Pr 29 - Chuj San Sebastian Bible

¹ A mach pit tzyutj sb'a, wach'xam niwn 'ejm tz'ajx cuenta, a jun cha, caw ji'lti 'oj 'aj slajw 'eli, man̈x 'oj stac' scoln sb'a.

² A yic tz'och eb' tojl snab'en 'a yopiso, caw wal tzalj eb' 'anma'; palta a yic tz'och eb' maysch'olnil yajlil, caw wal tzcus eb' 'anma cha.

³ A junc 'unnab'il wach', tzyac' tzaljoc sc'ojl smam. Ax junc to a yet' eb' 'ix 'ajmul 'ix 'aj tz'och tzac'an, caw wal tzlajw 'ejm stumin.

⁴ A junc yajl wach' tzyutj sb'eyc'ojlwi, caw wach' yaj schon̈b' cha; palta a junc yajl cojn c'anj 'el tumn tzb'o'o, caw wal tzlajw 'ejm jun chon̈b' chi yu'uj.

⁵ A mach ton̈j tz'ac yal wach' paxti 'a junc yit 'anma'il, wan ya'n 'ejm ch'an̈ yal 'a yojltac jun cha.

⁶ A mach maysch'olnil sb'eyb'al, a smul cha, 'icha ch'an̈ yal yajch 'a 'a; ax pax mach to wach' snab'en, caw junc'ojlal yaji, tzaljc'ojlaln̈ej yico'.

⁷ A junc yajl tojl snab'en, wach' tzyutj sb'onyaj eb' meb'a', ax pax junc maysch'olnil snab'en, toc 'ay yel'ch junc chi 'a 'a.

⁸ A eb' ch'a'an, ton̈j tzuntzj chan̈ somnjoc eb' junc chon̈b'al 'anma'; a pax eb' jelan, yojc eb' stenn 'ejm junc owl cha.

⁹ Toto a junc jeln tztej sb'a yet' junc may snab'en 'a yojltac eb' yajal, a jun may snab'en cha, tzcot yowal mto ton̈j tzb'uchwji, may tas tzb'o yu'uj.

¹⁰ A eb' milm 'anma', tzpatquilx can 'el eb' wach' snab'en yuj eb', tznib'j eb' smil cham eb' wach' cha.

¹¹ A mach may snab'en, a yic 'ay cot yowal, tojln̈ej sb'on 'icha tas nab'il yu'uj, palta a mach 'ay snab'en, tztac' syamn 'och wan sb'a yet' yowl sc'ojl cha.

¹² Q'uinloc a junc yajal tzchaj yab' 'es paxti', ax eb' 'aych yet' 'a yopiso cha, tz'och eb' 'a'm 'esal smasnil.

¹³ A junc meb'a' yet' junc tz'ixtxi, lajnn̈ej yel'ch eb'; a Jehová a x'a'n sat eb', yuj cha wach' yiln eb'.

¹⁴ A junc yajl wach' tzyutj sb'onyaj eb' meb'a', caw wach' yaj 'a yopiso chi 'a smasnil tiempo.

¹⁵ A mach tzyab' syail yic tz'ajx cuenta, 'oj jawc snab'en, ax junc 'unnab'il matz 'ajx cuenta, tzyac' sq'uixwloc snun.

¹⁶ A yic tzniwtj chan̈ eb' 'anma maysch'olnil sb'eyb'al, caw tzniwtj chan̈ 'ajmulal; ax eb' wach' snab'en, q'ueln 'och wal eb', ax satl eb' maysch'olnil cha.

¹⁷ 'A'c cuenta eb' eyunnal, sec 'ay e junc'ojlal yuj eb', to 'ixta', tzaljc'ojlaln̈ej eyico'.

¹⁸ A 'aj matz 'ab'x spaxtin eb' schecb' Dios, tzb'on̈j eb' 'anma smasnil maysch'olnilal, palta ax eb' yiclum 'a sley Dios, caw wach' yic eb'.

¹⁹ A mach ton̈j tzyal yet' sti 'a junc schecab', matz yac' cuenta, wach'xam tznachj 'el yu'uj, palta matz yiclj jun checb' cha.

²⁰ A junc may snab'en, wach' to yic 'a yib'n̈ junc amancotn spaxtini.

²¹ A mach matz tzcuy junc schecb' 'a yic yune'al, ax 'a slajub' 'oj yab' syal yu'uj.

²² A mach ow tzyutj sb'a, tzyij chan̈ owl 'a scal 'anma'; a mach c'un scot yowal, 'ay tas man̈ wach'c tzb'o 'a scal 'anma'.

²³ A mach tzyij chan̈ sb'a, 'oj 'ijxoc 'ejmi, ax mach 'emmquilal tzyutj sb'a, 'oj 'ijxoc cha'an̈.

²⁴ A mach tzya'ch sb'a yet' eb' 'elc'um, mun tzyij cot 'a yib'an̈, yujto tzyac' sti yaln junc chi 'a stojlal 'a sat eb' yajal, palta matz yal pax 'icha tzyutj ya'n sti cha.

²⁵ Toto 'ay mach tzxiw 'a yit 'anma'il, mun tzyij 'ejm sb'a, palta toto tzya'ch sc'ojl 'a Jehová, caw wal tan̈b'il yu'uj.

²⁶ Til wal 'anma tzsayn 'ec' swach'c'ojlal eb' yajal, palta cojn Jehová tzb'onyaj junc mach 'a wach'il.

²⁷ A eb' 'anma wach' snab'en, matz nib'j eb' yil eb' maysch'olnil snab'en; an̈jtona eb' maysch'olnil snab'en cha, matz nib'j eb' yil eb' wach' snab'en cha.