Pr 2 - Chuj San Sebastian Bible

A tas wach' tzyac' jelnal

¹ Ach wunnal, 'a'ch jun tzo'n̈ in paxti tic 'a a c'ojol, tza moln can jun in checnb'il tic 'a a nab'en.

² 'A'ch wal a chicn 'a yic jelnal, 'ac' ep a nan 'eli.

³ C'an a jelnal yet' a wach' nab'enal 'a smasnil a c'ojol.

⁴ 'Ac' a tiempo a sayn 'ec' jelnal, 'icha tz'aj sayx 'ec' q'uen plata, mto junc ricoal to c'ub'b'il 'eli.

⁵ 'Ixta wal 'oj 'aj snachj 'el o'oj tas tzach 'aj och yiclumal 'a Jehová, 'ixta pax 'oj otc ojcan 'el Dios cha.

⁶ A Jehová a tz'a'n qui jelnal, a spaxti tz'a'n cojcoc 'el wach' nab'enal.

⁷ A Jehová tzcolwj 'a eb' wach' snab'en, atn eb' tzb'ey 'a stojlal.

⁸ Tztan̈wx eb' wach' sb'eyb'al yu'uj, atn eb' yiclum tzyutj sb'a 'a 'a.

⁹ Toto tza chaj ab' in checnb'il, 'oj a b'eylb'oc tojlal, wach'il yet' wach' b'eyb'al.

¹⁰ A yic 'oj jelnb'oc a nab'en, caw 'oj a tzalj yu'uj.

^11-12 Toto tza b'eylb'ej jelnal yet' wach' nab'enal, 'oj ach stench wan 'a tu b'eyb'al, ax ach scoln 'el 'a yol sc'ab' eb' 'anma tu snab'en,

¹³ atn eb' tz'actn can wach' b'eyb'al, tz'atcn eb' 'a scal maysch'olnil.

¹⁴ A eb' 'anma cha, caw tzalj eb' sb'on stu'al, tznan pax eb' sq'uin̈l tas maysch'olnil.

¹⁵ A 'a tu b'eyb'al ata tzya'ch eb' snab'en, tzyactn can eb' wach' b'eyb'al.

¹⁶ Toto tza b'eylb'ej jelnal yet' wach' nab'enal, caw 'oj ach scol-l 'a yol sc'ab' 'ix 'ix 'ay yichmil, atn 'ix 'ajmul 'ix tzach montn yet' jun tzo'n̈ spaxti caw wal wach'.

¹⁷ A 'ix 'ix tzyactj can yichmil yijnac sb'a yet' 'a yic cob'sal, man̈xtzac sna cot 'ix sti ya'jnac can 'a sat Dios.

¹⁸ Toto tzach 'at 'a jun b'e tzc'och 'a yatut junc 'ix 'ix cha, 'icha to wan a 'at 'a jun b'e tz'atcn 'a chamel.

¹⁹ A eb' tz'och 'a yol yatut eb' 'ix cha, man̈xtzac 'elt eb', man̈xtzac meltzj eb' jun 'ejm xo 'a jun b'e yic q'uinal.

²⁰ B'eylb'ej jun b'eyb'al caw wach', tza b'eylb'an sb'eyb'al eb' tojl sb'eyb'al.

²¹ A eb' tojl sb'eyb'al cha, eb' matz ya'ch sb'a 'a scal maysch'olnil, caw najtl 'oj 'ec' cajn eb' 'a sat lum lum tic.

²² Ax eb' tu sb'eyb'al, yet' eb' 'ixtm 'anma', 'oj 'ijxoc 'el eb' 'a sat lum lum tic, 'icha tzyac' junc te te tzto'x q'ueta.