Pr 14 - Chuj San Sebastian Bible

¹ A 'ix 'ix jeln snab'en, caw tzb'o 'ix yol yatut, ax 'ix may snab'en, ton̈j tzwach' 'a'j lajwc 'ejm yol yatut cha.

² A eb' wach' sb'eyb'al, caw 'ay yel'ch Jehová 'a sat eb'; ax eb' tu sb'eyb'al, toc 'ay yel'ch 'a eb'.

³ A 'a tas tzyal junc may snab'en, ata tzpitzw chan̈ b'an̈jb'ail, yuj cha, tzcot yailal 'a yib'an̈; ax pax tas tzyal junc 'ay snab'en, a chi tzcoln 'eli.

⁴ Toto may no wacx tzt'ocw lu'um, may sat 'awb'en tzmolx 'a yol sc'un̈ail; yuj yip no wacx cha, caw niwn tas tzmolxi.

⁵ A eb' testigo wach', may 'es tzyac' eb'; ax eb' testigo tu', 'esn̈j tzyac' eb'.

⁶ Toto tzqui b'an̈c qui b'a, wach'xam tzqui sayc 'ec' jelnal, palta matz 'ilchj cujec; ax toto wach' qui nab'enec, caw yajn̈j cha, tz'ilchj jelnal chi cujec.

⁷ Wach' toto tzquijec 'el qui b'a 'a stz'ey eb' tu snab'en, yujto a tas tzyal eb', may jac qui jelnal 'oj qui'c 'a spatic.

⁸ A sjelnal eb' jelan, a tz'a'n yojcoc 'el eb' tas tzb'o'o, ax sman̈ nab'enal eb' tu snab'en, a tz'ixtn 'el eb'.

⁹ A eb' tu snab'en, may tas tzna eb', wach'xam tu tas tzb'o eb'; ax eb' tojl snab'en, man̈ comnoc tzuntzj cot eb' yowl 'a scal 'anma'.

¹⁰ Junjn on̈ec, mun cojtquec tas qui somc'ojlalec, mto qui tzaljc'ojlalec; a eb' chuc 'anma'il may yaln eb' yic 'a 'a.

¹¹ A tas 'ay 'a eb' maysch'olnil sb'eyb'al, 'oj lajwc 'ejm 'a eb'; ax tas 'ay 'a eb' tojl sb'eyb'al, 'oj niwtjoc cha'an̈.

¹² 'Ay wal b'eyb'al caw wach' qui nanec, palta ax 'a slajub', a 'a chaml tzon̈ yijec 'ati.

¹³ Wach'xam 'ay tas ya tzcab'ec, palta tzon̈ tzewjec cab'i', yic matz qui ch'oxc 'eli. A 'a scal qui tzaljc'ojlalec, ata 'ay pax qui cusc'ojlalec.

¹⁴ Toto tu qui nab'enec, maysch'olnil tas 'oj qui cha spacc yuj tas tzqui b'oc cha; ax toto wach' qui nab'enec, wach' tas 'oj qui chac spacoc.

¹⁵ Toto may qui nab'enec, ton̈j tzqui chajec cab' smasnil tas tzalx 'ayn̈ec; ax toto 'ay qui nab'enec, tzcham wal qui nanec 'aj wan qui 'atec.

¹⁶ Toto 'ay qui nab'enec, tzon̈ xiwc 'a tas 'ay smay, tzqui'nec 'el qui b'a 'a scal maysch'olnil, ax toto tu qui nab'enec, caw tzqui b'an̈c qui b'a, may yel'ch junc tas 'a qui satec.

¹⁷ Toto c'un scot cowlec, caw man̈ wach'c tas tzqui b'oc 'ixta'; an̈jtona', toto si'mb'il wal tzqui na'ec yic tzqui b'onec tas tu 'a junc quit 'anma'il, caw wal tz'och eb' 'anma 'ajc'ojlal 'ayn̈ec.

¹⁸ A eb' may snab'en, tzchaj eb' spac yico', a tzyal sman̈ nab'enal eb' cha; ax eb' 'ay snab'en, caw 'oj q'uib' sjelnal eb'.

