Pr 16 - Chuj San Sebastian Bible

¹ An̈ 'anman̈ec tic, 'ay calnec quic qui nanec tas tzqui b'o'o, palta a Jehová a tztac' yalni tas tz'aj 'el'chi.

² Toto tzcalec to wach'n̈j tas tzqui b'o'ec, palta a Jehová a tzb'eyc'ojlan smasnil tas nab'il cujec cha.

³ A smasnil tas tzlaj qui nib'c qui b'o', ca'c 'ab'enal 'a yol sc'ab' Jehová, sec 'oj 'el'choc tas nab'il cujec.

⁴ A Jehová, a xb'on can smasnil tas yic tz'el'ch tas nab'il yu'uj; an̈jtona', a 'ix aln cani to a eb' 'anma maysch'olnil snab'en, a eb' 'ay yaln yic 'a yailal.

⁵ Caw matz chaj sc'ojl Jehová toto b'an̈quintac tzlaj cutquec qui b'a; a mach b'an̈quintac, tojln̈ej yajx 'och syailal.

⁶ Toto tzqui chamc'ojlejec eb' quit 'anma'il, toto yiclum tzcutjec qui b'a, to 'ixta', tz'ajx niwnc'ojlal qui mulec; toto 'ay yel'ch Jehová 'a qui satec, yajn̈ej tzon̈ 'elc 'a scal maysch'olnil.

⁷ Toto tzchaj sc'ojl Jehová qui b'eyb'alec, to 'ixta', ax eb' 'ajc'ojl yajch 'ayn̈ec, tz'och eb' 'a junc'ojlal quet'ec.

⁸ Yel xo wach' toto tzon̈ munljec 'a stojlal, wach'xam jab' wal tas tzca'c ganar 'a qui munljelec, 'a yib'n̈ to niwn tzcac' ganar 'a spatc munljel man̈ tojloc.

⁹ An̈ 'anman̈ec tic, si'mb'il tzqui nac tas tzqui b'o'o, ax Jehová a tztac' yalni tas tzon̈ 'ajc 'el'chi.

¹⁰ A junc win rey, schecb' Dios yaj winac, yuj cha, man̈ smojc yaln win tas to matz chaj sb'a yet' tojlal.

¹¹ Smasnil 'echtab' yet' q'uen libra tz'acan, caw tzchaj sc'ojl Jehová. A aljnac cani yuj cha, 'ay 'echtab'.

¹² A eb' rey, man̈ smojc sb'on eb' tas to man̈ tojloc, yujto a tojlal, a chi 'aych yipc yopiso eb'.

¹³ A eb' rey, caw nib'b'il eb' tzpaxtin 'a caw yel yuj eb', caw tzalj eb' rey chi yet' eb'.

¹⁴ A yowl sc'ojl win rey, chaml tzyij coti, ax eb' jeln snab'en, a eb' tzsayn sb'omb'il tas tz'aj yec' yowl sc'ojl win cha.

¹⁵ Toto tzewj sat win rey, to 'ixta', may chamel. A swach'c'ojlal winac, lajn wal 'icha 'asn yic b'ab'l n̈ab'.

¹⁶ Yel xo wach' a jelnal tzqui sayc 'ec' 'a yib'n̈ to tzqui sayc 'ec' q'uen oro. Yel xo pax wach' to a wach' nab'enal tzqui sayc 'eq'ui, 'a yib'n̈ to tzqui sayc 'ec' q'uen plata.

¹⁷ Toto tojl qui b'eyb'alec, tzqui'nec 'el qui b'a 'a scal maysch'olnil; toto tzca'c cuenta qui b'eyb'al, wan qui ya'ilnec qui b'a tzyal cha.

¹⁸ Toto tzqui b'an̈c qui b'a, tzon̈ 'ijxec 'ejmi; toto tzquijec chan̈ qui b'a, 'oj quijxec 'ejm 'a slajub'.

¹⁹ Yel xo wach' 'emmquilal tzlaj cutquec qui b'a, junn̈j pax tzon̈ canc yet' eb' meb'a', 'a yib'n̈ pax to tzqui nib'jec to rico on̈c yet' eb' b'an̈quintac yeq'ui.

²⁰ Toto tzqui chajec cab' cuynb'il, 'oj 'ilchjoc swach'l cujec; toto tzca'c 'och Jehová yipc qui c'ojol, caw wach' quiquec.

²¹ Toto jeln on̈ec, 'oj alxoc cujec, to 'ay qui nab'enec; yuj qui paxti nib'jub'tac yalxi tzmontchj eb' 'anma cujec.

²² A mach tznachj 'el yu'uj, 'oj scha sq'uinal, palta ax mach tu snab'en, nab'an̈ej tzquixtjec qui b'a qui cuyni.

²³ A eb' jelan, tzna eb' tas tzyutj paxtinc sb'a eb', yuj cha, 'ay eb' tzmontchj yuj spaxti eb' cha.

²⁴ A paxti wach', lajn wal 'icha no yal chab', tzon̈ tzaljec chan̈ yu'uj, tz'och pax quipc yuj tzcab'i.

²⁵ 'Ay b'eyb'al to caw wach' qui nanec, palta ax 'a slajub', a 'a chaml tzon̈ yijec 'ati.

²⁶ A mach tznib'j sb'o junc tas, wach' yico'; yujto a tas tznib'j cha, a chi tzpechn munljoc.

²⁷ A mach maysch'olnil snab'en, cojn maysch'olnil nab'iln̈ej yu'uj; a paxti tzyala, lajn 'icha c'ac' tzn̈usn junc tas.

²⁸ A junc mach tu snab'en, saym owl 'a scal 'anma', ax junc alm peclal, tzchac sb'a eb' swach'c'ojl sb'a yu'uj.

²⁹ A junc mach tzcomn ma'wji, tzyixtj 'el eb' swach'c'ojol, ax 'a b'eyb'al man̈ tojloc, ata tzyij can 'at eb'.

³⁰ A junc mach wan yec' 'a snab'en sb'on maysch'olnil, tzmutz'mutz'n yol sat, tzc'uxn sb'a sti'.

³¹ A mach sacx sjolom, 'icha to scorona yaj jun cha, atn chi tzyac' ganar yuj swach' b'eyb'al.

³² Yel xo wach' niwn tzcutjec qui c'ojol, 'a yib'n̈ pax to c'un scot cowlec. Yel xo pax wach' mun tzqui yamc 'och wan qui b'a, 'a yib'n̈ pax to tzcan junc chon̈b'al 'anma 'a yaln̈ cu'uj.

³³ Wach'xam tzca'c 'och suerte 'a yib'n̈ junc tas, palta a Jehová, a 'ojtnac tas snab'en 'a yib'an̈.