Os 12 - Chuj San Sebastian Bible

¹ A eb' 'aj Efraín, a tas tzb'o eb', may jac yel'chi, ton̈j tzyixtj sb'a eb'. Caw tzniwtj yixtn eb' yit 'anma'il, tzniwtj pax ya'n eb' 'es. Tzb'o eb' strato yet' chon̈b' Asiria, tzya'n 'at eb' aceite smontnb'ilc Egipto, xchi Dios.

² A eb' 'aj Judá, atn eb' yin̈tl Jacob, 'ay smul eb' 'a sat Jehová. Yuj cha, 'oj ya'ch yailal 'a yib'n̈ eb' yuj stu b'eyb'al cha. 'Oj stojlajwc eb' 'icha wal tas tz'el sb'oni.

³ 'Intax yic mantzac 'alj xon Jacob, toxn yamb'il yich sq'uenlyoc yu'tac yu'uj, ax yic 'ichm winc xo, xyac' owl yet' Dios.

⁴ Xya'lj yip yet' jun ángel, masnto xyac' ganar. 'Ix 'oc' Jacob, 'ix sc'ann swach'c'ojlal jun ángel chi 'a yib'an̈. A 'a Bet-el, ata sch'oxjnac sb'a Dios 'a 'a, ata xpaxtin yet' ta'.

⁵ A Jehová Dios, tztac' yuj smasnil, 'ixtnta ton sb'inax sb'i.

⁶ Ex israel, meltzjan̈c 'a qui Diosal. Yiclum tzeyutj e b'a 'a 'a, tojlb'tzejc e b'eyb'al. 'Aychn̈ej cab' Dios yipc e c'ojol.

⁷ A Jehová a tzaln 'ixtic: A eb' chon̈wjum yic Efraín, a 'echtab' man̈ tz'acnoc, a tzc'anlb'ej eb', yujto caw wal tzchaj sc'ojl eb' yelc'wi.

⁸ Tzyaln eb' 'ixtic: On̈ 'ochc ricoal. Wach'xam rico on̈c xo, palta may mach tztac' ya'n yowlal 'ayn̈ec, yic tzyaln eb' to on̈ 'ochc ricoal yuj ca'm 'esal, xchi cob' eb'.

⁹ Palta an Jehová e Diosal in, yic 'ayc' eb' e mam eyichm 'a lum Egipto, scajn eb' mantiado, yuj cha, 'oj wa'x e caj jun tzo'n̈ mantiado chi jun 'ejm xo, 'icha ya'jnac yic yec' cajn eb' 'a lum cusltac lu'um.

¹⁰ An tic, in paxtin 'a eb' in checab'. 'Ix wa'n niwtjoc tas xyil eb' 'a 'icha waychil. A eb' xwac' alnc 'el in cuynb'il 'a ch'oxnb'ilal.

¹¹ A 'a lum Galaad, ata 'ay sdiosal eb' chuc chon̈b'al, palta man̈x 'a jac yel'ch 'oj 'ajcni. A 'a lum Guilgal, ata tzlaj yac' eb' no wacx xajmb'alil; palta a yet'l xajmb'al eb' cha, lajn 'oj 'ajcn 'icha q'uen q'uen jun b'uln̈ yaj si'x syam sb'a 'a 'aj tz'awx lum lu'um, xchi Dios.

¹² A Jacob, 'atnc 'eloc, axta c'ochnc 'a lum Aram. Ata 'ochnc 'ilj calnelu yuj stojloc yistzil.

¹³ A Jehová, a yet' jun schecb' 'ix yij 'elt chon̈b' Israel 'a Egipto. An̈jtona jun schecb' chi tztan̈wni jun chon̈b' cha.

¹⁴ Palta a eb' 'aj Efraín, 'ix stzuntzj cot eb' yowl sc'ojl Jehová. Caw wal schab'c'ojlej sb'a yuj eb'. Yuj cha, 'oj yac' Jehová stuplajwc eb' jantc smaysch'olnilal xlaj 'el sb'oni. Yuj smul eb' cha, ax sjaw yailal 'a yib'n̈ eb'.