Pr 4 - Chuj San Sebastian Bible

A tas wach' tzyac' jelnal

¹ Ex wunnal, chajec eyab' tas 'oj wala'; macljec eyab'i', sec wach' 'oj eyutc e b'eyb'al.

² A cuynb'il wach' tzwal 'ayex, caw wal tzeya'ilej.

³ A yic quelm in 'unin yic 'aynto 'ec' 'a yol yatut in mam, yel xo wal chamc'ojlb'iln yuj in nun.

⁴ Caw tzin scuy in mam cha, tzyaln 'ayn 'ixtic: Molcn jun tzo'n̈ in cuynb'il tic 'a a nab'en, yiclj jun tzo'n̈ tzwal tic sec 'oj najtxb'oc a q'uinal.

^5-6 'Ij a jelnal yet' a wach' nab'enal, man̈ ac' sat a c'ojl 'a jun tzo'n̈ in cuynb'il tic. Man̈ actc a b'eylb'ani, to 'ixta', may tas 'oj e'ni. Tzaljan̈ yet' jelnal, man̈ a patquilc can 'eli, yu'uj ax a colchj can 'eli.

⁷ 'Ac' ep a sayn 'ec' jelnal, yujto 'ec'b'al yel'ch 'a yib'n̈ smasnil tas. Yet' smasnil a c'ojol, tza'n 'och a nab'en 'a 'a.

⁸ Tzaljan̈ yet' jelnal sec 'oj ejx chan̈ yu'uj; nib'j 'ochi sec 'ay el'ch pax 'a sat eb' et 'anma'il.

⁹ Yuj jelnal cha, ax yalx wach' paxti 'ayach, 'icha to 'oj 'ajxoc q'ue junc corona caw wach' yilx 'a a jolm yu'uj.

¹⁰ Ach wunnal, chaj wal ab' jun tzo'n̈ in cuynb'il tic, sec 'oj najtxb'oc a q'uinal.

¹¹ An 'oj ach wi't 'a jun b'eyb'al yic jelnal, a wal jun b'eyb'al caw wach', a 'oj wac' a b'eylb'oc.

¹² A 'a jun b'eyb'al cha, may tas 'oj a tenn 'och wa'an, wach'xam 'oj 'ac' 'ip a b'eylb'ani, palta may 'oj e'ni.

¹³ 'A'ch a nab'en 'a jun cuynb'il tic, man̈ actc cani; yelc'ojlal tza b'eylb'ej, yujto a 'oj 'a'nc a q'uinal.

¹⁴ Man̈ ach 'och tza'n yuj eb' maysch'olnil sb'eyb'al, man̈ a b'eylb'oc sb'eyb'al eb' cha.

¹⁵ Man̈ ach 'och 'a scal eb', 'ij 'el a b'a 'a stz'ey eb', 'ac' ep a b'ey 'a stojlal.

¹⁶ A eb' maysch'olnil cha, caw matz way eb' toto matz b'o eb' stu'al, matz cot swayn̈ eb', toto may mach tzyixtj eb'.

¹⁷ Caw tznib'jn̈ej eb' sb'o maysch'olnil 'a yit 'anma'il, 'icha qui nib'n wa qui b'a.

¹⁸ A eb' tojl snab'en, a swach' b'eyb'al eb', caw tzq'ue'ch 'icha yic tzq'uel c'u 'a yic tzsacb'eli, masnto tzowb' yoc c'u cha.

¹⁹ Palta ax eb' maysch'olnil cha, a sb'eyb'al eb', lajn wal 'icha q'uic'q'uinal, yuj cha, matz yil eb' 'aj tztench eb' yoc.

²⁰ Ach wunnal, chaj ab' in cuynb'il tic, maclj wal ab'i'.

²¹ Man̈ ac' sat a c'ojl 'a 'a, to tza molcn wal 'a a nab'en,

²² yujto a jun tzo'n̈ cuynb'il tic, a tz'a'n sq'uinl smasnil eb' tz'ilchj yu'uj.

²³ Tza ya'ilj a nab'en 'a yib'n̈ smasnil tas 'ay 'a yolyib'n̈q'uinl tic, yujto a 'a nab'en cha, a tzach 'i'n b'ey 'a swach'il mto 'a stu'al.

²⁴ Man̈ a'ch a b'a 'a'm 'esal, 'actj can aln jun tzo'n̈ cha.

²⁵ Yelc'ojlal tza b'eylb'ej stojlal yet' wach' nab'enal, man̈ ach 'at q'ueln 'a tas maysch'olnil.

²⁶ Si'mb'il wal tza na tas tza b'eylb'ej, man̈ comnoc tzach 'at 'a scal maysch'olnil.

²⁷ Man̈ e'l a b'a 'a jun b'e yic tojlal, palta 'ij 'el a b'a 'a jun b'e yic maysch'olnil.