oj 'och eb' 'ajc'ojlal 'ayn̈ec, palta toto tzca'c cuenta eb' 'ay snab'en, caw 'oj on̈ schamc'ojloquec eb'.

⁹ Toto tzqui cuyc eb' jelan, yel xo caw jeln 'oj 'aj 'el'ch eb'. Toto tzqui cuyc pax eb' wach' snab'en, 'oj wach' tz'acwoc snab'en eb'.

¹⁰ Toto tzqui nib'jec jelnal, yowlal 'ay yel'ch Jehová 'a qui satec. Toto tzqui nib'jec to 'ay qui naben, yowlal tzcojquejec 'el Dios, to Cojxn Niwn Yel'chi.

¹¹ Yuj wal jelnal cha, caw najtl tzon̈ 'e'c 'a yolyib'n̈q'uinl tic, tznajtxb'i wal qui q'uinal.

¹² Toto jeln tzcutjec qui b'a, caw quicn̈ej yaj wach'ilal. Toto b'uchwjum on̈ jun, mun a 'a quib'n̈ec tzcotcni.

¹³ A 'ix 'ix may snab'en, caw amancotn spaxtin 'ix, matz q'uixwi, may tas yojtac.

¹⁴ Ton̈j tz'em wocn 'ix 'a sti yatut 'a junc tzaln 'a yol chon̈ab',

¹⁵ tzyawtn cot 'ix eb' tojl sb'eyb'al tzb'ey 'a b'e.

¹⁶ Tzyaln 'ix 'a eb' 'ixtic: Cotn̈ec 'a tic ex quelmtac winc to mant 'a e jelnal, mant 'a e nab'en.

¹⁷ A wal a a ton̈j tz'el'xi, caw yel xo wal wach' yu'x a'. A jac schib'l wal c'ultac tzc'uxxi, yel xo wach' sc'uxxi, xchi 'ix 'a eb'.

¹⁸ Palta a eb' quelmtac winc cha, toc yojc eb' to a eb' winc 'awtxnac 'at yuj 'ix, to chamncxo eb'.