Pr 23 - Chuj San Sebastian Bible

Waque'

¹ Toto 'ay eb' niwc winc tzex 'awtn wac yet'oc, tzcham wal e nani mach 'aj 'ayx 'ec' 'a yojltac cha.

² Wach'xam c'aync ex to niwn e wa'i, palta wach' toto jab' wal tas tze c'uxu.

³ Man̈ yelc'ojlaloc tze c'ux tas wach' cha, yujto lemb'il ton̈j tzex yixtj paxti eb' cha.

Uque'

⁴ Man̈ eyac' 'ip eyoch ricoal, man̈ ex 'och 'il yuj jun tzo'n̈ cha,

⁵ yujto a q'uen tumin, yajn̈ej tzlajw 'ejm q'ue'en, 'icha to tz'och sc'axil, tz'at jen̈njoc 'icha tzyac' no cotc salt'iw.

Wajxque'

⁶ Man̈ ex wa 'a smexa eb' b'as, man̈ e nib'c 'och swach'il tas tzc'ux eb',

⁷ yujto a eb' 'ay yic jun tas tzc'uxx cha, niwn tas tzna eb' yu'uj. Wach'xam tzcob' yal eb' to tzex wa'i, palta man̈ yet'c smasnil sc'ojl eb' tzyaln eb'.

⁸ A tas tzcob' e c'ux cha, 'icha to 'oj e xejc can pax 'eli, ax e paxti wach' tzcob' eyal 'a eb', man̈x 'a yopiso.

B'aln̈e'

⁹ Man̈ eyal junc paxti wach' 'a eb' may snab'en, yujto ton̈j 'oj ex sb'uch eb' yuj e paxti cha.

Lajn̈e'

¹⁰ Man̈ e t'un̈ smon̈jonal lum lum pecti b'ob'il can 'ejmi. Man̈ e to'c pax smacl lum eb' meb'a 'unn chamnc smam,

¹¹ yujto a Dios tztac' yuj smasnil, a 'oj colnc 'el eb', ax 'oj 'a'nc owl eyet'oc.

Uxlche'

¹² 'A'c 'och wal e chiquin yet' e nab'en 'a jun tzo'n̈ cuynb'il sec tzeyojquej 'eli.

Lajchwe'

¹³ Man̈ eyactc eya'n cuenta eb' 'unin, toc wal 'oj cham eb' yuj jaye'oc tz'um tze xumch 'a eb'.

¹⁴ Toto tzeya' cuenta eb', wan e coln 'el eb' 'a yol sc'ab' chamel.

'Oxlajn̈e'

^15-16 Ex wunnal, a wal yic 'oj e jelnb'i, yic 'oj wab'nc e paxtin 'a tas smoj eyalni, 'oj tzaljc in c'ojl si'mb'il eyu'uj.

Chan̈lajn̈e'

¹⁷ Man̈ e nib'c 'och tastc 'ay 'a eb' 'anma maysch'olnil, a eyico', to 'ay cab' yel'ch Jehová 'a e sat.

¹⁸ Toto 'ixta tzeyutj e b'a, caw wach' 'oj eyel'chi, ax tas 'aych yipc e c'ojol, may b'a'n̈ 'oj lajwoc 'eq'ui.

Olajn̈e'

¹⁹ Ex wunnal, chajec yab'i', tze cuyni, 'a'c eyip e b'eylb'an swach'il.

²⁰ Man̈ junc tzex 'ec' yet' eb' 'u'm 'an̈, man̈ junc tzex 'aj yet' eb' tz'ec' 'a yib'n̈ swa'i,

²¹ yujto a eb' 'u'm 'an̈, yet' eb' niwn swa cha, 'oj lajwc 'ejm eb' yuj meb'a'il. A eb' 'isaj, caw nipquixtac 'oj 'aj spichl eb'.

Waclajn̈e'

²² Chajec eyab' tas tzyal e mam ex pitzn 'eli, caw man̈ e patquilc can 'el e nun 'a yic chichm 'ixx xo.

²³ 'A'c 'ip e sayn 'ec' tas yel, jelnal, cuynb'il yet' wach' nab'enal. A jun tzo'n̈ cha, man̈ e patquilc can 'eli.

²⁴ A eb' 'unnab'il wach', eb' 'ay snab'en, smoj ton wal stzalj smam eb' chi yet'oc.

²⁵ Yuj cha, 'a'c tzaljoc sc'ojl e mam e nun, sec niwn yel'ch eb' 'oj yutc yab'ni.

Uclajn̈e'

²⁶ Ex wunnal, macljec wal eyab' tas tzwala, si'mb'il tzex 'och q'ueln 'a in b'eyb'al,

²⁷ yujto a eb' 'ix 'ajmul 'ix, yet' eb' 'ix tzb'o 'ajmulal 'a yol sc'ab' yichmil, caw lajn eb' 'ix 'icha junc xab', yunen̈ej palta caw wal xab' yich.

²⁸ Tzmacwj eb' 'ix 'a yol b'e 'icha junc 'elc'um. Til wal eb' winc tzjuw 'el yuj eb' 'ix.

Wajxclajn̈e'

^29-30 A eb' matz yactj can yu'w 'an̈, 'ayn̈j 'och eb' yab'lni tas yu'x te 'an̈ cha, caw tzyab' eb' syail, tz'el yaw eb', 'ay owl 'a scal eb', tzlajw eb' 'a nab'an̈ej, chacb' 'el yol sat eb'.

³¹ Man̈ ex 'och q'ueln 'a te 'an̈ cha. A yic tz'em te 'a yol svasoal, caw yaxt'ujnac yilx 'ochi. Til wal sja'l yu'x 'ejmi,

³² palta ax 'a slajub', lajn wal 'icha junc no niwquil chan man̈x jantcoc syal sti 'aj tzchiwji.

³³ Toto tzeyu'j te 'an̈ cha, til wal tas 'oj yac' eyila', til wal tas tu 'oj eyala', yet' tas 'oj e na yu'uj.

³⁴ 'Icha wal to yib'n̈ a mar 'ayx 'at tzeyab'i, oyb'nacx e sat, 'icha to a 'a sjolm junc te stel barco caw niwquil, ata wocn ex q'ue tzeyab'i,

³⁵ ax eyaln 'ixtic: Caw on̈ laj sma'c eb', palta ma'ix cab'c syail. On̈ laj sma'c eb' yet' tz'u'um, palta ma'ix cab'ec. A yic x'el leyyoc te 'an̈ chi 'a qui satec, on̈ 'atc pax qui say te 'an̈ chi jun 'ejm xo, 'oj e chioc.