Pr 28 - Chuj San Sebastian Bible

¹ A mach tzb'on maysch'olnil, wach'xam may mach tzpechni, palta mun tz'at 'eloc; ax pax mach wach' snab'en, te'tec' yaj 'icha junc no león.

² Toto tu tas tzb'o junc chon̈b'al 'anma', tzolmtac yec' eb' syajlil eb', palta toto caw jeln snab'en junc syajlil eb' cha, tztac' yi'n b'ey jun nacion̈ chi 'a swach'il.

³ Toto a junc meb'a tz'och yajlil, ax tz'aji caw wal tz'ixtx eb' yit meb'a'il chi yu'uj. A jun cha, lajn wal 'icha junc niwquil yaxn̈ab', c'uxn tzlajw 'el smasnil sat 'awb'en yu'uj.

⁴ A eb' may yel'ch ley 'a sat, caw wal tzalj eb' yet' eb' tzb'on maysch'olnil, ax eb' yiclum 'a ley cha, tz'och eb' 'ajc'ojlal 'a eb' tzb'on maysch'olnil cha.

⁵ A eb' 'anma maysch'olnil, toc tznachj 'el tas tojl yuj eb', ax pax eb' tzya'ch sb'a yico'oc Jehová, tznachj 'el yuj eb'.

⁶ Wach'xam meb'a 'on̈ec, toto wach' qui nab'enec, yel xo wach' quiquec 'a yib'n̈ junc rico to cojn maysch'olnil nab'il yu'uj.

⁷ A junc 'unnab'il to wach' snab'en, tzyiclj smasnil sley Dios, ax pax junc pec' yec' 'ilj q'uin̈, tzyij 'el sq'uixwel smam.

⁸ A mach tzniwtj sricoal yuj yune stumn tzyac' majnil, tzmolb'tzej wal sricoal cha, palta ax 'a eb' tz'o'ch sc'ojl 'a eb' meb'a', axta tzcani.

⁹ Toto 'ay junc mach matz nib'j yab' sley Dios, an̈jtona ma'oj yab' pax Dios slesal.

¹⁰ A mach tz'i'n 'at eb' 'anma wach' sb'eyb'al 'a maysch'olnil, a jun cha, mun a 'oj can 'a jun sch'an̈ yal tzb'o 'ejm cha, ax junc tojl snab'en, 'oj scha wach'il.

¹¹ A eb' rico caw jeln snab'en eb' snani, palta ax eb' meb'a to jeln snab'en, tztac' yiln 'och eb' snab'en eb' rico cha.

¹² A yic tz'och eb' wach' sb'eyb'al 'a yopiso, caw tzalj eb' 'anma yet' eb', tzya'ch eb' q'uin̈; palta toto a eb' tu snab'en tz'och 'a yopiso, ax eb' 'anma cha, tzlaj sc'ub'c 'el sb'a eb'.

¹³ A mach tzc'ub'j 'el smul, caw man̈ wach'c 'oj 'aj 'el'chi; ax toto tzyal q'uet smul cha, tzlajw cha, tzyactn sb'oni, toto 'ixta', 'oj 'ajxoc niwnc'ojlal.

¹⁴ Caw tzaljc'ojlal yic junc mach to 'ay yel'ch Jehová 'a sat, ax toto pit tzyutj snab'en, 'oj cotcn yailal 'a yib'an̈.

¹⁵ Toto a junc maysch'olnil snab'en 'aych yajlil 'a junc meb'a chon̈ab', lajn 'icha wal junc no león tz'el yaw, mto 'icha junc no oso 'ay swejel.

¹⁶ A junc yajl tz'ixtn eb' yit 'anma'il, may snab'en; ax pax junc yajl matz nib'n 'och c'ultac tumin, a jun cha, 'oj najtxb'oc sq'uinal.

¹⁷ A mach tz'och smul smiln cham yit 'anma'il, man̈x cab' 'och wan 'a yet'ul, masnto tzc'och 'a 'aj 'ay sjul-l eb' chamnc 'anma'; may cab' mach tzyamn 'och wa'an.

¹⁸ A mach wach' snab'en, 'oj colxoc, ax junc tu snab'en, 'oj 'el-lc yailal 'a yib'an̈.

¹⁹ A mach tzmunlj 'a slu'um, caw tzyac' sobra tas tzc'uxu; ax junc ton̈j tz'och tza'n yuj tas may yel'chi, 'oj yab' syal meb'a'il.

²⁰ A mach wach' snab'en, 'oj 'ijxoc cha'an̈; ax junc to tznib'j tz'och ricoal muc'uc, 'oj yab' sya'il.

²¹ Man̈ wach'oc toto chucchc yilx 'anma 'a sat junc yajal, palta 'ay 'ajtil tzmontchj junc yajl chi yuj jac tas tz'ajx 'a 'a.

²² A mach tznib'j 'och sb'a ricoal 'a yajn̈ej, man̈ yojcoc toto 'oj jawc meb'a'il 'a yib'an̈.

²³ A yic 'oj b'ey tiempo, toto 'ay mach tzex tenn 'och wa'an, niwn cab' yel'ch jun chi 'a yib'n̈ junc tzex aln wach'il.

²⁴ A mach tz'och 'elc'l 'a smam snun, man̈ mulc jun chi snani; a jun cha, lajn snab'en 'icha eb' cojn 'elc'l tzb'o'o.

²⁵ A mach til wal tas tznib'j 'och yet' snab'en, cojn owl tzyij cha'an̈; palta toto a Jehová tzya'ch yipc sc'ojol, caw wal 'oj alxoc wach'il.

²⁶ A junc may snab'en, a cob' jac tas yojtac a chi tzya'ch yipc sc'ojol; palta ax junc 'ay snab'en, tzc'anb'j snab'en 'a eb' jelan, a jun cha, wach' 'oj 'el'choc.

²⁷ A mach tzcolwj 'a eb' meb'a', ma'oj yil meb'a'il; ax mach matz colwj 'a eb', til wal eb' 'oj alnc tu 'a spatquil jun cha.

²⁸ A yic tz'och eb' maysch'olnil yajlil, tzlaj sc'ub'c 'el sb'a eb' 'anma yuj eb', palta a yic tzsatl eb' maysch'olnil cha, ax eb' tojl snab'en tzniwtj cha'an̈.