¹⁹ A eb' maysch'olnil sb'eyb'al, tz'em n̈ojn eb' 'a yojltac eb' wach'; tzlaj tewc 'och eb' 'a smac yatut eb' tojl snab'en.

²⁰ A eb' meb'a', caw wal tzpatquilx can 'el eb' yuj eb' yit 'anma'il; ax pax eb' rico, til wal swach'c'ojl eb'.

²¹ Tz'och qui mulec toto tzqui patquiljec can 'el eb' quit 'anma'il, palta caw wach' quiquec, toto tz'o'ch qui c'ojlec 'a eb' meb'a'.

²² A eb' cojn maysch'olnil tznib'j sb'o', satnc xo eb' 'a sb'e; ax eb' to a wach' tznib'j sb'o', caw tzchaml sc'ojl eb' 'anma yet' eb', tz'o'ch pax sc'ojl eb' 'a eb'.

²³ Toto tzca'c 'ip qui b'onec smasnil qui munljel, caw 'ayn̈j tas tzquijec 'a 'a; ax toto cojn paxti tzqui b'o'ec, caw tzquijec cot meb'a'il 'a quib'an̈.

²⁴ A eb' 'ay snab'en, tz'ijx chan̈ eb' yuj sjelnal, ax eb' tu snab'en, tzpatquilx can 'el eb' yuj stu nab'enal.

²⁵ A eb' testigo to yel tas tzyala, tzcolcn 'el eb' yit 'anmal 'a chamel; ax eb' testigo 'a'm 'es, ton̈j tzyixtj 'el eb' yit 'anma'il.

²⁶ Toto 'ay yel'ch Jehová 'a qui satec, caw te'n cajc tzyal cha, to 'ixta', 'oj stac' pax scoln sb'a eb' cunnalec.

²⁷ Toto 'ay yel'ch Jehová 'a qui satec, caw 'ay qui q'uinlec, tzon̈ 'ijxec 'el 'a yol sc'ab' chaml yu'uj.

²⁸ A junc rey 'aych yajlil 'a junc niwquil chon̈ab', caw wal b'inab'il si'mb'il; palta toto yunen̈ej junc chon̈b' 'aj 'aych yajlil, to 'ixta', 'oj lajwoc 'ejmi.

²⁹ Toto 'ay qui niwnc'ojlalec, tzyal 'el'chi jeln on̈ec; palta toto c'un scot cowlec, tzyal 'el'chi to may qui nab'enec.

³⁰ Toto junc'ojlaln̈ej cajec, caw wach' qui c'ojlec, ax toto 'ay qui chichnc'ojlalec, caw tzc'uxx 'ejm qui b'aclec yu'uj.

³¹ Toto tzquixtjec eb' meb'a', caw tzqui patquiljec can 'el Dios, atn jun mach b'ojnac eb'. Palta toto tz'o'ch qui c'ojlec 'a eb', wan qui ch'oxnec 'eli to 'ay yel'ch Dios 'a qui satec.

³² Toto maysch'olnil qui b'eyb'alec, mun a qui maysch'olnilal chi tz'i'n cot 'a quib'n̈ec; ax toto wach' qui b'eyb'alec yic 'oj qui chamec, 'ay jun tas 'aych yipc qui c'ojol.

³³ Toto 'ay qui nab'enec, a jelnal tzon̈ 'i'nec b'eyoc; ax toto may qui nab'enec, matz nachj 'el jun jelnal chi cujec.

³⁴ A junc nacion̈ 'aj tzb'eylb'ax tojlal, caw 'oj 'ijxoc cha'an̈; palta ax junc nacion̈ 'aj tzb'eylb'ax maysch'olnil, caw 'oj q'uixw can 'eli.

³⁵ A eb' checb' caw 'ay snab'en, caw tzalj win rey yet' eb', ax eb' checb' to tz'i'n 'el sq'uixwel winac, caw tzcot yowl win 'a eb'.