Pr 20 - Chuj San Sebastian Bible

¹ A eb' tz'u'w 'an̈, tzlaj b'ajwj eb', tzq'ue somnjoc eb' ya'n owal, a mach 'ay snab'en, matz ya't sb'a 'a scal 'u'l 'an̈ cha.

² A junc rey caw wal ow, lajn wal 'icha junc no león tz'el yaw yic tzcot yowal; a mach tzte'wtzej sb'a stzuntzni, 'ay smay scham yu'uj.

³ A mach tzten 'ejm owal, caw wal wach' yico'; ax mach tu snab'en, ton̈j tzwach' tzuntzj owl cha.

⁴ A mach 'isaj, matz munlj 'a yic stiempoal yawx 'awb'en, ax yic stiempoal jach'oj, toc 'ay jac tas tzmolo.

⁵ A tas c'ultac yaj 'a snab'en junc 'anma', lajn wal 'icha a a 'ay 'a yich junc xab', ax junc mach 'ay snab'en, tztac' yojcan 'el junc nab'en cha.

⁶ Til wal eb' tzalni to 'ayn̈j schamc'ojlal eb' 'ayn̈ec, palta jaywn̈ej eb' tztac' ca'nec 'och yipc qui c'ojol.

⁷ A mach tojl snab'en, may tas tzyac' palta 'a sb'eyb'al, caw tzaljc'ojlal tzcan eb' yunnal.

⁸ A yic tz'em wocn junc rey 'a sdespacho sb'eyc'ojlwi, colb'iln̈ej ton̈j tz'och q'ueln 'a junc cha, tzb'oyaj jun tu chi yuj muc'uc.

⁹ May junc mach tztac' yalni to caw wach' snab'en, to may xon jac smul.

¹⁰ A 'echtab' man̈ tz'acnoc yet' ch'an̈lum to 'ec'b'al, a chab' tic, caw wal matz chaj sc'ojl Jehová.

¹¹ Yuj sb'eyb'al junc mach tz'ojcax 'eli to wach' snab'en; wach'xam eb' 'unin, tzcheclj 'el 'a eb' toto wach' eb'.

¹² A Jehová a xb'on qui chicnec yic tzcab'nec, sb'on pax yol qui satec yic tzquilni.

¹³ Man̈ cojnoc wayn̈ tzeyila, toto ma'ay, 'oj jawc meb'a'il 'a eyib'an̈; 'a'c 'ip e munlji sec 'oj yac' sobra tas tze c'uxu.

¹⁴ A eb' tzmanwji, tzyal eb' 'ixtic: Caw maysch'olnil tas tzchon̈x tic, xchi eb'; ax yic tox xlajw smanwj eb' cha, tzyaln pax eb', to caw jeln eb' smanwji.

¹⁵ Til wal q'uen oro yet' q'uen q'uen chan̈ stojl 'a yolyib'n̈q'uinl tic; palta a junc mach tzpaxtin yet' sjelnal, man̈ comnoc tz'ilchji.

¹⁶ Toto 'ay mach tzya'ch sb'a fiadoral yuj junc chuc 'anma'il, tz'e'cn spichul, tzcancn yuj smajnnub'loc junc cha.

¹⁷ A jac tas wach' sc'uxx ton̈j tzyel'j junc mach, man̈x jantcoc swach'l sc'uxx tzyab'i, ax 'oj 'aj 'el'ch 'a slajub', 'icha to q'uen chi wan sc'uxn poj cha.

¹⁸ A junc tas tznalb'ax yoch 'a yoclemal, wach' tz'aj 'el'chi, toto 'ay wach' nab'enal. Tztac' yajx ganar junc owal, toto wach' tz'aj yoch c'umjb'a 'a yib'an̈.

¹⁹ A junc alm peclal, man̈ yojcoc sc'ub'n 'el junc paxti c'ultac yaji, yuj cha, man̈ junc tzex 'ec' yet' jun alm peclal cha.

²⁰ A mach tzb'aj smam snun, 'oj 'ijxoc 'ec' sq'uinal, 'icha junc cantil tztupi.

²¹ A ricoal may yajltacl yilchj muc'uc, ax 'a slajub', cusltac 'oj 'ajx can 'el'chi.

²² May cab' b'a'n̈ tzeyala, to tze pac e b'a, 'a'c 'och e c'ojl 'a Jehová, sec a 'oj e colni.

²³ A wal jun tzo'n̈ 'echtab' man̈ tz'acnoc, caw wal yajb'il 'el yuj Jehová.

²⁴ A Jehová tzon̈ 'i'nec b'eyoc, yuj cha, man̈ cojquec tas 'oj qui chac qui b'a yet'oc.

²⁵ Caw wal 'ay smay toto ji'lti tzcutjec ca'n qui ti 'a Dios, tzlajw cha, tzqui nanec pax qui b'a yuj tas 'aj 'ix ca'c can qui ti cha.

²⁶ A junc rey caw 'ay snab'en, c'uxn tzpechl eb' maysch'olnil 'a stz'ey, tzcan eb' 'a yaln̈ yu'uj.

²⁷ A jun espíritu 'ac'b'il 'ayn̈ec yuj Dios, lajn wal 'icha junc luz, a tzch'oxni tas wal yaj qui nab'enec.

²⁸ A junc rey tzalj sb'eylb'an tojlal, caw wal wach' yaj 'a yopiso.

²⁹ A eb' quelem, yuj yip eb' caw tzalj eb'; ax eb' 'ichmtac 'anma sacx xil sjolom, caw niwn yel'ch eb'.

³⁰ A mach maysch'olnil sb'eyb'al, a yailal a tz'a'n jawc snab'en. Yuj tas tzyab' syal cha, tzyactn sb'on tas tu'.