Pr 25 - Chuj San Sebastian Bible

Jun tzo'n̈ xo spaxti Salomón

¹ An̈jtona', spaxti Salomón jun tzo'n̈ xo tic, ax eb' yajtz'ib' win rey Ezequías, win sreyl Judá, a eb' x'i'n 'elt scopiail. 'Ixtc yaln jun tzo'n̈ paxti cha:

² Smoj wal qui'nec chan̈ sb'i Dios yuj tas c'ultac yaj yu'uj, ax eb' rey tzcalc eb' wach'il, yujto tzcham wal sb'eyc'ojlan eb' junc tas.

³ 'Icha wal schan̈il yajb't satcha'an̈, yet' xab'l yich lum lum tic, 'ixta wal snab'en eb' rey, may junc mach tztac' yojcan 'eli, tas yaj snab'en eb'.

⁴ A yic tzb'icx 'el slumal q'uen plata, tztac' sb'o junc tas caw wach' 'a q'ue'en.

⁵ An̈jtona', toto tz'ijx 'el eb' maysch'olnil 'a yopiso yuj win rey, to 'ixta' a yopiso win cha, caw wal 'oj yic' yip 'a stojlal.

⁶ Man̈ e b'an̈ e b'a 'a yojltac win rey, man̈ ex comn 'em wocn 'a 'aj tz'em wocn eb' niwc winac.

⁷ Yel xo wach' toto a win rey tzex 'awtn 'at yet' 'aj 'ay cha, sec matz 'el e q'uixwel eyijx 'elt 'a scal eb' niwc winc cha.

⁸ A tas tzeyila, man̈ 'at e comn alc mu'c 'a eb' yajal, yujto lemb'il 'ay junc xo mach tzc'ochi, tz'at yalnc wal tas yaji, ax tz'aji, 'oj e q'uixw can 'eli.

⁹ Toto 'ay eyowl yet' junc xo eyit 'anma'il, 'a'c 'ip e b'onyaj yet'oc, man̈ eyal yab' eb' 'anma';

¹⁰ toto ma'ay, lemb'il a eb' tz'ab'n cha, 'oj yal-l eb' e peclal, ax 'oj 'ajoc, tu 'oj e b'inaxi.

¹¹ A junc paxti wach', tzalx 'a 'icha wal tz'aj yalxi, lajn 'icha junc mansn to nab'a oro, ax q'uen plata 'aych yelwnub'loc.

¹² 'Icha wal q'uen colc'ab' mto q'uen ton̈ caw wach', to nab'a oro, 'ixta wal tennb'il tzyac' eb' jeln snab'en, toto tzqui chajec cab'i'.

¹³ A junc checb' yiclum schecxi, lajn wal 'a spatron̈ 'icha yic tzcu'nec a sicla 'a yic caw 'ay qui tan̈til 'a scal c'ac', caw tzsicb' qui c'ojlec yu'uj, 'ixta jun checb' chi 'a spatron̈ cha.

¹⁴ 'Icha tacn̈ 'asun, 'icha tacn̈ 'ic' may sn̈ab'il, 'ixta junc mach tzcob' sb'an̈ sb'a ya'n junc tas, ax tz'aji, may xon jac tas tzyac'a.

¹⁵ A paxti to yic niwnc'ojlal yaji, c'un pax tz'aj yalxi, sictac tz'aj eb' tenmtac yu'uj, yet' pax eb' yajal, 'oj montchjoc eb'.

¹⁶ A yic tz'ilchj no yal chab' eyu'uj, man̈ ex 'ec' 'a yib'n̈ e tz'ub'n no'; toto niwn no yalil chi tze tz'ub'u, 'oj e xej yuj no'.

¹⁷ 'Ixta pax yic tzex 'at e c'umc eb' cajn 'a e tz'ey. Man̈toc juntc 'ipn̈ej tzex c'och 'a eb', ax 'oj 'ajoc, tu 'oj yil eb' yic tzex cochx 'a eb' cha.

¹⁸ Toto tzeya'ch e b'a testigoal 'a tas man̈ yelc 'a junc xo quit 'anma'il, lajn wal jun chi 'icha junc te te', junc q'uen espada mto junc jul-lab' caw jay sn̈i'.

¹⁹ A yic 'ay eyailal, toto a junc 'anma tu snab'en tzeya'ch yipc e c'ojol, lajn wal jun chi 'icha yic tzwecchj coquec, mto 'icha yic to oln xo que.

²⁰ A yic tzb'itnax junc b'it eyab'i', yic 'ayx 'och 'a eyailal, lajn wal syal tzeyab' 'icha yic tz'ajx 'och vinagre 'a sat junc lajwel, mto 'icha yic tzijx 'el qui pichul yic 'ay si'ic.

²¹ Toto 'ay swejl eb' 'ajc'ojl yajch 'ayex, 'a'c tas tzc'ux eb', toto 'ay stacn̈til eb', 'a'c tas tzyu'j eb'.

²² 'Ixta 'oj 'aj schacb' 'el sat eb' sq'uixwi, 'icha wal to tze sec q'ue stza c'ac' caw tzn̈ilchj 'a sjolm eb', ax Jehová a 'oj 'a'noc spac 'ayx yuj e wach'c'ojlal cha.

²³ A tu paxti tzalxi, a tz'a'n owxoc 'el qui satec, lajn wal 'icha 'ic' tz'i'n cot n̈ab' 'a stojlal norte.

²⁴ Yel xo wach' yic win winc cajn 'a junc pat, 'a yib'n̈ to cajn 'a junc niwquil n̈a yet' junc 'ix 'ix to yowln̈ej 'a smasnil tiempo.

²⁵ 'Icha wal sja'l yu'x a sicla 'a yic 'ay qui tacn̈tilec, 'ixta wal sja'l yab'x junc wach' 'ab'x tzcot 'a najat.

²⁶ A junc mach wach' sb'eyb'al tzyac' 'ijxc 'at sb'a yuj eb' maysch'olnil sb'eyb'al, lajn wal 'icha junc a spac'b'a caw tat yilx yuj lu'um.

²⁷ Man̈ wach'oc toto niwn no yal chab' tzqui tz'ub'ec, an̈jtona' man̈ wach'oc toto tzqui nib'jec to niwn tzon̈ b'inaxc yuj eb' quit 'anma'il.

²⁸ Toto matz uj qui yamnec 'och wan qui b'a yet' qui nab'en, lajn on̈c 'icha junc chon̈b' lan̈chjnacx 'ejm smuroal, to 'ay xo smay yilxi.