Os 3 - Chuj San Sebastian Bible

A Oseas yet' 'ix yistzil to 'ajmul

¹ 'Ix yaln pax Jehová 'ixtc 'ayn an Oseas in tic: A ticnec, chamc'ojlej pax 'ix estzil, wach'xam sb'o 'ix 'ajmulal yet' eb' winc sc'umej. Palta to a 'ix tzwa'ch ch'oxnb'ilal 'a eb' et israelal, wach'xam xya'ch eb' israel snab'en 'a jun tzo'n̈ comn dios, xlaj yi'n 'at eb' te tacn̈ sat uva ofrendail 'a jun tzo'n̈ comn dios cha, palta 'oj in chamc'ojloc pax eb', xchi Dios 'ayin.

² Yuj cha, xin cha mann pax 'ix wistzilc jun 'ejm xo, olajn̈e q'uen tumn plata xwac' stojloc 'ix, yet' chan̈e quintal 'ixm cebada.

³ 'Ix waln 'a 'ix 'ixtic: Niwn tiempo 'oj a can 'a watut 'a 'ichn̈jta', man̈x a say a mulc 'a yol in c'ab', man̈x a comn altc a b'a 'a junc xo winac. An̈jtona 'in, 'oj in tan̈wc yec' jun tiempoal cha, 'ixta to b'i'an ax qui'n pax qui b'a jun 'ejm xo, xin chi 'a 'ix.

⁴ 'Ixta pax eb' wit israelal, to najtl tiempo 'oj can eb' 'a may sreyal, may syajlil eb' tztan̈wni, man̈x 'a xajmb'al eb' 'oj yac' 'a Dios, man̈x 'a eb' q'uen q'uen wach' yilx tzsay eb', man̈x 'a te spichl eb' ya'mal 'och sti eb' 'a Dios tzb'o'o, man̈x 'a pax yechl junc comn dios 'ayc' 'a yol yatut junjn eb'.

⁵ 'Oj lajwc cha, ax 'a yic slajb' tiempoal, 'oj yalx sb'a eb' wit israelal 'a Jehová qui Diosal jun 'ejm xo, ax schan pax sc'ojl eb' yoch junc yin̈tl David sreyloc. 'Ixta 'oj yutc yi'n 'ejm sb'a eb' 'a Jehová, ax schan eb' swach'c'ojlal.