Pr 7 - Chuj San Sebastian Bible

¹ Ach wunnal, chaj wal ab' in cuynb'il, molcn jun tzo'n̈ in checnb'il tic 'a a nab'en.

² Yiclj jun tzo'n̈ in checnb'il yet' in cuynb'il tic; 'icha tzotj a ya'iln sc'ul yol a sat, 'ixta tzotj eb', sec 'ay a q'uinal.

³ Nab'iln̈ej cab' eb' o'oj, tza moln can wal eb' 'a a nab'en.

⁴ Tzaljan̈ yet' jelnal yet' wach' nab'enal, 'icha tzotj a chamc'ojlan anab' mto junc a wach'c'ojol, 'ixta tzotj eb'.

⁵ 'Ixta 'oj aj a colchj 'el 'a yol sc'ab' 'ix 'ajmul 'ix, atn 'ix 'ay yichmil, 'ix to man̈x jantcoc sja'l smontn paxtinc sb'a.

A 'ix 'ix tzb'o 'ajmulal

⁶ 'Ay jun 'ejem, q'ueln in 'elt 'a swentnual watut.

⁷ 'Ay jun tzo'n̈ quelmtac winc may sjelnal. 'Ix cham wal wiln jun win quelm yel xo may jac snab'en 'a scal eb' cha.

^8-9 A yic yemc'ul xo, yic wan sq'uic'b' cha'an̈, 'ix 'e'ch win 'a jun 'isquinyo. 'Ix sc'axptan 'ec' jun caye tz'ec' 'a stojlal 'aj 'ay yatut jun 'ix 'ajmul 'ix 'ay yichmil.

¹⁰ Yajn̈j wal cha, x'elt jun 'ix chi wul scha win muc'uc. 'Icha wal spichn sb'a junc 'ix 'ajmul 'ix, 'ixta yilx 'ix yet' spichul, 'ixta pax snab'en 'ix.

¹¹ Tzcomn paxtini tz'eq'ui, matz q'uixw 'ix jab'oc, matz 'och wan 'a yatut.

¹² Cojn 'a yoltc caye tz'eq'ui, 'a yoltc chon̈ab' yet' pax 'a junjn yisquinyoal caye cha, yic tztan̈wni yec' junc winc 'a stz'ey.

¹³ A jun 'ix cha, yajn̈ej x'och la'njoc 'a jun quelm cha, stz'ub'n 'elt 'ix sti winac, caw may jac sq'uixwc'ojlal. Yajn̈ej 'ix yaln 'ix 'a win 'ixtic:

¹⁴ A ticnec, 'ix wac' in xajmb'al yic junc'ojlal to ta'wb'ilx wu'uj, caw 'ay chib'j 'a watut ticnec.

¹⁵ Yuj cha, in 'elt wul ach in cha'. Caw tzin nib'j xon tzach wila. Al ticnec, tic wal ach 'ilchj wu'uj.

¹⁶ A 'a sat in ch'at, tox 'ix in b'o 'ejm jun sábana nab'a lino cotnc 'a Egipto.

¹⁷ Tox xwa'ch perjuma 'a 'a, caw su'q'ui yec' sjab'. A te mirra, te áloe yet' te canela a xwa'ch 'a 'a.

¹⁸ Con̈ wet'oc, 'oj qui lajch qui chamc'ojlal 'ayn̈ junjn on̈. Cac' wal qui gana yet' jun chamc'ojlal cha, masnto 'oj sacb'oc.

¹⁹ Yujto a win wichmil, may win 'ayc' a watut, 'ix 'at win yac' jun schecnb'il 'a caw najat.

²⁰ 'Ix yij 'at win jun mucuc q'uen tumin. Yuj cha, mant 'oj meltzjoc winac, masnto 'a yic c'ojn 'uj, ax sjapx winac, xchi 'ix.

²¹ Yuj wal jun tzo'n̈ spaxti 'ix man̈x sja'loc smontw cha, yuj cha, yajn̈ej 'ix 'em 'a sc'ojl win quelm cha.

^22-23 'Icha wal tz'aj yijx 'at junc no wacx 'aj tzmilx chamoc, 'ixta 'ix 'aj yoch tza'n win yuj 'ix. Matz na winac toto ata tz'e'cn sq'uinal. 'Icha junc no c'ultquil chej tzcan 'a ya'al, masnto tz'ec' junc jul-lab' 'a spixn no', mto 'icha pax junc no ch'ic tzalj cob' sc'och 'a 'aj 'ay junc ch'an̈ ya'al, 'ixta 'ix 'a winac.

²⁴ Yuj chi ach wunnal, 'ab' wal jun tzo'n̈ nab'en 'oj wala', maclj wal ab' in paxti'.

²⁵ Man̈ ac' juwc 'el a nab'en yuj junc 'ix 'ix 'ixta snab'en cha, sec wach' ma'oj a satl yuj 'ix.

²⁶ Yujto niwn xo eb' xyac' lajwc 'ix; niwn xo eb' tox 'ix cham yuj 'ix.

²⁷ Toto tzach 'at 'a jun b'e tzc'och 'a yatut 'ix cha, 'icha to wan a 'atcn 'a jun b'e yic chamel.