Pr 22 - Chuj San Sebastian Bible

¹ Yel xo wach' toto wach' qui b'inaxec 'a yib'n̈ pax to til wal q'uen oro, mto q'uen plata 'ay 'ayn̈ec.

² A eb' rico yet' eb' meb'a', lajnn̈ej yel'ch eb', a Jehová xb'on eb'.

³ A mach 'ay snab'en, tzyil tas 'ay smay, yajn̈ej tzcoln sb'a 'a 'a; ax junc may snab'en, ton̈j tzwach' 'at 'a yojltac, masnto tz'ejm yuj yailal.

⁴ Toto tzquijec 'ejm qui b'a, yet' 'ay pax yel'ch Jehová 'a qui satec, 'oj qui chac ricoal, 'oj qui b'inaxec, ax yajx najtxb'oc qui q'uinlec.

⁵ A 'a yol sb'e eb' maysch'olnil, til wal q'ui'ix yet' ch'an̈ yal 'ay 'ejmi, ax eb' tzya'ilj sb'a, ma'oj can eb' 'a jun tzo'n̈ ch'an̈ yal cha.

⁶ Cuyc eb' 'unn 'a wach' b'eyb'al, sec ax yic 'oj 'och eb' 'ichm 'anma'il, ma'oj yi'l eb' snab'en 'a jun cuynb'il tic.

⁷ A eb' rico, 'icha junc rey 'ixta yaj eb' 'a scal eb' meb'a', a eb' tz'a'n tumn majnil, yajl yaj eb' 'a scal eb' tz'och majan.

⁸ A mach tzb'on jun tzo'n̈ tas man̈ tojloc, cojn yailal 'oj jawc 'a yib'an̈, man̈x 'oj stac' yixtx eb' yit 'anmal yu'uj.

⁹ A mach 'ela 'a yit 'anma'il, 'oj scha wach'il, yujto tzpojc' tas tzc'ux 'a scal eb' meb'a'.

¹⁰ Toto tzquijec 'el eb' ch'an 'a qui calec, tztup 'ejm tejb'ail, owal, yet' chacjb'ail.

¹¹ A win rey caw tzalj win yuj junc wach' nab'enal, tzch'ox win swach'c'ojlal 'a mach wach' spaxtini.

¹² A mach 'ay snab'en, tan̈b'il yuj Jehová, palta tztenc' tas tzyal eb' 'a'm 'es.

¹³ A mach 'isaj, tzyal cob' 'ixtic: 'Ay jun no león 'a yol b'e, snib'j no in smil chamoc, xchi; tzyal 'ixta', yujto matz nib'j munljoc sb'a.

¹⁴ A spaxti junc 'ix 'ix tzmuln 'a yol sc'ab' yichmil, lajn spaxti 'ix 'icha xab'l yich junc jul, ata tz'atcn eb' tzcatb'tzax yuj Jehová.

¹⁵ A man̈ nab'enal 'aychn̈ej 'a eb' 'unin, ax yic tzma'x eb' yet' jixc'ab'te', tz'el jun chi 'a eb'.

¹⁶ A mach yuj snib'n 'och sb'a ricoal, yuj cha, tzyixtn eb' meb'a', yet' junc mach tz'a'n junc tas 'a eb' rico yic tzmontn eb', a eb' cha, 'oj lajwc 'ejm yuj meb'a'il.

A lajn̈schawinc nab'en

¹⁷ Sictac tzex 'aj e maclni eyab' jun tzo'n̈ tic, tzcham wal e cuyn cani. 'Oj ex in cuy 'a tas yaljnac can eb' jeln snab'en.

¹⁸ Wach' toto tze molcn 'a e nab'en, yic wach' tztac' eyalb'tan̈n smasnil.

¹⁹ A ticnec, tzwa'cn eyojcoc 'eli, sec tzeya'ch e c'ojl 'a Jehová.

²⁰ Tic tzin tz'ib'j can lajn̈schawinc paxti tic 'ayex; a jun tzo'n̈ paxti tic, 'ay nab'en, 'ay pax jelnal yet'i.

²¹ Toto 'oj e cuyu', 'oj eyojcoc 'el tas wach' yet' tas yel, sec caw wach' tzeyutj eyaln 'a eb' tzc'anb'n yab' 'ayex.

Jun

²² Man̈ eyixtc eb' meb'a' yujto matz tac' scoln sb'a eb', man̈ eyixtc pax eb' to matz uj scoln sb'a 'a sat eb' yajal,

²³ yujto a Jehová 'oj colnoc eb', ax 'oj 'a'noc spac 'ayx yuj tas tze b'o cha.

Cha'ab'

²⁴ Man̈ ex 'och tza'n yuj eb' 'anma amancotn snab'en, yet' eb' c'un scot yowal,

²⁵ toto ma'ay, ax 'oj 'ajoc, ax e cuyn stu b'eyb'al eb' cha, 'icha to 'oj e jal cham e b'a.

'Oxe'

²⁶ Man̈ eya'ch e b'a fiadoral yuj sb'oc junc xo mach,

²⁷ toq'ue may tas wach' eya'n stojloc junc cha, ax 'oj 'ajoc, 'oj 'ijxoc 'ec' e ch'at 'aj tzex wayi.

Chan̈e'

²⁸ Man̈ e t'un̈ smon̈jonal slum qui mam quichmec b'ob'il can yu'uj.

O'e'

²⁹ Toto wach' tzeyutj munljoc e b'a, 'oj eyoch munljoc 'a jun tzo'n̈ munljel niwc yel'chi, man̈oc 'a jun tzo'n̈ comn munljel 'aj 'oj e munlji.