Pr 18 - Chuj San Sebastian Bible

¹ Toto man̈ wach'c cajc yet' quit 'anma'il, cojxn wal tas tzqui nib'jec 'ochi, a chi tzqui sayc 'eq'ui, ax wach' nab'en tzcob' 'ajxc 'ayn̈ec, man̈xtzac qui chajec cab'i'.

² Toto tu qui nab'enec, matz qui nib'jec xon to 'ay tas tzqui cuyec; cojn on̈c wal tzqui nib'jec cal quico'.

³ Toto a maysch'olnil tzqui b'o'ec, tzjaw q'uixwc'ojlal 'ayn̈ec yu'uj, tzon̈ patquilxec 'eli, tzon̈ b'uchxec pax yu'uj.

⁴ A paxti yic jelnal, niwn jelnal tztac' qui'nec 'a 'a, lajn wal 'icha junc a a xab' yich, caw tzsicb' qui c'ojlec yu'uj.

⁵ Man̈ wach'oc toto a eb' 'ay smul, a eb' tz'ajx niwnc'ojlal yuj eb' juez, ax eb' may smul, matz chax 'ab'xc tas tzyal eb'.

⁶ Yuj spaxti eb' 'anma may snab'en, yuj cha, tzq'ue wan owal; yuj spaxti eb' cha, ax sjaw yailal 'a yib'n̈ eb'.

⁷ Yuj spaxti eb' may snab'en cha, tzyi'n cot eb' chaml 'a yib'an̈; yuj tas tzyal eb' cha, 'icha to tzsut'x 'och lasu 'a sjaj eb', tzjalx cham eb'.

⁸ A spaxti eb' alm peclal, lajn wal 'icha junc tas caw wach' sc'uxxi, tzc'och schil 'a spixn eb'.

⁹ A eb' 'isaj yet' eb' ton̈j tzjun 'el junc tas, 'icha to yu'tac sb'a eb'.

¹⁰ A 'a Jehová, ata tzcol sb'a eb' 'anma tojl snab'en, lajn yaj 'a eb' 'icha junc cuartel caw wach' yaji.

¹¹ A eb' rico, a tzyutj eb' snani to a sricoal eb' cha, lajn 'icha junc muro oyn 'och 'a spatquil junc chon̈ab' yic tzcolni.

¹² A b'an̈quinal, tzon̈ yijec 'ejmi, ax 'emmquilal tzon̈ 'ijxec chan̈ yu'uj.

¹³ Toto tzqui comn pacjec junc paxti', yic mantzac cham wal cab'nec tas yaji, ata tzqui ch'oxlc 'eli to may qui nab'enec, tzca'nec pax qui q'uixwloc.

¹⁴ Toto 'ayn̈ec 'och 'a qui yailal, tzca'c techjoc qui yailal cha, tzyal 'el'chi to te'n qui nab'enec; ax toto man̈x te'noc yaj qui nab'enec cha, man̈xtzac techj cujec.

¹⁵ Toto jeln on̈ec, tz'ilchj jelnal chi cujec, yujto tzca'c 'och 'a qui c'ojl qui cuyni.

¹⁶ Yuj tas tzqui siyjec, tztac' sjacw puerta 'ayn̈ec, 'ixta tzon̈ 'ajc qui c'och 'a eb' 'anma niwc yopiso.

¹⁷ A eb' tzb'ab'l alj sb'a 'a eb' yajal, 'icha to tztac' scoln sb'a eb' snani; palta ax yic tzc'och jun 'ay yowl chi yet' eb' cha, tzcheclj 'eli tas yilx jun yowl eb' cha.

¹⁸ A yic tzch'oxn 'el Dios snab'en 'a suerteal, tztup 'ejm owal, tzpojn snan̈l eb' 'ay yowl cha.

¹⁹ Toto tzca'c owl yet' junc cu'tac, caw 'ajltac yochx 'a junc'ojlal quet'ec, 'a yib'n̈ to tzca'c ganar yem junc chon̈b' wach' yajch smuroal, yujto caw wal tzatzb' snab'en jun chi 'icha wal junc puerta tzatz yajch yijul.

²⁰ A tas tzcalec, tztac' yi'n cot yailal mto tzaljc'ojlal 'ayn̈ec.

²¹ A qui paxti'ec, tztac' yi'n cot chamel mto q'uinl 'a quib'n̈ec, yuj cha, wach' tzcham wal qui nanec tas tzcala, sec wach' tzon̈ 'elc c'ochi.

²² A yic tz'och yistzil win winac, tz'ilchj tzaljc'ojlal yu'uj; tzyal 'el'chi to tzchaj swach'c'ojlal Dios.

²³ A eb' meb'a', caw 'emmquilal stew eb' 'a mach 'aj tzyal sb'a; ax eb' rico, caw niwquil tzyutj eb' yol sjaj yic tzta'w eb'.

²⁴ 'Ay eb' caw niwn eb' swach'c'ojl yalni, ax yic tzjaw yailal 'a yib'n̈ eb', toc 'ay mach tzcoln eb'; palta 'ay pax eb' 'ay swach'c'ojol, yel xo wach' eb' 'a yib'n̈ eb' to yu'tac sb'a yet' eb'.