Pr 3 - Chuj San Sebastian Bible

A tz'aj yi'n junc mach sjelnal

¹ Ach wunnal, man̈ ac' sat a c'ojl 'a jun tzo'n̈ in cuynb'il tic, molcn jun tzo'n̈ in checnb'il tic 'a a nab'en,

² sec 'oj najtxb'oc a q'uinal, caw tzaljc'ojlal 'oj eq'ui.

³ Man̈ actc can a b'eylb'an chamc'ojlal yet' yiclumal, molcn wal 'a a nab'en, man̈ ac' sat a c'ojl 'a 'a.

⁴ Toto 'ixta', caw tzalj Dios et'oc, ax ach sb'inan pax eb' 'anma'.

⁵ Yet' wal smasnil a c'ojol, tza'n 'och a nab'en 'a Jehová, man̈ a'ch a jelnal yipc a c'ojol.

⁶ Na cot Jehová yet' smasnil tas tzlaj a b'o', sec a 'oj e'n 'at 'a jun wach' b'eyb'al.

⁷ Man̈ a na', chajtlto caw yel xo jeln ach; 'ay cab' yel'ch Jehová 'a a sat, 'ij 'el a b'a 'a scal maysch'olnil.

⁸ Toto 'ixta', a Jehová 'oj 'a'nc a tzatzil, ax ya'n ste'nal a niwnal.

⁹ 'Ac' yofrendail smasnil tas 'ay 'ayach, yuj e'n chan̈ sb'i Jehová. Tza'n pax yofrendail sat awb'en tzb'ab'l 'el-li.

¹⁰ Toto 'ixta', 'oj b'ut'jc a c'un̈a yuj sat awb'en cha, caw 'oj b'ut'joc pax yet'l yal a uva.

¹¹ Ach wunnal, a yic tzach ya'n cuenta Jehová, man̈ a na' to may yel'chi. Man̈ ach tzactzjoc, yic tzach stenn 'och wa'an.

¹² Yujto a eb' chamc'ojlbil yuj Jehová, caw tzyac' cuenta eb' 'icha wal tzyutj junc mamb'il ya'n cuenta yunnal to tzalj yet'oc.

¹³ Caw tzaljc'ojlal yic junc mach tzyij sjelnal, tzq'uib' pax snab'en.

¹⁴ Yujto yel xo caw wach' jun chi 'a yib'n̈ q'uen plata, 'ec'b'alto swach'l 'a yib'n̈ q'uen oro.

¹⁵ A jelnal cha, yel xo wal 'ec'b'al yel'ch 'a yib'n̈ q'uen q'uen man̈x jantcoc sja'l yilxi, matz tac' slajb'tzax yet' jun tzo'n̈ tas caw wal nib'b'il.

¹⁶ Toto tzqui b'eylb'ej jelnal, tznajtxb'i qui q'uinal, tzon̈ 'och ricoal, caw niwn tzon̈ 'aj 'el'ch yu'uj.

¹⁷ Toto tzqui b'eylb'ej jelnal, caw tzaljc'ojlal tzon̈ 'eq'ui; 'ay pax qui junc'ojlal yu'uj.

¹⁸ Toto tzqui b'eylb'ej jelnal, caw wal 'ay qui q'uinl yu'uj, caw tzaljc'ojlal quico', toto tzqui molcn jun jelnal chi 'a qui nab'en.

¹⁹ A yet' sjelnal, yet' swach' nab'enal Jehová, 'ix sb'on satcha'an̈, yet' lum lum tic.

²⁰ Yuj sjelnal cha, tzpac' q'uet eb' a a', tzcot pax n̈ab' 'a scal 'asun.

²¹ Ach wunnal, man̈ ac' sat a c'ojl 'a a jelnal yet' 'a a wach' nab'enal, man̈ e'l a sat 'a 'a.

²² Toto 'ixta, 'oj najtxb'oc a q'uinal, caw wach' 'oj el'ch 'a sat eb' 'anma'.

²³ Caw junc'ojlal 'oj eq'ui, may tas 'oj e'ni.

²⁴ A yic 'oj elji, may junc tas 'aj 'oj a xiwi, caw tzaljc'ojlal 'oj a wayi.

²⁵ Ma'oj a xiwi, toq'ue tza na'a to 'ay junc tas 'ay smay 'oj jawc 'a eb'n̈ 'icha tz'aj sjaw 'a yib'n̈ eb' maysch'olnil sb'eyb'al.

²⁶ Yujto a Jehová tza'ch yipc a c'ojol, ma'oj ach scha 'ejm yuj junc ya'al.

²⁷ Man̈ a b'asc junc tas 'a junc mach tznib'j tzach colwj 'a 'a. Toto 'ay tas 'ay 'a yol a c'ab' tzela, 'ac' 'a jun cha.

²⁸ Toto tztac' a colwj xon 'a mu'c tzela, man̈ al 'a jun et 'anmal chi 'ixtic: Paxan̈, at q'ui'n tzwac' 'ayach, man̈ xa chioc.

²⁹ Man̈ a na a b'on junc tu nab'enal 'a junc et 'anmal tzaljc'ojlal cajn 'a a tz'ey.

³⁰ Man̈ ac' owl yet' junc mach, toto may tas tu tzyutj 'ayach.

³¹ Man̈ a nib'c 'och ricoal 'icha tzyutj sb'a eb' matz 'o'ch sc'ojl 'a yit 'anma'il, man̈ ach 'och tza'n 'a sb'eyb'al eb' cha.

³² Yujto matz tzchaj sc'ojl Jehová eb' maysch'olnil snab'en, palta ax eb' wach' sb'eyb'al, caw tzalj yet' eb'.

³³ Tzya' cot Jehová catb' 'a yib'n̈ eb' maysch'olnil, palta ax eb' wach' sb'eyb'al, a yaxilal tzya' cot 'a yib'n̈ eb'.

³⁴ A Dios tzchac sb'a yet' eb' b'an̈quintac yeq'ui, ax 'a eb' 'emmquilal yeq'ui, tzyac' swach'c'ojlal 'a eb'.

³⁵ A eb' tzb'eylb'an jelnal, caw 'oj 'ijxoc chan̈ eb', ax eb' matz b'on wach' nab'enal, 'oj q'uixwc can 'el eb'.