Pr 21 - Chuj San Sebastian Bible

¹ A snab'en eb' rey, a 'a yol sc'ab' Jehová 'ayq'ui, a tz'i'n b'ey snab'en eb' 'icha tzyac' junc a a tzjelx sb'e 'aj tzb'eyi.

² A eb' 'anma', a tzyutj eb' snani to wach'n̈j smasnil tas tzb'o eb', palta a Jehová, a tzb'eyc'ojlan snab'en junjn mach.

³ Toto tzqui b'eylb'ejec wach'il yet' tojlal, a jun tzo'n̈ cha, yel xo tznib'j Jehová 'a yib'n̈ xajmb'al tzca'c 'a 'a.

⁴ A eb' tzb'an̈ sb'a, chan̈ yaj't sat eb' yic tz'ec' eb'; caw maysch'olnil jun nab'en cha, caw wal tu'.

⁵ Toto si'mb'il tzqui b'eyc'ojlejec junc tas yic tzqui b'oni, wach' tz'aj 'el'chi; palta toto ji'lti tzqui b'o'ec, ton̈j tzqui locc cot meb'a'il 'a quib'an̈.

⁶ A mach tz'och ricoal yuj ya'm 'esal, jab' wal tzyac' sgana yet' jun tzo'n̈ cha, ax scham yu'uj.

⁷ A mach maysch'olnil sb'eyb'al, a smaysch'olnilal chi 'oj 'a'n lajwoc, yujto matz snib'j sb'eylb'oc tas tojol.

⁸ A sb'eyb'al jun maysch'olnil cha, man̈ tojloc; ax sb'eyb'al junc wach' snab'en, caw tojol.

⁹ Yel xo wach' yic win winc to cajn sch'ocj 'a jac pat, 'a yib'n̈ to a 'a junc niwquil n̈a 'aj cajn yet' junc 'ix 'ix to yowln̈ej 'a smasnil tiempo.

¹⁰ A junc mach maysch'olnil snab'en, cojn maysch'olnil tznib'j sb'o'; may 'aj tzyac' swach'c'ojlal 'a yit 'anma'il.

¹¹ Toto tz'ajx 'och syailal mach tzyij chan̈ sb'a, a junc mant 'a snab'en, tznachj 'el yu'uj. A pax mach jeln xon snab'en, cojn ton̈j tzalx yab'i', tzyojcan 'el muc'uc.

¹² A Dios caw tojol, q'ueln 'och 'a mach maysch'olnil snab'en, a tz'a'n 'och 'a yol sc'ab' yailal.

¹³ A mach matz chaj yab' tas tzc'an eb' meb'a', ax yic 'oj yalnc sb'a 'a Dios, ma'oj scha Dios yab' tas 'oj sc'an cha.

¹⁴ A siylab' c'ultac tz'ajxi, a tz'a'n tup c'a'lc'ojlal.

¹⁵ A yic tzb'o yaj junc tas 'a stojlal, a mach tojl snab'en caw tzalji, ax mach tu snab'en, caw wal tzxiw cha'an̈.

¹⁶ A mach tzyij can 'el sb'a 'a wach' b'eyb'al, wan s'atcn 'a scal eb' chamnac.

¹⁷ Toto tzya't sb'a junc mach 'a scal tas tznib'ej, 'icha yuj 'u'l 'an̈ yet' tas wach' sc'uxxi, a jun cha, 'oj jawc meb'a'il 'a yib'an̈.

¹⁸ A mach maysch'olnil sb'eyb'al, caw 'oj yab' syal sjelc eb' tojl snab'en.

¹⁹ Yel xo wach' yic win winc to cajn sch'ocj 'a junc lugar 'aj c'ultac, 'a yib'n̈ to cajn yet' junc 'ix 'ix to yowln̈ej 'a smasnil tiempo.

²⁰ A 'a yatut mach jeln snab'en, 'ay stumin, 'ay tas tzc'uxu; palta ax junc may snab'en, c'uxn tzlaj 'ejm jac tas tz'ilchj yu'uj.

²¹ A mach tojl snab'en, wach' tzyutj sb'a, 'ay sq'uinal; 'oj b'inaxoc, wach' 'oj 'el'choc.

²² A junc 'ay snab'en, tztac' yoch yac' owl yet' junc chon̈b' caw tan̈b'il si'mb'il, tzma'n lan̈chjoc can 'ejm smuroal jun chon̈b' chi 'aych yipc sc'ojl eb'.

²³ A mach tztan̈wj sb'a yet' tas tzyala, wan scoln sb'a 'a yailal.

²⁴ A mach b'uchmtac, yel xo tz'ec' 'a yib'n̈ sb'an̈n sb'a, tzyij chan̈ sb'a, man̈x 'a yel'ch yit 'anmal 'a sat.

²⁵ A mach 'isaj, tzcham snib'n 'och junc tas, palta matz 'ilchj yu'uj, yujto man̈ yojcoc smunlji.

²⁶ 'Aychn̈ej cob' snib'n junc tas, ax mach wach' snab'en, 'elan̈ej tzyutj sb'a.

²⁷ A Jehová matz chaj sc'ojl yofrenda eb' maysch'olnil, ocxom wal eb' tzyac' yofrenda yet' stu nab'enal.

²⁸ A mach tzya'ch sb'a testigoal 'a tas man̈ yeloc, 'oj lajwc 'eli; palta a mach tzcham wal yab'n junc tas, 'oj chaxocn̈ej tas tzyala.

²⁹ A junc maysch'olnil snab'en, tzcob' sch'oxli to wach' yaji, palta ax junc wach' snab'en, caw tzya'ilj sb'a yet' swach' b'eyb'al.

³⁰ Wach'xam 'ay mach jelan, 'ay snab'en, toxn̈ej niwn tas yojtac, palta matz tac' stenn 'och wan snib'b'en Jehová.

³¹ A eb' soldado, tzyac' lista eb' schej yic tz'at eb' 'a owal, palta cojn yuj Jehová tzya'n ganar eb'.