Pr 6 - Chuj San Sebastian Bible

'Ay smay tzon̈ 'och fiadoral

¹ Ach wunnal, toto tza'ch a b'a fiadoral yuj junc mach, atn junc chuc 'anma'il,

² a jun cha, lajn yet' junc ya'al. Mun ach tza'ch a b'a 'a yalan̈. 'Oj cot 'a eb'n̈ yuj jun tzo'n̈ a paxti cha.

³ Ach wunnal, 'ixtc wal tzotj a coln 'el a b'a 'a yol sc'ab' junc et 'anmal cha: Tz'at ec' 'ejm a b'a 'a 'a, tza'n pural ya'n can pax junc smajn chi 'aj 'ix ac' a b'a fiadoral yuj cha.

⁴ Man̈ ach way a nani tas tz'aji, man̈ ach 'iljoc xon a coln a b'a

⁵ masnto tzach 'el 'a yalan̈, 'icha tz'aj yel e no c'ultquil chej 'a eb' ma'm noc'. 'Ij 'el a b'a 'a 'a, 'icha tz'aj yel e no ch'ic 'a junc ya'al.

Cuynb'il 'a eb' 'isaj

⁶ Ex 'isaj, 'iltec e no san'ich; tzcham wal eyoch q'ueln 'a tas tzb'o e no', tzcham e cuyw 'a spatquil e no'.

⁷ Wach'xam may mach tzjucb'tzan e no', may pax mach tzaln 'a e no' tas wach' sb'on e no',

⁸ palta tzmolcn e no tas tzc'ux 'a yic stiempoal. A wal yic 'elnc tas tzc'ux e no cha, tzmoln can e no'.

⁹ ¡Colb'ilx e way chi 'ex 'isaj! Colb'ilx eyaj'c teln e way cha.

¹⁰ Ya' sb'a tzex way cha, tzlaj necnecn e jolm yuj e wayn̈ cha, jeltz'm tzeyutj e c'ab', man̈x jantcoc sja'l e wayi,

¹¹ ax 'oj 'ajoc, 'oj jawc meb'a'il 'a eyib'an̈, 'icha sjaw junc 'elc'm 'et'jnac syamc'ab' yic owal, 'ixta 'oj 'aj sjaw meb'a'il cha.

Sb'eyb'al eb' maysch'olnil

¹² A eb' maysch'olnil snab'en, cojn 'es tzlaj 'ec' yal eb' 'a scaltc n̈a,

¹³ tzmutz'mutz'n sat eb', tzch'oxn eb' yet' yoc, tzch'oxn pax eb' yet' yune sc'ab'.

¹⁴ Jun 'ejmn̈ej to caw tu snab'en eb'. Cojxn̈ej maysch'olnil nab'il yuj eb'. Cojxn owl tzlaj yi' chan̈ eb' 'aj tzlaj 'eq'ui.

¹⁵ Yuj cha, caw yajn̈ej ax sjaw yailal 'a yib'n̈ eb'. Wal 'a jun mutz'satil ax slajw 'ejm eb', man̈x 'a wach' 'oj yutc sb'a eb'.

A b'eyb'al tzyajx 'el yuj Jehová

^16-19 'Ay uc c'aj tas matz chaj sc'ojl Jehová: Atn b'an̈quinal, 'a'j 'es, milj cham 'anma may smul, naj chan̈ paxti man̈ wach'oc, b'oj maysch'olnil 'a yajn̈ej, 'a'j 'och 'es 'a yib'n̈ junc xo mach, pitzj chan̈ owl 'a scal eb' yit 'anma'il.

A tas tz'aj 'el'ch 'ajmulal

²⁰ Ach wunnal, molcn jun tzo'n̈ in checnb'il tic 'a a nab'en, yet' cuynb'il tzyac' a nun.

²¹ Molcn 'a a nab'en, caw man̈ ac' sat a c'ojl 'a 'a.

²² A 'oj e'n b'eyc' 'a 'aj 'oj eq'ui. A 'oj a tan̈wni 'a yic 'oj a waycn 'ejmi, ax yic 'oj 'elx a wayan̈, an̈ja nann̈ej cab' jun tzo'n̈ tic o'oj.

²³ Yujto a jun checnb'il tic yet' jun cuynb'il tic, lajn wal eb' 'aych 'icha junc cantil 'aych sc'aq'uil. A tennb'il yet' wach' nab'enal, a tzach 'i'n 'at 'a jun b'e yic q'uinal.

²⁴ A 'oj a coln 'el 'a yol sc'ab' 'ix 'ix to tu snab'en, atn 'ix 'ix 'ay yichmil to man̈x jantcoc sja'l smontn paxtinc sb'a.

²⁵ Man̈ a nib'c 'och swach'l yilx 'ix. Man̈ ac' somchjoc a nab'en yuj tas tzach yutj 'ix ach yiln 'ochi.

²⁶ A mach tzmuln yet' 'ix 'ajmul 'ix, tzcot meb'a'il 'a yib'an̈; palta ax mach tzmuln yet' 'ix 'ay yichmil, tztac' scham yuj smul cha.

²⁷ Q'uinloc 'ay junc mach tzyij 'at c'ac' 'a sn̈i sc'ojol, ¿tom ma'oj tz'a spichl yu'uj?

²⁸ A mach tzb'ey 'a yib'n̈ stza c'ac', caw tz'a yoc yuj jun c'ac' cha.

²⁹ 'Icha jun tzo'n̈ tic, 'ixta tz'aj junc mach tzmuln yet' yistzil junc xo winac, yowlal tzjaw yailal 'a yib'an̈.

³⁰ A mach tz'elc'wi, 'ayt wal niwnc'ojlal 'a 'a, toto yuj wejel tz'elc'w cha.

³¹ Wach'xam 'ixta', palta toto tzyamchji, yowlal uc 'ejm tzyutj sjeln tas tzyel'j cha, toxn̈ej to man̈x 'a tas tzcan 'a yatut.

³² Palta ax junc mach tzb'on 'ajmulal yet' 'ix 'ix 'ay yichmil, yel xo wal may jac snab'en. A wal mach tzb'on 'ixta', mun tzyij cot yailal 'a yib'an̈.

³³ Caw wal 'oj scha yailal, ax sma'xi, man̈x 'oj sat sc'ojl eb' 'anma 'a sq'uixwelal cha.

³⁴ A win winc x'ixtx yistzil cha, caw ow win 'icha te c'ac', matz yac' win niwnc'ojlal 'a yic tzc'och sc'ul spacn sb'a.

³⁵ Matz chaj win siylab' tzyac' mach tz'och smul cha, matz sicb' xon jac yowl sc'ojol, wach'xam caw niwn siylab' tz'ajx 'a winac.