Pr 27 - Chuj San Sebastian Bible

¹ Man̈ eyi' chan̈ e b'a eyaln yuj tas 'oj e b'o 'a junc xo c'u, yujto man̈ eyojcoc tas yet' junx c'u cha.

² Scha cab' e c'ojl to chuc mach tzex aln wach'il; yujto man̈ wach'oc toto mun ax tzeyalch wach'l e b'a.

³ A q'uen q'ue'en yet' q'uen arena, caw 'al q'ue'en; 'ixta wal yowl sc'ojl junc tu snab'en, caw wal matz techj cu'uj.

⁴ A c'a'lc'ojlal yel xo wal tu', niwn tas tzjuw 'el yu'uj. Ax pax chichnc'ojlal, toc 'ay mach tztac' scoln sb'a 'a 'a.

⁵ Yel xo wach' tzex stench wan junc e wach'c'ojol, 'a yib'n̈ to tzex cob' sc'ultac chamc'ojloc.

⁶ A mach wach' eyaj yet'oc, tzsay tas to tz'och e wach'loc. Wach'xam tzeyab' syal yuj junc cha, palta toto a junc 'ajc'ojl tz'och la'n 'ayex, tzeyil wal e b'a 'a 'a.

⁷ Q'uinloc tox ex b'ut'ji, wach'xam tz'ajx no yal chab' 'ayex, man̈x 'a swach'l no tzeyab'i; ax pax toto 'ay e wejel, toxn̈ej c'a tas tz'ajx e c'uxu', wach'n̈j tzeyab'i.

⁸ A win winc tz'actn can yatut yet' yunnal, lajn wal win 'icha junc no ch'ic tzyactj can so yet' yune'.

⁹ A tas su'q'ui sjab' yet' perjuma, a chi tz'a'n qui tzaljc'ojlalec, 'ixta tzon̈ 'ajc qui tzalj yuj nab'en tzyac' junc qui wach'c'ojlec, yujto 'ay schamc'ojlal 'ayn̈ec.

¹⁰ May cab' b'a'n̈ tzeyactj can eb' e wach'c'ojol yet' eb' swach'c'ojl e mam. Toto 'ixta', a yic 'ay e cusc'ojlal, man̈oc to 'a yatut junc eyican 'a najat, atta tz'at eyal e b'a. Yel xo wach' a 'a eb' e wach'c'ojl cajn 'a e tz'ey, ata tzeyal e b'a.

¹¹ Ex wunnal, jeln tzeyutj e b'a, sec 'oj tzaljoc in c'ojl eyu'uj, sec 'ay tas 'oj stac' wa'n spacc 'a eb' tzin patquiln 'eli.

¹² Toto 'ay e nab'en, tzeya'ilj e b'a 'a tas 'ay smay, tze col e b'a 'a 'a. Ax toto may e nab'en, ton̈j 'ipn e 'at 'a eyojltac, masnto tzex 'em yuj yailal.

¹³ A mach tzya'ch sb'a fiadoral yuj junc chuc 'anma'il, tz'e'cn spichl yuj smajnnub'loc junc cha.

¹⁴ Toto caw 'ip yel eyaw yic tzeya'n stzatzl sc'ojl junc e wach'c'ojl 'a yic caw sq'uin̈b'ilto, 'icha wal to tu tas tzeyal 'a tzyab'i.

¹⁵ A 'ix 'istzilab'il to owln̈ej yaji, lajn wal 'ix 'icha tz'uj t'ujlji yem 'a n̈ab'lq'uinal.

¹⁶ Toto cob' 'ay mach tznib'j yamnc 'och wan 'ix yet' yowl cha, lajn wal junc chi 'icha yic tzcob' ca'lnoquec qui 'atc 'a spatc 'ic' yic tzqui yamnec 'och wan qui nani, mto 'icha cob' yic tzca'lniec qui yamn 'och wan aceite 'a yol qui c'ab'.

¹⁷ 'Icha sn̈icxq'ue ye junc q'uen yamc'ab' 'a junc yit q'uenal, 'ixta pax junc mach, tzjelnb'i yuj spaxti junc xo yit 'anmal cha.

¹⁸ A mach wach' tzyutj stan̈wni te higo 'awb'il yu'uj, 'oj slo sat te'; 'ixta pax 'a yic wach' tzyutj junc mach stan̈wni spatron̈, caw 'oj 'ijxoc chan̈ sb'i.

¹⁹ 'Icha quilnec 'ejm qui sat 'a yol junc a', 'ixta tzcutjec quilnec cot qui b'a, yic tzquilnec 'och snab'en junc quit 'anma'il.

²⁰ A chamel yet' sjul-l 'aj tzmucx eb' tzchami, may tz'aj sb'ut'ji, 'ixta may b'a'n̈ tz'och wan snib'n eb' 'anma tas tznib'ej.

²¹ A q'uen oro yet' q'uen plata, ata tz'ajx prowal q'uen 'a scal c'ac'; 'ixta pax junc mach tz'ajx prowal yet' jun tzo'n̈ wach' paxti tzalx 'a yib'an̈, sec tz'ilxi toto tztechj yu'uj.

²² A junc may snab'en, wach'xam tztenx chojc yet' te tenlab', palta man̈ yujoc cha, tz'el man̈ nab'enal chi 'a 'a.

²³ 'Aych cab'n̈ej e nab'en eyilni tas tz'aj yilx no e calnelu, 'ayx 'och cab' 'a 'il yuj e no e cajb'en noc' cha,

²⁴ yujto a ricoal yet' 'opiso, lemb'il man̈ najtloc tzyac'a, ax slajw paxi.

²⁵ A yic tzlaj polx chan̈ te 'ac 'a lum tzalctac, ax tz'aji tzcha woln pax te jun 'ejm xo. A te tze molcn yuj e cajb'en noc' cha.

²⁶ A xil no e calnelu chi 'oj e chon̈li, ax e mann e pichul, ax stojl e no e chiwo, a 'oj mannc e lu'um.

²⁷ Caw 'oj yac' sobra slech no e chiwo cha, a 'oj eyuc' yet' eb' eyunnal, yet' pax eb' e checb' 'a eyatut.