Pr 5 - Chuj San Sebastian Bible

Tzjuw 'el sb'eyb'al*r* win winc yuj 'ix 'ajmul 'ix

¹ Ach wunnal, chaj wal ab' in jelnal tic, maclj wal ab' in wach' nab'enal,

² sec 'ixta 'oj 'aj snachj 'el o'oj, ax sta'n a paxtin yet' a jelnal.

³ 'Ay 'ix 'ix 'ay yichmil, caw wach' spaxtin 'ix. 'Icha schil no yal chab', 'ixta spaxti 'ix cha. Caw c'un tzyutj 'ix yol sjaj smontn paxtinc sb'a,

⁴ palta ax 'a slajub', lajn 'ix 'icha sc'al te 'ixaj, 'icha tzon̈ 'aj qui lajw yuj q'uen espada chab' ye.

⁵ Toto jun tzach 'ec' yet' 'ix, 'oj ach yi't 'ix 'a chamel; a jun sb'e 'ix cha, tojl sc'och 'a chaml cha.

⁶ A 'a 'ix 'ix cha, may yel'ch jun b'e yic q'uinal, mayn̈j tas tzna 'ix, toto wach' jun sb'e 'ix cha, mto man̈ wach'oc.

⁷ Yuj cha, ach wunnal 'ab' wal tas 'oj wala'. Man̈ e'l a b'a 'a in cuynb'il tic.

⁸ 'Ij 'el a b'a 'a stz'ey 'ix 'ix 'ay yichmil cha. Man̈ ach c'och 'a stz'ey sti smac yatut 'ix,

⁹ yic wach' matz satl a b'inaxi, sec man̈oc 'a yol sc'ab' junc 'anma to may sniwnc'ojlal 'aj 'oj a chami;

¹⁰ sec man̈oc junc xo 'anma chi 'oj 'och ricoal yuj a munljel 'ix a b'o yet' smasnil ep.

¹¹ Ax 'oj 'ajoc, toxn̈ej 'oj o'cn 'eq'ui, jab'jnal xoj 'oj 'aj sat 'ejm a niwnal.

¹² Ax to cob' alnc 'ixtic: ¿Tas wal yuj in spatquilj can 'el tennb'il yet' wach' nab'enal?

¹³ Ma'ix in chaj wab' tas xyal eb' in cuyni, ma'ix yal in c'ojl tas xyal eb',

¹⁴ yuj cha, ticnec caw wal tzin q'uixw 'a sat eb' chon̈b' smasnil, 'oj a chioc.

¹⁵ Yuj cha, cojn cab' 'a 'ix estzil 'aj tza'ch a nab'en, 'ac' a gana yet' 'ix.

¹⁶ May cab' onnal tz'el 'a eb' 'ix 'ix tz'ec' 'a yoltc b'e yet' 'a plas.

¹⁷ A eb' onnal, yet' eb' esil, ec cab' yaj eb' a ch'ocoj, may cab' junc xo chuc 'anmal 'ay yic eb' et'oc.

¹⁸ Alx cab' wach' paxti 'a 'ix estzil. 'Ac' tzaljoc a c'ojl yet' 'ix estzil ejnac a b'a yet' 'a yic a quelmal.

¹⁹ Wach'n̈j cab' yilx 'ix 'a a sat; 'icha cab' wal yilx junc no c'ultquil chej. May cab' tz'aj slajw a chamc'ojlal 'a 'ix. 'Ay cab' 'a tzaljc'ojlal yuj schamc'ojlal 'ix 'ayach.

²⁰ Ach wunnal, man̈ ac' somchjoc a nab'en yuj junc 'ix 'ajmul 'ix. ¿Tas yuj tza'ch a b'a 'a yol sc'ab' junc 'ix 'ayx yichmil?

²¹ Yujto a Jehová wan yiln sb'eyb'al junjn mach, tzyil tas tzb'o'o.

²² A eb' maysch'olnil sb'eyb'al, mun a smaysch'olnilal eb' chi 'oj 'i'nc 'ejmi; mun a smul eb' chi 'oj jalnc 'ejm 'icha junc lasu.

²³ Yujto matz yamch wan sb'a eb', yuj cha, ax s'atcn eb' 'a chamel; yuj sman̈ nab'enal eb', ax satcn 'el eb', xchi in mam 'ayin.