Pr 1 - Chuj San Sebastian Bible

Tz'el yich spaxti Salomón

¹ A jun tzo'n̈ tic spaxti Salomón, win yunnal David sreyl chon̈b' Israel.

² 'Ix tz'ib'x cani sec wach' tzalx 'el jelnal yet' cuynb'il. Tzcolwj jun tzo'n̈ paxti tic yic tz'ojcax 'el jun tzo'n̈ paxti to caw 'ay yel'chi.

³ Yu'uj tztac' qui b'eylb'anec jelnal, wach'il, tojlal, yet' pax te'nal.

⁴ A snib'b'en Salomón to tzq'uib' snab'en eb' quelem, eb' to mant 'a snab'en. Tz'ajx yojcoc 'el eb' jun tzo'n̈ nab'en tic, sec tzyil cot sb'a eb'.

⁵ A eb' 'ay snab'en yet' eb' 'ay sjelnal, smaclc cab' eb' yab'i', sec tzwach' q'uib' snab'en eb', yet' sjelnal eb'.

⁶ A jun tzo'n̈ paxti tic, tzcolwji yic tznachj 'el sc'ultac paxti eb' jelan, yet' jun tzo'n̈ spaxti eb' caw 'ajltac snachj 'eli.

⁷ A eb' tznib'j jeln tz'aji, 'ay cab' yel'ch Jehová 'a sat eb'; a eb' may snab'en, caw matz nib'j eb' yab' jun tzo'n̈ jelnal yet' cuynb'il.

Jun tzo'n̈ nab'en tzyac' Salomón

⁸ Tzyal Salomón 'ixtic: Ach wunnal, maclj wal ab' a cuynb'il tzwac'a, man̈ a patquilc can 'el a cuynb'il tzyac' pax a nun.

⁹ Yuj jun tzo'n̈ nab'en tic, ax sb'o a b'eyb'al, 'icha wal tz'aj sb'o yilx eb' 'ix 'ix yuj q'uen ton̈, mto yuj junc corona.

¹⁰ Toto a eb' maysch'olnil sb'eyb'al, tznib'j eb' tzach smontj 'at yet'oc, man̈ a cha ab' tas tzyal eb'.

¹¹ Toq'ue tzyal eb' 'aych 'ixtic: Con̈ quet'oc, coyc macwjoc 'a yoltc b'e yic tz'at qui milnec cham junc 'anma tz'ec' ta', wach'xam may smul 'ayn̈ec.

¹² Yol wal stzatzl 'ay ax qui yamnec coti, 'oj qui satc can 'eli,

¹³ sec 'ixta 'oj cutquec qui'n can 'ec' smasnil sricoal, ax ca'nec b'ut'joc catutec yet' smasnil tas 'oj quelq'uec cha.

¹⁴ Cotan̈, 'ac' prowal a suerte quet' on̈, ax ca'n ec quet' 'a tas 'oj qui'c 'ec' cha, toq'ue schi eb' 'ayach.

¹⁵ ¡Ach wunnal, man̈ ach 'at yet' eb'! A eco', to tzej 'el a b'a 'a stz'ey eb', man̈ a b'eylb'oc sb'eyb'al eb' cha,

¹⁶ yujto yelc'ojlal tzyac' eb' yip sb'on maysch'olnil; tzyac' eb' yip smilw cham 'anma'.

¹⁷ May yopiso junc yal tzb'o'i, toto tzyil sb'a no ch'ic 'a 'a,

¹⁸ palta ax jun tzo'n̈ 'anma 'ixta tz'el sb'on cha, mun a eb' tzyalej sb'a, mun a eb' tzmil cham pax sb'a.

¹⁹ A eb' 'elc'um, 'ay jun c'ual 'oj cham eb'; 'ixta 'oj 'aj pax scham eb' tznib'j 'och sb'a ricoal yuj tas maysch'olnil tzb'o'o.

'Awtb'il eb' quelm 'a jelnal

^20-21 A 'a yoltc caye, 'a 'aj tzlaj schaj sb'a b'e yet' 'a 'aj tzlaj syam sb'a 'anma', ata tzon̈ yawtjec Dios yuj ya'n qui nab'enec, tzyaln 'ixtic:

²² Ex quelm to mant 'a e nab'en, ton̈j tzex laj b'uchwji. ¿B'a'n̈ wal 'oj eyactc e tzalj yet' e man̈ nab'enal cha? ¿B'a'n̈ 'oj eyactc can e b'uchwji? ¿B'a'n̈ wal 'oj eyactc e patquiln can 'el jelnal?

²³ Chajec eyab' 'a 'ajtil 'oj ex in tench wa'an. 'Ixta 'oj wutc wa'n in c'ojlb'al 'ayex, 'oj wac' eyojcoc 'el in paxti'.

²⁴ An ex wawtej, sec tzex cot 'ayin, palta matz e chaj eyab'i'.

²⁵ Palta ax tz'aji to tze patquilj can 'el tas tzwala; matz e chaj eyab' 'ajtil tzex in tench wa'an.

²⁶ Ax 'oj 'ajoc ton̈j 'oj in tzewj 'ayex, yic 'oj jawc yailal 'a eyib'an̈. Ton̈j 'oj in b'uchwj pax 'ayex yic 'oj e chaml yuj xiwlal.

²⁷ 'Icha junc chacxuxm 'ic' tz'a'n lajwc 'el smasnil tas, 'ixta wal 'oj 'aj sjaw tas tz'i'n cot xiwc'ojlal 'a eyib'an̈: atn yailal, somc'ojlal yet' cusc'ojlal.

²⁸ A wal 'a jun c'ul cha, 'ojt cob' e c'an in colwal, palta man̈x 'oj in ta'w 'ayex; 'ojt cob' eyal e b'a 'ayin, palta man̈x 'oj wab' tas tzeyala,

²⁹ yujto tze patquilj can 'el jelnal, matz e nib'j to 'ay wel'ch an Jehová in 'a e sat.

³⁰ Matz e nib'j pax tze chaj eyab' tas tzwala; tze patquilj can 'el jun tennb'il tzwac' 'ayex.

³¹ Caw 'oj eyab' syal yuj e b'eyb'al cha, 'oj eyec tzactzjoc e b'a yuj e maysch'olnilal cha.

³² A eb' mant 'a snab'en, 'oj cham eb' yuj sman̈ nab'enal; ax eb' tu snab'en, 'oj lajwc 'ejm eb', yujto may yel'ch junc nab'en tz'ajx 'a eb'.

³³ Ax xo tze chaj eyab' tas tzwala, 'oj e cann̈j 'a junc'ojlal, may junc tas 'ay smay 'aj 'oj e xiwi, xchi Dios.