Os 4 - Chuj San Sebastian Bible

A yowl Jehová 'a chon̈b' Israel

¹ Ex wit israelal, 'ab'tec wal spaxti Jehová. Caw wal tox xcot yowl 'a yib'n̈ smasnil eb' 'anma cajn 'a jun nacion̈ tic, yujto man̈x 'a tas wach' 'ayc' 'a scal eb', man̈x 'a mach wach' snab'en, man̈x 'a junc eb' tzat nan cot Dios.

² Caw tzniwtj eb' laj sjelnc tas tzyala, tzlaj ya'nc eb' 'es. Tzmilw cham 'anma eb', tz'elc'w eb', cojxn̈ej 'ajmulal tzlaj sb'o eb', tzlaj yixtn eb' yit 'anma'il, jab'jb' scal tzlaj milw 'anma eb'.

³ Yuj cha, caw wal cusltac 'oj 'ajcn slum jun nacion̈ tic. 'Oj laj 'el yip eb' 'anma cajn 'a 'a. 'Oj laj cham no calte'al noc', no ch'ic, yet' smasnil e no chay 'ay 'a yojl a mar.

Smul eb' ya'mal 'och sti eb' 'anma'

⁴ Xyaln Jehová 'ayn 'ixtic: May cab' mach tzcomn tej sb'a, may cab' mach tztench wan sb'a. Yujto a eb' et chon̈ab' lajn eb' yet' junc mach tztej sb'a yet' eb' ya'mal 'och e ti 'ayin.

⁵ Yuj wal cha, ax tic, c'ul wal 'oj e telwi. Ax eb' in checab', a 'a 'ac'wl 'oj telwc eb' eyet'oc. An 'oj in satl chon̈b' Israel, atn jun 'icha e nun yaji.

⁶ 'Oj in satl jun in chon̈b' tic, yujto man̈x in nanoc jac yu'uj. Ax xo ax ya'mal 'och sti eb' 'anma eyaj 'ayin, yel xo man̈x in nanoc jac eyu'uj. Yuj cha, 'oj ex wi'l 'a eyopiso, yujto 'ix 'at satc'ojlal in cuynb'il eyu'uj, yuj cha, man̈x 'oj in na cot eb' eyin̈tl b'aq'uin̈.

⁷ 'Icha wal x'aj sq'uib' e b'isul, 'ixta pax x'aj sq'uib' yoch e mul 'ayin. Yuj cha, a e b'inab'ilal cha, 'oj wa'cn 'och 'a q'uixwc'ojlal.

⁸ Yuj xajmb'al eb' in chon̈b' tzyac' 'ayn yuj smul, wach' e wa'i; yuj cha, tze nib'n to tz'ochn̈j smul eb'.

⁹ Yuj cha, ax ya'mal 'och sti eb' 'anma eyaji, lajn 'oj eyutc eyab'n syal yet' eb' eyit chon̈ab'. Yuj e b'eyb'al cha, ax wa'n 'och yailal 'a eyib'n̈ yet' eb'.

¹⁰ Yujto in yactj can eb' in chon̈ab' yic xya'n servil jun comn dios tzcuch Baal, wach'xam 'oj cob' wa eb', mto tzway eb' yet' eb' 'ix 'ajmul 'ix 'a yet'l sdiosal cha, palta man̈ yujoc cha ax sniwtj ya'n tas 'awb'il yuj eb'. Ma 'oj q'uib' pax sb'isl eb'.

Eb' israel tzyal sb'a*r* 'a jun tzo'n̈ yechl comn dios

¹¹ Yuj 'ajmulal yet' yuj 'u'l 'an̈, tzsat snab'en eb' 'anma'.

¹² A eb' in chon̈b' tic, a 'a junc te te', ata tzc'anb'j sb'a eb'. A te te chi tz'a'n snab'enoc eb' yalni. Yuj cha, 'ix juw can 'el eb', 'icha wal tzyutj junc 'ix 'ix yactn can yichmil, ax yet' junc xo win winc tzmuln 'ix, 'ixta wal in yutj eb' in yactn cani, ax 'a jun tzo'n̈ comn dios 'aj tzyal sb'a eb'.

¹³ Xlaj 'at eb' 'a lum jolmctac witz yet' 'a lum tzalctac, axta xlaj sn̈us eb' te incienso, tzya'n pax eb' xajmb'al 'a yich eb' te álamo pim xi'il, 'a eb' te pocjiy yet' 'a eb' te ma'ach'. Yuj cha, xlaj ya'nc 'och sb'a yisl eb', yet' yalb' eb' 'a 'ajmulal.

¹⁴ Palta ma'oj wac' syailal eb' 'islab'il yet' eb' 'ix 'alb'al chi yuj yajmulal cha, yujto a eb' winc chi tzch'oxn yil eb'; tzyac' ewin xajmb'al yet' eb' 'ix tzb'eylb'an 'ajmulal. Yuj cha, a jun chon̈b' may snab'en tic, 'oj juwc 'eli.

¹⁵ Wach'xam x'och smul chon̈b' Israel, palta comnoc matz 'och smul chon̈b' Judá. May cab' eb' 'anma tz'at yac' 'ejm sb'a 'a Guilgal, mto 'a jolm witz Bet-avén, may cab' mach tz'a'n sti 'a in b'i an Jehová pitzn in tic.

¹⁶ A chon̈b' Israel, caw pit, lajn wal 'icha junc no quelm wacx caw ow. Toto 'ixta', ¿tom 'oj stac' in tan̈wni eb' 'icha junc 'ilm calnelu tztan̈wni wa scalnelu 'a 'aj caw yax te c'ultac?

¹⁷ A pax eb' chon̈b' yic Efraín, 'ix 'och eb' 'emmquilal 'a jun tzo'n̈ yechel, palta yil sb'a eb'.

¹⁸ 'Ix 'em eb' 'a 'ajmulal smasnil, 'icha tz'aj yem eb' 'u'm 'an̈. Man̈xtzac 'och wan eb' sb'on 'ajmulal. A eb' syajlil eb', cojxn tas q'uixweltac tznib'j eb' sb'o'.

¹⁹ Yuj cha, 'icha wal tz'aj yijx 'at c'alem yuj 'ic', 'ixta 'oj 'aj eb' yijx 'ati. Caw 'oj q'uixwc 'el eb' yuj xajmb'al cha.