Pr 12 - Chuj San Sebastian Bible

¹ Caw 'ay qui nab'enec toto tzqui chajec 'ajxoc cuenta qui b'a, ax toto matz qui chajec 'ajxoc cuenta qui b'a, caw may qui nab'enec.

² A Jehová tzyac' syaxilal 'a eb' wach' snab'en, ax 'a eb' tu snab'en, tzyac' cot yailal 'a yib'n̈ eb'.

³ A eb' a maysch'olnil 'aych yipc sc'ojol, lajn wal eb' 'icha junc n̈a b'ob'il 'a yib'n̈ arena; ax pax eb' wach' sb'eyb'al, tec'tec' yaj eb' 'icha junc te 'ay sch'an̈l yib'.

⁴ A 'ix 'ix caw wach'n̈j tas tzb'o'o, 'icha wal junc corona yaj 'ix 'a win yichmil, caw tzalj win yet' 'ix. Ax 'ix 'ix tu sb'eyb'al jun, 'icha to 'aych syab'il win yichmil 'ix chi yu'uj, masnto tzc'och yab'n win syal 'a yol sb'acl yuj 'ix.

⁵ A eb' 'anma wach' snab'en, cojn tas wach' an̈j chi tzna eb'; palta matz ca'c 'och yipc qui c'ojl snab'en eb' tu snab'en.

⁶ A tas tzyal eb' 'anma maysch'olnil snab'en, tzcham 'anma yu'uj; ax pax spaxti eb' wach' snab'en, tzcolchj 'anma yu'uj.

⁷ A yic tzcham eb' maysch'olnil, tzsatcn 'el eb' 'a jun 'ejmn̈ej; ax eb' wach' snab'en, caw niwn tiempo 'oj yil eb' yet' yunnal.

⁸ Tzalx wach' paxti 'a eb' 'anma yuj sjelnal; ax eb' may snab'en, caw patcab'il 'el eb'.

⁹ Wach' yic eb' to may wal yel'chi, palta 'ay schecb' eb' tz'a'n servil, 'a yib'n̈ pax eb' cob' niwquil tzyutj sb'a, palta may wal tas wach' tzc'ux eb'.

¹⁰ A eb' wach' snab'en, tzya'ilj eb' scajb'en noc', ax eb' tu snab'en, caw tzyixtj eb' e no'.

¹¹ Toto tzon̈ munljec 'a sat qui lu'um, caw 'ay tas tzqui c'uxec; ax toto cojn 'a tas may jac yel'chi, an̈jta tz'ec' tiempo cujec, to 'ixta', caw may qui nab'enec.

¹² A eb' may Dios 'a sat, tznib'j eb' yajn̈ej tz'och ricoal yuj tas maysch'olnil tzb'o'o; ax eb' wach' snab'en, a smunljel eb' a tz'a'n tas 'ay tz'och yuj eb'.

¹³ Toto tu qui paxtinec, mun a qui paxti'ec chi tz'i'n cot 'a quib'an̈; ax toto wach' qui nab'enec, tzon̈ 'elc can 'a scal yailal.

¹⁴ Junjn on̈ec tzqui chajec spac tas tzcala, tzqui chanec pax spac tas tz'el qui b'onec.

¹⁵ A eb' may snab'en, a tzyutj eb' snani to wach'n̈j smasnil tas tz'el sb'on eb', ax eb' 'ay snab'en, tzchaj eb' yab' tas tzalx 'a 'a.

¹⁶ Toto may qui nab'enec, caw yajn̈ej tzqui ch'oxnec 'el cowal; ax toto 'ay qui nab'enec, wach'xam tzon̈ 'ixtxec, palta ton̈j tz'ec' 'el junc chi cujec 'ixta'.

¹⁷ A eb' testigo to wach'n̈j snab'en, yeln̈j tas tzyal eb'; ax eb' testigo to 'ixtm 'anma xoni, cojn 'es tzyal eb'.

¹⁸ A eb' amancotn spaxtini, tzyac' cus eb' sc'ojl yit 'anmal yet' spaxti tzcomn alej, ax eb' wach' snab'en, caw tzniwnc'ojlax eb' 'aych 'a scusc'ojlal yuj spaxti eb' tzyala.

¹⁹ A eb' tzpaxtin wal 'a yel, may b'a'n̈ 'oj satl eb'; ax eb' 'a'm 'es, yajn̈j wal cha, tzsatl eb'.

²⁰ Cojn 'ixtj 'anma 'aych 'a sc'ojl eb' tu tas tznib'j sb'o', ax eb' to a junc'ojlal tzsayq'ui, caw tzaljc'ojlal yic eb'.

²¹ A eb' wach' snab'en, may tas tu tzjaw 'a yib'n̈ eb'; ax eb' tu sb'eyb'al, caw wal tzactzj eb' yuj yailal tz'el-l 'a yib'an̈.

²² Tzchacl Jehová eb' 'a'm 'es, ax eb' matz 'ixtn yit 'anma'il, caw tzalj yet' eb'.

²³ Toto 'ay qui nab'enec, matz quijec chan̈ qui b'a yet' tas cojtac; ax toto may qui nab'enec, tzqui comn aljec 'el qui man̈ nab'enal cha.

²⁴ A eb' tzmunlji, 'oj 'och schecb' eb'; ax eb' 'isaj, 'oj 'och eb' checb'al.

²⁵ A somc'ojlal, caw wal tzyac' cus qui c'ojlec; ax junc wach' paxti', to tzyac' qui tzaljc'ojlalec.

²⁶ Toto wach' qui nab'enec, tzqui jucb'tzejec eb' quit 'anmal 'a swach'il, ax toto tu qui nab'enec, caw tzquijec 'at eb' quit 'anmal chi 'a maysch'olnil.

²⁷ A eb' ma'm noc' to 'isaj, matz b'o eb' schi no noc' chi tzyamchj yu'uj; ax eb' c'asan, caw tzyac' eb' snab'en sc'uxn tas tzyij cha.

²⁸ A sb'eyb'al eb' wach' snab'en, a tz'a'n sq'uinl eb'; a jun b'eyb'al cha, may chaml tzyij coti.