Nm 9 - Chuj San Sebastian Bible

A q'uin̈ yic snanb'il cot*r* yel eb' israel 'a libre

¹ A yic yel yab'il yelt eb' israel 'a Egipto, yic b'ab'l 'uj 'a yojl junx ab'il, yic 'ayc' eb' 'a lum cusltac lum yic Sinaí, ata xyal Jehová 'ixtc 'a Moisés:

² Al 'a eb' et israelal tic, to tzna eb' q'uin̈ yic eyel 'a libre. 'Icha sc'ul alb'il cani,

³ tzyal 'el'chi, atn 'a yic chan̈lajn̈e yoch jun 'uj tic, 'a yic yemc'ual, tzeyiclj smasnil tas 'ix wala, yuj tas tz'aj snax jun q'uin̈ cha, xchi.

⁴ Yuj cha, 'ix yaln Moisés 'a eb' yit israelal, to tzna eb' q'uin̈ yic yel eb' 'a libre.

⁵ Ax eb' 'anma cha, 'ix snan eb' jun q'uin̈ chi 'a chan̈lajn̈e yoch jun b'ab'l 'uj chi 'a yic yemc'ual, yic 'ayc' eb' 'a lum cusltac lum yic Sinaí, 'icha 'ix yutj Jehová yaln 'a Moisés.

⁶ Palta a 'a scal eb' cha, 'ay jun tzo'n̈ winc man̈ wach'c xyutj sb'a, yujto 'ix syam eb' jun chamnc 'anma', ma'ix stac' snan eb' jun q'uin̈ chi 'a jun c'u cha. Yuj cha, 'ix 'at eb' yil Moisés yet' Aarón 'a jun c'u cha.

⁷ 'Ix yaln eb' 'ixtc 'a Moisés: —An̈ tic on̈, 'ix qui yam jun chamnc 'anma on̈, yuj cha, man̈ wach'c caj ticnec on̈. ¿Toc wal am ma'oj chaxc ca' cofrenda 'a Jehová 'a jun c'u tic, yet' smasnil eb' quit chon̈b'ec tic? xchi eb'.

⁸ 'Ix ta'w Moisés 'a eb' 'ixtic: —Tan̈wjec, 'oj wab'i' tas xchi Jehová eyu'uj, xchi.

⁹ 'Ix yaln Jehová 'ixtc 'a Moisés: Al 'a eb' et israelal cha to an tzwal 'ixtic:

¹⁰ E masnil ax tic yet' eb' eyin̈til, yowlal tze na q'uin̈ yic eyelt 'a libre, yuj eyi'n chan̈ in b'i an Jehová in. Ax eb' man̈ wach'c yaji yujto tzyam eb' junc chamnc 'anma', mto eb' 'ay't 'a najt yuj junc schecnb'il,

¹¹ chuc xoj 'oj sna eb' jun q'uin̈ chi 'a chan̈lajn̈e yoch schab'l 'uj 'a yic yemc'ual. Yowlal tzchi eb' no quelm calnelu yet' te c'a 'itaj, yet' pax 'ixm pan may yich.

¹² Matz yactj can eb' jacx no calnelu 'ac'b'il xajmb'al-l 'a yic junx c'u, matz tac' pax sma'n poj eb' sb'acl no'. 'Icha wal 'ix wutj walni, 'ixta tzeyutj e nan jun q'uin̈ cha.

¹³ Palta toto 'ay mach matz nan q'uin̈ yic eyel 'a libre, q'uinloc wach' pax yaji, man̈ 'ayc 'at pax 'a junc schecnb'il, a jun cha, yowlal tz'ijx 'el 'a e cal. Yujto matz yac' yofrenda 'ayn 'a jun sc'ul checl yajcn wu'uj, 'oj scha yailal yuj smul cha.

¹⁴ Toto 'ay eb' chuc chon̈b'al cajn 'ec' 'a e cal, tznib'j eb' tzna jun q'uin̈ chi eyet'oc, yic tzyi'n chan̈ eb' in b'i, yowlal tzyiclj eb' sleyl 'icha 'ix wutj walni. 'Icha wal sleyl 'ix wac' eyicloc, a pax tzyiclj eb' chuc chon̈b'al 'ayc' 'a e cal, xchi Dios.

A jun 'asn 'aych 'a yib'n̈ Mantiado

¹⁵ A 'a yic jun c'u 'aj 'ix b'o 'el'ch scajnub' Dios, tzyal 'el'chi, atn jun Mantiado yic trato, caw 'ix macchj 'el yib'n̈ yuj jun 'asun. A yic 'ix 'ejm can c'u, lajn 'ix 'aj yilx 'icha c'ac', masnto 'a yic 'ix sacb'el 'a junx c'u.

¹⁶ 'Ichn̈jta 'ix 'aj 'a smasnil tiempo. 'Aychn̈ej jun 'asn chi 'a yib'n̈ Mantiado yic tz'ec' c'u, ax 'a yic 'ac'wal, 'icha to 'aych sc'a'l jun 'asn cha.

¹⁷ A yic tzq'ue wan jun 'asn chi 'a yib'n̈ jun Mantiado cha, tzyamn 'och eb' israel sb'eyi, ax yic tz'ejm jun 'asn chi 'a yib'an̈, ata tz'och wan eb' sb'eyi.

¹⁸ A Jehová tzch'oxn 'a eb' toto tzb'ey eb' mto tz'och wan eb'. 'Aychn̈ej wan eb', toto 'aych wan jun 'asn chi 'a yib'n̈ scajnub' Dios.

¹⁹ Toto niwn tiempo tz'och wan jun 'asn cha, ax eb' israel cha, tzyicljn̈ej eb' yoch wan ta'.

²⁰ Ax toto jayen̈ej c'u tz'och wan jun 'asn cha, jayen̈ej pax c'u tz'och wan eb', tzyamn pax 'och eb' sb'eyxi, a tzyal wal tzyutj Jehová sch'oxn 'a eb'.

²¹ 'Ay 'ajtil cojn 'a 'ac'wl tz'och wan jun 'asn cha, 'ax 'a yic sq'uin̈b'ial tzyamn 'och sb'eyxi, 'ixta pax tz'aj eb' sb'eyxi. Toto c'ual mto 'ac'wl tzb'ey jun 'asn cha, tzb'ey pax eb'.

²² Toto tz'och wan jun 'asn chi 'a yib'n̈ scajnub' Dios chab'oc c'u, mto junc 'ujal, mto junc ab'il, 'ixta pax tz'och wan eb' israel cha, matz b'ey eb'. Palta toto tzb'eyx jun 'asn cha, an̈jtona tzyamn 'och eb' 'anma chi sb'eyxi.

²³ Masnto a Jehová tzalni, 'ixta to b'i'an tz'och wan eb'; a pax tzalni, tzyamn 'och eb' sb'eyxi. 'Ix syicljn̈ej eb' 'a Jehová, 'icha wal 'ix yutj Jehová yaln 'a Moisés.