Pr 31 - Chuj San Sebastian Bible

Spaxti win Lemuel

¹ A spaxti win rey Lemuel, caw wal niwn yel'chi. A 'a jun tzo'n̈ paxti tic 'aj cuyb'il win yuj snun. Yaljnac 'ix 'a win 'ixtic:

² Ach wune', a Dios ach 'a'n 'ayin, yuj spac tas xin c'an 'a 'a.

³ Man̈ ac' juwc 'el a b'a yuj eb' 'ix 'ix; yujn̈ej eb' 'ix, til wal ewin rey tzjuw 'el sb'eyb'al.

⁴ Ach Lemuel, man̈ wach'oc toto 'oj oc' te 'an̈ caw ow. Man̈ smojc pax yu'n eb' et yajlil te 'an̈ cha,

⁵ axta laj x'aji, tz'at satc'ojlal ley eyu'uj. Toq'ue yuj cha, ax eyixtn eb' 'anma 'emmquilal yeq'ui.

⁶ A cab' eb' 'aych 'a syailal tz'u'n te 'an̈ cha, eb' 'aych 'a somc'ojlal,

⁷ sec 'oj sat sc'ojl eb' 'a tas tzyutj sb'a. Man̈x 'oj sna cot eb' smeb'a'il yet' syailal.

⁸ 'Ac' a b'a yuj eb' matz uj yaln sb'a; colwjan̈ 'a eb' may mach tzcolni.

⁹ 'Ac' ep a b'onyaj eb' 'a stojlal; col eb' meb'a', yet' eb' 'emmquilal yeq'ui, xchi 'ix 'a winac.

A 'ix 'ix wach' snab'en to c'asn paxi

¹⁰ A 'ix 'ix wach' snab'en to c'asan, man̈ comnoc tz'ilchj 'ix; yel xo wal niwn yel'ch 'ix 'a yib'n̈ q'uen q'uen caw chan̈ stojol.

¹¹ Caw wal yipc'ojlal yaj 'ix yuj yichmil, may 'aj tzap tas 'ay tz'och yuj 'ix 'a yet'ul.

¹² Tzaljc'ojlal yaj yichmil 'ix yuj 'a smasnil tiempo.

¹³ Tz'at 'ix sman lana, yet' te lino ch'al; yet' wal smasnil sc'ojl 'ix tzch'alw 'ix.

¹⁴ 'Icha junc te barco najt tzyij cot chon̈, 'ixta 'ix, caw najt tzsay cot 'ix tas 'ay tz'och yu'uj.

¹⁵ A yic 'ayt sacb'i tzq'ue wan 'ix, tzlaj ya'nc wa 'ix eb' yune', yet' eb' 'ix schecb' cajb'il yu'uj.

¹⁶ Tz'at yilcn 'ix junc lum yet' sat, 'ixta to b'i'an tzmanni, ax stumn tzyac' ganar cha, a tzya'lb'ej yic tz'awx 'ejm yuva.

¹⁷ Caw tzb'o sb'a 'ix, caw wal tzyac' 'ix yip smunlji.

¹⁸ Tzcham wal yiln tas tz'aj sb'ey schon̈, sc'ual yac'wlil smunlji.

¹⁹ Tzch'alwi, tzjalw paxi.

²⁰ Caw wal 'ela 'a eb' meb'a', yet' 'a eb' 'ay tas sc'a'l tz'och yu'uj.

²¹ A yic tzya'n si'ic, matz 'och 'il yuj eb' yune', yujto caw wach' yajch spichl eb'.

²² Mun tzb'o 'ix sc'u tzc'u'ej; a wal pichl caw wach' a tzya'chi, tzb'o 'ix yet' te ch'al púrpura mto lino.

²³ A win yichmil 'ix cha, caw wal 'ojcab'il win si'mb'il yuj eb' yajl 'a schon̈ab', 'aych win stz'acb'oc eb' niwc winc 'a yol schon̈b' cha.

²⁴ Tzb'o 'ix pichul yet' jalul, ax 'a eb' chon̈m nip, axta tzlaj schon̈ 'ix.

²⁵ Caw te'n yaj 'ix, niwn yel'ch 'ix 'a sat eb' 'anma', toc 'ay tas tzna 'ix yuj tas 'ay tz'och yuj 'a smasnil tiempo.

²⁶ Caw wal jeln spaxtini, yet' wal schamc'ojlal tzcuywji.

²⁷ 'Aychn̈ej 'ix yiln tas sb'ey yol yatut, may 'ajtil ton̈j tz'ec' tiempo yuj 'ix.

²⁸ A eb' yune 'ix cha, yet' win yichmil 'ix, tzyal eb' wach' paxti yuj 'ix, tzyaln eb' 'a 'ix 'ixtic:

²⁹ Til wal eb' 'ix 'ix caw wach' sb'eyb'al, palta cojn ach tic, yel xo wal wach' a b'eyb'al 'a yib'n̈ eb' 'ix 'ix smasnil, xchi eb'.

³⁰ A eb' 'ix 'ix wach' yilx yet' sniwnal, 'ay 'ajtil ton̈j montnub'l yaj eb' 'ix. A swach'l yilx sat eb', yajn̈ej tzjelmj yilxi, palta a 'ix 'ix to 'ay yel'ch Jehová 'a sat, smoj wal to niwn yel'ch 'ix.

³¹ Calc wach' paxti 'a 'ix 'a sat smasnil 'anma'; alx cab' wach' paxti 'a 'ix yuj smasnil tas tzb'o'o.