Pr 8 - Chuj San Sebastian Bible

Wach' paxti yic jelnal

¹ 'Ab'tec, tzex 'awtxi yic tzeyi'n e jelnal, sec tzq'uib' e nab'en.

² Tzann̈j 'aj 'ayx 'ec' 'a lum tzalctac, 'a yoltc b'e yet' 'a 'aj tzchaj sb'a b'e,

³ yet' pax 'a 'aj 'ay spuertail chon̈ab', tzex 'awtx pax ta'.

⁴ E masnil ex 'anma 'a smasnil yolyib'n̈q'uinal, 'ab'ec.

⁵ Ax wal ax tic, ex to mant 'a e nab'en, cuyc wal e b'a 'a jelnal. Yet' pax ex to tu e nab'en, sayc 'ec' pax wach' nab'enal.

⁶ 'Ab'c wal si'mb'il, to 'oj wal jun tzo'n̈ tas caw niwn yel'ch 'ayex, man̈x jantcoc swach'l yalxi.

⁷ A wal tas 'oj wal tic, caw yel, may tas ton̈j 'oj in pitz cha'an̈.

⁸ A smasnil jun tzo'n̈ paxti tic, wach'n̈j smasnil; may 'es 'a scal.

⁹ A eb' jelan, toto tznachj 'el yuj eb', 'oj stac' yojcan 'el eb' jun tzo'n̈ paxti yic jelnal cha, may junc tas to ma'oj nachjoc 'el yuj eb'.

¹⁰ 'A'c eyip e cuyn jelnal, yet' wach' nab'enal 'a yib'n̈ to a q'uen plata, mto q'uen oro to yel xo wach' tze sayq'ui.

¹¹ Yel xo wal wach' jelnal 'a yib'n̈ jun tzo'n̈ q'uen q'uen chan̈ stojol, yet' 'a yib'n̈ smasnil tas tznib'x 'ochi.

¹² A jelnal yitb'eym sb'a yet' wach' nab'enal. Tzyac' nachjoc 'el cujec sec wach' tzcutjec qui b'eyc'ojlwi.

¹³ Toto 'ay yel'ch Jehová 'a qui satec, yowlal tzquijec 'el qui b'a 'a scal maysch'olnil. Toto jeln on̈ec, man̈ qui b'an̈c qui b'a, man̈ qui'c chan̈ qui b'a, man̈ qui b'oc tas tu', man̈ ca'c pax 'es.

¹⁴ Toto 'ay qui jelnalec, tztac' qui nanec junc tas 'a swach'il, tz'el'chn̈ej tas tzqui b'o'ec.

¹⁵ Yuj sjelnal eb' rey, tzya'n eb' yajlil, ax yic tzya'n eb' yajlil cha, a ley tojol, a tzc'anlb'ej eb'.

¹⁶ Toto jeln eb' 'aych yajlil cha, caw tztac' stan̈wni eb' schon̈ab', wach' tzyutj eb' sb'on yaj eb' 'anma'.

¹⁷ A eb' tznib'j cuync jelnal, tz'ilchj yuj eb', ax eb' tznib'n jelnal cha, tz'ijx chan̈ eb' yu'uj.

¹⁸ Yuj jelnal, tz'och junc mach ricoal, caw wal tzb'inaxi, 'ay pax yel'chi.

¹⁹ A jelnal, yel xo wal wach' 'a yib'n̈ q'uen oro yet' q'uen plata to wach' yaj sb'o'i.

²⁰ Yuj jelnal, yuj cha 'ayn̈ec 'och 'a jun b'e yic tojlal.

²¹ A eb' tzalj yet' jelnal, caw rico eb' yu'uj; caw 'oj b'ut'joc yol yatut eb' yuj tas 'ay 'a 'a.

^22-26 A Jehová, a b'ojnac can jelnal yic mantzac 'el yich smunlji, yic mantzac b'o smasnil tas, yic mantzac b'o lum lum tic; yic mant 'a a niwc mar, yic mantzac can sjaj a niwc a tzb'eyi, yet' eb' a cotc a tzpaq'ui; yic mantzac b'o lum tzalctac yet' lum niwc witz, yic mantzac sb'o lum lum tic, yic mant 'a xon spoccal yolyib'n̈q'uinl tic, 'ayc' xon jelnal chi ta'.

²⁷ A wal yic sjen̈n 'ec' Dios satcha'an̈ masnto 'a 'aj tzchaj sb'a yet' a niwc mar, 'ayc' xon jelnal chi ta'.

²⁸ A yic sb'on can 'och Dios 'asn 'a satcha'an̈, yic sjacn can sjaj a mar,

²⁹ yic xyaln can 'a a mar cha, chajtlto matz 'el a 'a smon̈jonal, yic xya'n can 'och sb'achnub'al yaln̈ lum lum tic, 'ayc' xon jun jelnal cha.

³⁰ A yet' jelnal 'ix sb'o Dios smasnil tas, caw tzalj yiln 'ochi, yujto a tzch'oxn 'el sjelnal.

³¹ 'Ix tzalj yuj yolyib'n̈q'uinl tic, 'ix tzalj pax yuj eb' 'anma sb'ojnac.

³² A ticnec ex wunnal, 'ab'c wal tas 'oj alxoc 'ayex, b'eylb'ejc jelnal sec 'ayn̈j e tzaljc'ojlal.

³³ Chajec eyab' cuynb'il; man̈ e patquilc can 'el jelnal.

³⁴ Caw wach' yic eb' tzchan 'ab'nc paxti yic jelnal.

³⁵ Yujto a eb' tz'ilchj jelnal yu'uj, tz'ilchj pax sq'uinl eb' yu'uj, 'oj scha eb' swach'c'ojlal Jehová.

³⁶ A pax eb' matz chan 'ab'nc paxti yic jelnal, mun a eb' tzyij cot yailal 'a yib'an̈. A eb' tzpatquiln can 'el jelnal, a chaml wan yi'n cot eb' 'a yib'an̈.