Os 14 - Chuj San Sebastian Bible

Tztew Oseas*r* sec tzmeltzj eb' israel 'a Dios

¹ Ex wit israelal, meltzjan̈c 'a Jehová qui Diosal. Wach'xam ex telw 'ejm yuj e mul.

² Palta meltzjan̈c pax 'a Jehová, tzeyaln e b'a 'a 'ixtic: 'A'n̈ niwnc'ojlal yuj qui mul on̈ Mamin, chaj qui 'emmquilal tic on̈, yet' qui wach' paxti tzcal 'ayach.

³ A chon̈b' Asiria matz tac' on̈ scoln on̈, an̈jtona matz tac' pax qui colx yuj no chej on̈. A tas tzlaj qui b'o yet' qui c'ab' on̈, man̈x 'oj calch qui diosalc on̈, yujto cojxn ach Mamin Jehová, ach tzac' tas 'ay tz'och yuj eb' meb'a 'unn chamnc smam, xe chi 'a Dios.

A Jehová 'oj yac' sq'uinl*r* eb' israel jun 'ejm xo

⁴ Tzyaln Dios 'ixtic: 'Oj wac' jawc snab'en eb' in chon̈b' tic 'a scal spital. Wach'xam man̈ smojoc, palta 'oj in chamc'ojloc eb', yujto man̈x 'oj wa'ch yowl in c'ojl 'a yib'n̈ eb'.

⁵ 'Icha tz'aj snichn te c'ultc yuj chicb'cha'an̈, mto 'icha te c'ute 'a jolmctac witz 'a lum Líbano to najt tz'at sch'an̈lyib', 'ixta 'oj wutc pax eb' israel.

⁶ Lajn 'oj 'aj eb' 'icha sja'l yajl jen̈n sc'ab' jun c'uyc te snun olivo, lajn pax 'oj 'aj sjab' eb' 'icha sjab' eb' te c'ute 'a Líbano cha.

⁷ 'Oj in ya'ch eb' yipc sc'ojl jun 'ejm xo. Wach' 'oj 'aj sq'uib' eb' 'icha sq'uib' 'ixm trigo, 'icha to 'oj nichnc eb' 'icha te uva, caw 'oj b'inaxc eb' 'icha te yal uva tzcot 'a Líbano cha.

⁸ Ex 'aj Efraín, toc 'ay jac yopiso jun tzo'n̈ e comn diosal cha. An 'oj in ta'w 'ayex, ax ex in tan̈wni paxi. 'Icha jun c'uyc te te pim xi'il, 'ixta waj 'ayex. Wu'uj tzex niwtj pax cha'an̈, xchi Dios.

Slajb' paxti'

⁹ A eb' jelan, yet' eb' wach' snab'en, 'oj nachjoc 'el jun tzo'n̈ paxti tic yuj eb'. A jun b'e yic Jehová, caw wal tojol. A eb' wach' sb'eyb'al, 'oj 'at eb' 'a jun b'e cha, palta ax eb' maysch'olnil sb'eyb'al, 'oj telwc eb' 'a 'a.