Pr 15 - Chuj San Sebastian Bible

¹ A mach wach' tzyutj spacn junc paxti', tztup 'ejm owl yu'uj; ax toto ow tzyutj spacni, ton̈j tzwach' niwtj junc owl chi yu'uj.

² A yic tzpaxtin eb' 'ay snab'en, caw tzchaj eb' 'anma yab' sjelnal eb' cha; a pax yic tzpaxtin eb' may snab'en, cojn tas may yel'ch tzlaj yal eb'.

³ 'Ayc'n̈ej Jehová 'a smasnil lugar, q'uelnn̈ej 'och 'a eb' wach' yet' 'a eb' maysch'olnil.

⁴ A paxti wach', tzyac' sniwnal qui c'ojlec, 'icha to tzon̈ ya'c pitzwoc; ax paxti maysch'olnil, tzon̈ yixtjec 'eli, caw wal tzyab' qui pixnec syal yu'uj.

⁵ A eb' may snab'en, caw matz chaj eb' yab' tennb'il tzyac' smam 'a 'a, ax eb' tzchaj yab'i', wan sch'oxn 'el eb', chajtlto 'ay snab'en eb'.

⁶ Til wal tas 'ay 'a yatut eb' wach' snab'en; ax eb' maysch'olnil sb'eyb'al, cojn somc'ojlal tzyij cot eb' 'a yib'n̈ yuj tas tzyac' ganar.

⁷ A eb' jelan, tzyal-l eb' jelnal cha; ax eb' may snab'en, caw may yel'ch tas tzyal eb'.

⁸ A eb' maysch'olnil sb'eyb'al, matz chaj sc'ojl Jehová xajmb'al eb', ax pax eb' tojl snab'en, caw tzchaj sc'ojl yab'n slesl eb'.

⁹ Caw wal matz chaj sc'ojl Jehová stu b'eyb'al eb' maysch'olnil, palta 'ay schamc'ojlal 'a eb' tojl sb'eyb'al.

¹⁰ A mach tz'actn can wach' b'eyb'al, yowlal tz'ajx cuenta; toto tzpatquilj can 'el tennb'il tz'ajx 'a 'a, 'oj chamoc.

¹¹ A xab'l yich sjul-l chamel checl yaj 'a sat Jehová, ocxom wal snab'en 'anma', caw wal checl yaj 'a 'a.

¹² A mach ch'an sc'ojlani, matz yal sc'ojl to 'ay mach tz'a'n cuenta, toxn matz c'anb'j pax jac snab'en 'a eb' jelan.

¹³ A mach tzalji, tzewj sat, ax mach tzcusi, cusltac yilx sat cha.

¹⁴ A mach 'ay snab'en, a jelnal tzsayq'ui, ax pax eb' may snab'en, caw wal tzalj eb' yet' sman̈ nab'enal cha.

¹⁵ Toto 'aych junc mach 'a somc'ojlal, caw wal ya yec' junjn c'u yu'uj; ax toto tzalji, caw wach'n̈j yec' tiempo chi yu'uj.

¹⁶ A junc meb'a to 'ay yel'ch Jehová 'a sat, yel xo wach' yic 'a yib'n̈ junc rico to somc'ojlaln̈ej yaji.

¹⁷ Wach'xam 'itj tzqui loc yet' eb' tzon̈ mol wac yet'oc, toto 'ay chamc'ojlal 'a qui calc yet' eb', yel xo wach' quiquec 'a yib'n̈ to cob' chib'j tzqui chic yet' eb', palta owln̈ej pax cajc yet' eb'.

¹⁸ Toto c'un scot cowlec, cojn owl tzq'ue wan cujec; ax toto niwn qui c'ojlec, tzca'c tup owal.

¹⁹ A 'a eb' 'isaj, 'icha to 'ay 'ejm q'uix 'a yol sb'e eb'; ax eb' wach' snab'en, caw tojl sb'e eb', may tas 'ay 'ejm 'a yol sb'e eb' cha.

²⁰ A eb' 'unnab'il wach' snab'en, caw tzyac' eb' tzaljb'oc sc'ojl smam snun; ax eb' may snab'en, tzpatquilj can 'el eb' smam snun cha.

²¹ Toto may qui nab'enec, caw tzca'c tzaljb'oc qui c'ojlec yet' qui man̈ nab'enal cha; ax toto 'ay qui nab'enec, caw tzqui ya'iljec qui'n b'ey qui b'a.

²² Toto matz cham wal qui c'anb'nec 'ec' junc tas, a tas tzqui na'a, caw tzjuw 'eli; ax toto tzqui chajec cab' wach' nab'enal, caw wach' tzon̈ 'ajc 'el'chi.

²³ Caw wach' tzcab'ec toto wach' tzcutjec qui pacn junc paxti', man̈x jantcoc swach'il, toto tzchaj sb'a qui paxtinec.

²⁴ A jun b'e yic q'uinal, 'ixtc tzq'ue'i, yuj cha, a eb' jelan, matz 'ejm eb' 'a jun b'e yic chamel.

²⁵ A Jehová a tz'a'n lajwc 'ejm tas 'ay 'a eb' tzyij chan̈ sb'a; palta tzcol tas 'ay 'a eb' 'ix 'ix chamnc yichmil.

²⁶ Matz chaj sc'ojl Jehová tas nab'il yuj eb' maysch'olnil sb'eyb'al, ax jun tzo'n̈ wach' paxti', caw tzchaj sc'ojol.

²⁷ A mach til wal tas tznib'j 'ochi, caw tzjuw 'el yol yatut yu'uj; ax toto matz chaj q'uen c'ultac tumin, 'oj najtxb'oc sq'uinal.

²⁸ A mach tojl snab'en, tzna wal si'mb'il tas tzyutj ta'wc sb'a; ax junc tu snab'en, caw matz na sb'a yaln jun tzo'n̈ tu paxti'.

²⁹ Caw najt yajl Jehová 'a stz'ey junc maysch'olnil sb'eyb'al, palta toto tojl snab'en, caw chab'il slesl yu'uj.

³⁰ A mach tzewji, tzon̈ tzaljec chan̈ yu'uj; a junc wach' 'ab'ix, caw tz'och quipc yuj tzcab'i.

³¹ A mach tzchaj tennb'il to yic q'uinl yaji, 'ay yaln yic sc'och 'a scal eb' jeln snab'en.

³² Toto 'ay mach matz chaj 'ajxoc cuenta sb'a, mun tzpatquilj can 'el sb'a; ax toto tzchaj 'ajxoc cuenta sb'a, caw 'oj yic' sjelnal.

³³ A mach 'ay yel'ch Jehová 'a sat, caw tzq'uib' sjelnal; toto tznib'j to niwn yel'chi, yowlal 'emmquilal tzyutj sb'a b'ab'el.