Pr 26 - Chuj San Sebastian Bible

¹ Man̈ wach'oc toto 'ay sacb'acm 'a yic cuaresmail, mto tzyac' n̈ab' yic 'aych jach'oj. An̈jtona', 'ixta eb' tu snab'en, man̈ smojc tz'ijx chan̈ sb'i eb'.

² A junc catb' paxti tzalx 'a to may yu'uj, matz 'och yopiso. Lajn 'icha wal junc no tz'unun ton̈j tzjen̈n 'eq'ui, mto 'icha junc no pechul matz 'och wa'an.

³ 'Icha tz'och tz'um 'a no cawyu chej, mto freno 'a no b'uru yic tzyiclni no' 'ayn̈ec, 'ixta yic tz'och te jixc'ab'te 'a yichspatc eb' 'anma may snab'en.

⁴ Man̈ ex ta'wc 'a eb' 'anma may snab'en, yic tzyaln eb' sman̈ nab'enal chi 'ayex, sec matz e b'o 'icha tas tzb'o eb' cha.

⁵ 'Icha wal spaxtin junc may snab'en cha, 'ixta tzeyutj ta'wc e b'a 'a 'a, smoj yalx 'ixta', sec 'oj yojcoc 'eli to may snab'en.

⁶ Toto a junc may snab'en tzqui checc 'at 'a junc qui checnb'il, lajn wal 'icha yic tzqui tzu'c coc, ton̈j tzquijec cot yailal 'a quib'an̈.

⁷ A junc nab'en cob' tzyac' junc may snab'en, lajn 'icha yoc junc coxo, may yopiso.

⁸ Nab'an̈ej tzquij chan̈ sb'i junc may snab'en, yujto lajn 'icha yic tzqui jalnec 'och q'uen cotc q'uen 'a yojl junc ch'an̈ mejech'.

⁹ A junc may snab'en, tzya'lj cob' yaln 'el paxti yic jelnal, a jun cha, lajn 'icha junc 'u'm 'an̈ tz'ec' yet' junc te q'uix yamb'il yuj 'a yol sc'ab'.

¹⁰ A junc patron̈ tzcomn 'a'n smunljel junc may snab'en, mto 'a junc ton̈j tzb'eyc' 'a scal smunljel, lajn 'icha wal junc julwjum, ton̈j tzcomn julwj 'a scal eb' 'anma'.

¹¹ 'Icha no tz'i tzxeji, tzcha le'n pax no xej cha, 'ixta eb' may snab'en, tzcha meltzj can pax 'at eb' 'a stu nab'enal.

¹² 'Ayt wal jacx wach'l 'a eb' may snab'en, 'a yib'n̈ eb' to tzyal jelnal sb'a.

A junc mach 'isaj

¹³ A junc 'isaj, tzyal cob' 'ixtic: Caw 'ayc' jun no león macwjoc 'a yol b'e, xchi cob'i'. Tzyal 'ixta', yujto matz nib'j munljoc sb'a.

¹⁴ 'Icha wal yec' swisagreil junc puerta, 'ixta yec' b'alb'noc jun 'isj chi 'a sat sch'at.

¹⁵ A junc 'isj cha, tzya' cob' 'ejm sc'ab' 'a yol yuc'ab', palta ax ya'n 'och tas tzc'ux 'a sti', caw 'ajltac tzyila.

¹⁶ A mach 'isj cha, a tzyutj snani to yel xo jeln 'a yib'n̈ ucwn̈oc 'anma yojc spacn junc paxti 'a swach'il.

¹⁷ A mach tzya'ch sb'a 'a scal junc owl 'aj may yaln yico', lajn wal 'icha to a schicn junc no tz'i tzyama.

^18-19 A mach tzyixtj eb' swach'c'ojol, a tzyutj yalni to ton̈j tztajni; a jun cha, lajn wal 'icha junc 'anma 'ay cot owya 'a sjolom yic tzjulwj yet' jun tzo'n̈ jul-lab' 'aych sc'aq'uil.

²⁰ Toto may te c'atzitz, tztupl te c'ac', 'ixta pax 'a yic may alj peclal, may owal.

²¹ 'Icha tz'aj schacb' pax te stzac'ac' yic tz'ochx sc'atztzil, tzn̈ilchj pax cha'an̈, 'ixta tz'aj sq'ue wan owl 'a scal 'anma yuj junc mach cojn owl tz'ec' say sb'o'.

²² A spaxti eb' alm peclal, lajn wal 'icha junc tas wach' tzc'uxxi, tzc'och schil 'a qui pixnec tzcab'i.

²³ A spaxti eb' 'anma tu tas nab'il yu'uj, lajn wal 'icha cob' sja'l tz'ajch q'uen plata yu'moc junc lum chen.

²⁴ A mach tu snab'en, caw wach' tzyutj paxtinc sb'a, palta ax 'a snab'en, caw wal tu tas nab'il yu'uj.

²⁵ Wach'xam cob' wach' tzyutj paxtinc sb'a 'ayex, palta man̈ e cha eyab'i', yujto caw tu tas nab'il yuj 'a e patquil.

²⁶ Wach'xam tzcob' sc'ub'c 'el stu nab'enal chi 'ayex, palta yowlal 'oj checljoc 'el snab'en chi 'a sat smasnil 'anma'.

²⁷ A mach tzjoyn junc jul, mun a 'oj 'atcn 'a yojol; a junc tzecn 'at junc q'uen 'a yib'n̈ junc 'anma', an̈jtona', q'uen 'oj cot pax 'a yib'an̈.

²⁸ Tzeya'ilj e b'a 'a junc mach tzex cob' alnc wach'il, ticni yes, yajb'ilx 'el yu'uj, tznib'j tas tzex yutej.