Pr 24 - Chuj San Sebastian Bible

B'aln̈lajn̈e'

¹ Man̈ e nib'c 'och tastc 'ay 'a eb' 'anma maysch'olnil, man̈ e nib'c can e b'a 'a scal eb',

² yujto cojn 'elc'l nab'il yuj eb', cojn tu paxti'al tzlaj yal eb'.

Junc'al

³ Tze na si'mb'il tas tzeyutj e b'on yol eyatut, 'icha junc n̈a wach' tz'aj sb'o yet' jelnal yet' pax wach' nab'enal.

⁴ Tze na wal si'mb'il tas tzeyutj eya'n b'ut'joc 'el yol eyatut yet' jun tzo'n̈ tas wach' yilxi, yet' pax tas chan̈ stojol.

Junschawinac

⁵ Yel xo wach' yic junc jeln snab'en 'a yib'n̈ junc mach 'ay yip; yel xo pax wach' eyico' toto 'ay tas eyojtac, 'a yib'n̈ to 'ay cob' eyip.

⁶ Toto tzex 'och 'a owal, c'anb'jec 'ec' junc nab'en. Toto niwn eb' 'oj 'a'nc e nab'en, 'oj eyac' ganar.

Chab'schawinac

⁷ A mach may snab'en, caw matz nachj yu'uj tas tzyal 'a yojltac win yajl 'a sdespacho, ton̈j sictac tz'aji, yujto may sjelnal.

'Oxeschawinac

⁸ A mach cojn maysch'olnil tzna'a, til wal sb'inax yuj stul cha.

⁹ A tas nab'il yuj junc may snab'en, cojn 'ajmulal; a junc ch'a'an, toc 'ay mach tznib'ni.

Chan̈eschawinac

¹⁰ Toto tzjaw e chab'c'ojlal 'a yic 'ayx 'och 'a somc'ojlal, may e te'nal tzyal cha.

O'eschawinac

¹¹ Colc 'elt eb' to wan yijx 'at 'a chamel, yamc 'och wan eb' to wan sc'och 'a sti sjul-l yet'l chaml cha.

¹² Wach'xam tzcalec to man̈ cojcoc toto wan s'at eb' 'a chaml cha, palta a Dios tzb'eyc'ojlan tas nab'il cujec. A tzon̈ tan̈wniec, yojtac tas cajec. A 'oj 'a'nc spac 'ayn̈ junjn on̈c yuj tas tzqui b'o'ec.

Waqueschawinac

¹³ Ex wunnal, tz'ub'c jac no yal chab', 'ab'c wal schil stz'ub'x no'.

¹⁴ 'Icha wal schil no chab' cha, 'ixta wal 'oj eyutc eyab'n swach'l jelnal yet' wach' nab'enal; toto 'oj 'ilchjoc eyu'uj, caw wach' 'oj eyel'chi, ax tas 'aych yipc e c'ojol, may b'a'n̈ 'oj lajwc 'ejmi.

Uqueschawinac

¹⁵ Man̈ e na chan̈ tu nab'enal 'a yib'n̈ eb' wach' snab'en, man̈ eyelc' 'elt tas 'ay 'a yol yatut eb',

¹⁶ yujto wach'xam tzcotcn 'a yib'n̈ eb' uc 'ejmoc, an̈jtona uc 'ejm 'oj q'uex wan eb'; a pax eb' tzb'on maysch'olnil jun, 'oj cotcn 'a yib'n̈ eb' 'a jun 'ejmn̈ej.

Wajxqueschawinac

¹⁷ Man̈ ex tzaljoc yic tzcot 'a yib'n̈ eb' 'ajc'ojl yajch 'ayex.

¹⁸ Toto tzex tzalj yuj eb', man̈x 'oj ya'ch Jehová yowl sc'ojl 'a yib'n̈ eb', yujto man̈ wach'c jun e tzaljc'ojlal chi 'a sat Dios.

B'aln̈eschawinac

¹⁹ Man̈ tuc cab' tzeyab'i yic tzq'ue'ch eb' maysch'olnil ricoal, man̈ e nib'c 'och tas 'ay 'a eb',

²⁰ yujto a eb' maysch'olnil cha, man̈ wach'c yic eb'. 'Oj satl eb' 'icha tz'aj stup sc'a'l junc cantil.

Lajn̈schawinac

²¹ Ex wunnal, 'ay cab' yel'ch Jehová 'a e sat yet' pax win rey. Man̈ eya'ch e b'a yet' eb' 'ajc'ojl yajch 'a win rey cha,

²² yujto yajn̈ej 'oj jawc schaml eb' 'a yib'an̈, ax sat 'ejm eb'. May mach 'ojtnac tas yailal 'oj jawc 'a yib'n̈ eb' yuj Dios mto yuj win rey.

A jun tzo'n̈ xo nab'en

²³ An̈jtona pax jun tzo'n̈ xo tic, a eb' 'ay snab'en 'ix aln cani: Caw man̈ wach'oc toto chucchc yilx eb' 'anma 'a sat win yajal yic tzb'onyaj win eb'.

²⁴ Toto tzya'l win eb' 'ay smul 'a libre, tu tzyal eb' 'anma 'a spatquil winac, tzcatb'tzax can 'el win yuj eb' 'anma'.

²⁵ Palta toto tzya'ch win syailal eb' 'ay smul cha, wach' tz'el'ch win 'a sat eb' 'anma', wach' tas tzyal eb' 'a spatc winac.

²⁶ Toto wach' tzeyutj eya'n spac junc paxti', lajn ex wal 'icha junc mach tz'ub'n 'elt sti junc 'anma'.

²⁷ Mant e b'o chan̈ eyatut, toto mant 'a tas 'ay 'ayex yic tz'ec' tiempo eyu'uj.

²⁸ Man̈ eya'ch e b'a 'a junc paxti tz'ajx 'och 'a yib'n̈ eb' quit 'anma'il, man̈ eyal junc paxti man̈ yelc 'a spatc eb'.

²⁹ Man̈ eyac' e pac 'a eb' quit 'anma'il, 'icha wal tzex yutj eb'.

³⁰ An tic in 'ec' 'a scal smunljel jun win 'isaj, atn 'a yawb'en uva win may snab'en:

³¹ A tas x'ilchj wuj ta', cojn te q'uix tzq'uib' 'a sat lum lum cha, ax q'uen q'uen 'aych scol-lalc smunljel cha, 'elnc xo lan̈njoc q'ue'en.

³² A yic xwiln jun tic, 'ix in moln can 'a in nab'en; 'ix 'och wal cuynb'ilal 'ayin.

³³ Toto tzex wayi, tzex necwi, tze moyn e c'ab', tzex 'ilj wal si'mb'il,

³⁴ ax meb'a'il 'oj jawc tza'njoc 'ayex; 'icha tzyac' junc 'elc'm yet' syamc'ab', 'ixta 'oj 'aj sjawi.