Pr 10 - Chuj San Sebastian Bible

A junc'aj spaxti Salomón

¹ A jun tzo'n̈ tic spaxti Salomón: A junc 'unnab'il 'ay snab'en, tzyac' tzaljb'oc sc'ojl smam snun, palta ax eb' may snab'en, caw tzyac' eb' cus sc'ojl sman snun cha.

² A mach tz'och ricoal yuj maysch'olnil, matz 'och jun tzo'n̈ chi swach'loc, ax eb' wach' sb'eyb'al, tzcolx 'el eb' 'a yol sc'ab' chaml yu'uj.

³ A Jehová matz chaj jawc wejl 'a yib'n̈ eb' wach' sb'eyb'al, palta ax eb' maysch'olnil sb'eyb'al, matz tzchaj yac' eb' sgana yet' tas tznib'j cha.

⁴ A eb' matz nib'j munljoc sb'a, 'oj 'och eb' meb'a'il, ax eb' tzmunlj si'mb'il, 'oj 'och eb' ricoal.

⁵ A eb' 'ay snab'en, caw tzmolb'tzej eb' sat yawb'en 'a yic stiempoal, ax eb' cojn wayn̈ tzb'o 'a yic stiempoal smolb'tzax sat 'awb'en cha, caw tzyac' eb' sq'uixwloc smam.

⁶ Wach' yic eb' wach' snab'en, ax eb' tu' snab'en jun, a maysch'olnil chi tz'i'n cot 'a yib'n̈ eb'.

⁷ A eb' wach' snab'en, caw tznax cot eb' 'a tzaljc'ojlal; ax eb' maysch'olnil sb'eyb'al, toc 'ayt mach tznan cot eb'.

⁸ A eb' 'ay sjelnal, caw tzchaj eb' yab' checnb'il tzalx 'a 'a, palta ax eb' cojn comn paxti tzyala, 'oj satcn 'ejm eb' 'a 'ichn̈jta'.

⁹ A eb' wach' sb'eyb'al, may 'aj 'oj xiw eb'; ax eb' tu tzyutj sb'a, 'oj jawc 'a yib'n̈ eb'.

¹⁰ A eb' tzmutz'mutz'n yol sat snan maysch'olnil, caw tzyij cot eb' niwc yailal 'a yib'an̈. A eb' cojn comn paxti tzyala, 'oj satcn 'el eb'.

¹¹ A spaxti eb' wach' sb'eyb'al, a tz'a'n 'ejm wach' 'a scal 'anma', ax 'a scal spaxti eb' tu sb'eyb'al, ata c'ub'b'il 'el 'ixtj 'anma'il.

¹² A eb' 'ay schichnc'ojlal, caw tzsay eb' tas tz'aj spitzw chan̈ owal, ax eb' 'ay schamc'ojlal, tzya'n̈j eb' niwnc'ojlal yuj tas tz'aj yixtxi.

¹³ A eb' 'ay snab'en, caw tzcheclj 'el eb' a yic tzpaxtini; ax eb' may snab'en, tzxumx 'och jixc'ab'te' 'a eb'.

¹⁴ A eb' jelan, matz yij chan̈ sb'a eb' yet' sjelnal cha; ax eb' may snab'en, caw 'ay xo smay jun tzo'n̈ paxti tzyal eb'.

¹⁵ A ricoal, a tzcoln 'el eb' rico; ax meb'a'il a tz'a'n lajwc 'ejm eb' meb'a'.

¹⁶ Toto wach' qui b'eyb'alec, 'oj qui chac qui q'uinal; ax toto tu qui b'eyb'alec, maysch'olnil tas 'oj qui chac qui b'a yet'oc.

¹⁷ A eb' tzchan 'ab'nc tennb'ilal, 'oj 'ilchjoc sq'uinl eb' yu'uj; ax eb' matz chan 'ab'noc, 'oj satl eb'.

¹⁸ A eb' 'a'm 'es, tzc'ub'j 'el eb' schichnc'ojlal, ax eb' alm peclal, may snab'en eb'.

¹⁹ A eb' niwn tas tzyala, tz'och smul eb' 'a scal spaxti cha; ax eb' jab' wal tas tzyala, caw 'ay snab'en eb'.

²⁰ A spaxti eb' wach' snab'en, caw niwn yel'chi, lajn 'icha q'uen plata caw wach'; ax pax snab'en eb' tu sb'eyb'al, caw may jac yel'chi.

²¹ Yuj spaxti eb' wach' snab'en, til wal eb' tzb'o snab'en yuj spaxti eb' cha; ax eb' tu snab'en, mun tzcham eb' yuj stu nab'enal.

²² Yuj swach'c'ojlal Jehová tz'och junc mach ricoal, man̈ yujoc to caw wal tzyixtj sb'a smunlji.

²³ A eb' tu snab'en, caw tzalj eb' sb'on maysch'olnilal, ax eb' 'ay snab'en, caw tzalj eb' yuj sjelnal.

²⁴ A eb' maysch'olnil sb'eyb'al, a tas 'aj tzxiw eb', a jun tzo'n̈ chi tzjaw 'a yib'n̈ eb', ax eb' wach' snab'en, tz'el'ch tas tznib'j eb'.

²⁵ A yic tzjaw yailal 'icha junc chacxuxm 'ic', tzsatcn 'el eb' maysch'olnil sb'eyb'al yu'uj, ax eb' wach' sb'eyb'al, te'nn̈ej yaj eb' 'a jun 'ejmn̈ej.

²⁶ A eb' tzchecb'an eb' 'isaj, caw tzyab' eb' syal yuj eb', yujto matz yij sb'a jun checnb'il chi yuj eb'. Lajn 'icha wal syal s'at spajl no vinagre 'a yib' que, mto 'icha wal syal s'at tab' 'a yol qui sat, 'ixta yaj eb' 'a eb' tzchecn cha.

²⁷ A eb' 'ay yel'ch Jehová 'a sat, caw 'oj najtxb'oc sq'uinl eb', ax eb' maysch'olnil sb'eyb'al, 'oj tzu'xoc sq'uinl eb'.

²⁸ A tas wan sjaw 'a yojltac eb' wach' sb'eyb'al, atn tzaljc'ojlal; ax tas wach' tan̈b'il yuj eb' maysch'olnil sb'eyb'al, matz 'el'chi.

²⁹ A Jehová, a tztan̈wni eb' wach' tas tzb'o'o, ax eb' tu tas tzb'o'o, tzsatx 'el eb' yu'uj.

³⁰ A eb' tojl sb'eyb'al, najtl 'oj 'ec' eb', ax eb' tu sb'eyb'al, jab' wal tiempo 'oj 'ec' eb' 'a sat lum lum tic.

³¹ A eb' wach' snab'en, an̈j jelnal tzyal eb', ax eb' tu spaxtini, 'oj tenxoc 'och wan eb'.

³² A eb' wach' snab'en, an̈j wach' paxti tzyal eb'; ax eb' maysch'olnil snab'en, cojn tu paxti tzyal eb'.