Os 2 - Chuj San Sebastian Bible

¹ Al 'a eb' et chon̈b' 'ixtic: Schon̈b' Dios cajec, chamc'ojlbiln̈ec xo yuj Dios, xa chi 'a eb', xchi Dios 'ayin.

A schamc'ojlal Dios 'a eb' schon̈b' to 'ajmul

² 'Ix yaln Jehová 'ayin to an tzwa'ch in b'a ch'oxnb'ilal yet' eb' wunnal yet' pax snun eb', yuj cha, xwaln 'ixtic: —Wach'xam a e nun cha, man̈x wistziloc, man̈x in yichmilc paxi, palta alc 'a 'a, man̈x cab' ya'ch sb'a 'ajmulal, tzyactn can pax 'ix eb' winc nib'b'il yuj cha.

³ Toto ma'oj sb'o 'icha tzwal tic, 'oj wi'l sq'uixwel, 'oj in jitcn 'eli, 'icha yajl jitan yic yalji. 'Icha pax lum tacn̈ lu'um, 'ixta 'oj wutc cani, ax scham yuj tacn̈ti'al.

⁴ Ma'oj 'o'ch in c'ojl 'ayex, yujto yune ex 'ix yic yajmulal.

⁵ A e nun tic, xya'ch sb'a 'ajmulal. 'Ix yixtj 'el sb'a, yuj cha yaln 'ixtic: 'Oj 'at in sayc' eb' nib'b'il wu'uj, atn eb' tz'a'n tas tzin c'uxu, yet' tas tzwuq'uej, eb' tz'a'n in lana, yet' in lino, tzya'n pax eb' waceite yet' yal wuva, xchi.

⁶ Yuj cha, an xo 'oj in mac yol sb'e yet' te q'ui'ix, 'oj woych col-l 'a spatquil, man̈x 'oj 'ilchjoc sb'e 'aj 'oj 'atoc.

⁷ 'Oj 'och tza'n cob' yuj eb' nib'b'il yuj cha, palta ma'oj yamchjoc eb' yu'uj. 'Oj cob' sayc' eb', palta ma'oj 'ilchjoc eb' yu'uj. Yuj cha, ax yaln 'ixtic: 'Oj in meltzj pax 'a win wichmil wijnac 'a b'ab'el, yujto wach' to waj yet' win 'a yib'n̈ pax 'icha waj ticnec, 'oj schic e nun cha.

⁸ Yuj sb'eyb'al eb' wit israelal cha, yuj cha xyaln Jehová 'ixtic: Ma'ix yojquej 'el jun chon̈b' tic, toto an tzwac' strigo, yal yuva, yet' yaceite, an xwac' niwtjoc q'uen plata yet' q'uen oro 'a 'a, ax 'ix 'at comn 'a'nc q'uen 'a Baal.

⁹ Yuj cha, 'oj in mol chan̈ in trigo, yet' yal wuva 'a 'icha stiempoal sq'ue wa'an; ax wi'n pax 'ec' lana, yet' te lino, atn te tz'och spichloc.

¹⁰ Q'ueln 'och wal jun tzo'n̈ nacion̈ 'ix mont 'at 'a sdiosal, ax wa'n yac' sq'uixwloc. May xon junc comn dios chi 'oj stac' scoln 'a yol in c'ab'.

¹¹ 'Oj wac' lajwc stzaljc'ojlal, ax wa'n lajwc sq'uin̈ tzna 'a yic tzpac' 'uj, yet' sq'uin̈ yic sc'ul 'iljelal, yet' smasnil jun tzo'n̈ xo q'uin̈ tzna'a.

¹² Ax wa'n sat 'ejm te uva yet' te higo, atn jun tzo'n̈ tzyal yuj 'ixtic: Atn jun tzo'n̈ tic, in tojl ya'jnac eb' tzin nib'ni, xchi. A jun tzo'n̈ yawb'en cha, 'oj wa'cn 'at 'a scal c'ultac, axn̈ej no calte'al noc' 'oj lonc sat.

¹³ An Jehová in, an tzwala: To 'oj wa'ch yailal 'a yib'an̈, yujto niwn tiempo sb'achch incienso 'a yojltac jun tzo'n̈ yechl comn dios Baal. Xlaj sb'onc sb'a 'icha tzyac' junc 'ix tzya'ch syumchiquin, ston̈, tz'och tza'n yuj eb' winc nib'b'il yu'uj, tzya'n sat sc'ojl 'a yichmil, 'ixta in yutj chon̈b' Israel.

¹⁴ Wach'xam 'ixta xyutj sb'a chon̈b' Israel, palta 'oj in montc paxi, ax wi'n 'at 'a lum cusltac lum jun 'ejm xo. Ata 'oj wal wach' paxti 'a 'a.

¹⁵ 'Oj wa'x can slum 'aj 'awb'il yuva, atn lum span̈nil yic b'ilc'ojlal, palta 'oj 'ochx can pan̈n yic yipc'ojlal. 'Ixta 'oj wutc cani, 'icha ya'jnac 'a b'ab'el yic yelt 'a Egipto. Ata 'oj ta'wc 'ayin 'icha junc 'ix cob's 'ix.

¹⁶ An Jehová in, an tzwala: To a 'a yic jun c'ul cha, a chon̈b' Israel 'oj in yalx sDiosaloc, ax 'a eb' yechl Baal cha, man̈x junc eb' 'oj yalch syajliloc.

¹⁷ Jun 'ejmn̈ej 'oj wi'cn 'el 'a sti sb'inan sb'i eb' Baal cha, man̈x 'a 'oxlajn̈b'a'n̈ 'oj sb'inoc coti.

¹⁸ A 'a jun tiempoal cha, 'oj wac' in trato yet' e no calte'al noc' yuj swach'loc eb' in chon̈ab', e no ch'ic, yet' e no chan, sec man̈x 'a 'oj yutc e no eb', ax wi'n 'el jun tzo'n̈ jul-lab' 'a jun nacion̈ tic, atn lanza, yet' espada yic owal, sec 'oj 'iljoc eb' in chon̈b' tic 'a tzaljc'ojlal.

¹⁹ Ach chon̈b' Israel, 'icha to 'oj ach wistzilc 'a jun 'ejmn̈ej yet' 'a stojlal, 'a 'icha wal sleyal, yujto 'oj ach in ya'iloc, ax ach in chamc'ojlani.

²⁰ 'Icha to wistzil 'oj aji, 'oj in b'o 'icha tas 'ix wala, 'ixta 'oj 'aj snachj 'el o'oj, to an Jehová in.

²¹ An Jehová in, an tzwala: A 'a jun tiempoal cha, 'oj wal 'a satcha'an̈, ax satchan̈ chi 'oj 'a'nc paxt n̈ab' 'a sat lum lu'um.

²² Ax ya'n pax 'ixm trigo 'a lu'um, yal uva yet' aceite. 'Ixta 'oj wutc in pacn slesl eb' in chon̈b' 'awb'il wu'uj.

²³ 'Oj wawc pax 'ejm in chon̈b' 'a sat lum lu'um yic tz'och wico'oc. 'Ayx in chamc'ojlal 'a 'ix Man̈ Chamc'ojlb'iloc, yet' 'a win Man̈ in Chon̈b'oc, ax waln 'a eb' 'ixtic: A ticnec tzex 'ochcn in chon̈b'oc, 'oj in chioc. Ax yaln eb' 'ixtc 'ayin: Ach tic, qui Diosal ach, 'oj schic eb', xchi Dios.