Nm 7 - Chuj San Sebastian Bible

Ofrenda yuj scajnub' Dios

¹ A yic xlajw ya'n b'o Moisés scajnub' Dios, 'ix stzicn 'och aceite 'a 'a, 'a smasnil syamc'ab'il, 'a yib'n̈ jun yet'l xajmb'al, yet' pax 'a yib'n̈ smasnil syamc'ab'il yic tz'ochcn 'a yopiso.

² Ax eb' yajl yaj 'a junjn macn̈ 'in̈tal eb' israel, atn eb' colwjnac yi'n q'ue wan sb'isl ewin yit chon̈b' cha,

³ 'ix yac' eb' waque careta 'aych smacl yib'an̈, yet' lajchwan̈ no mam wacx ofrendail 'a Jehová, tzyal 'el'chi junjn careta 'a chatcwan̈ eb' yajl cha, ax junjn no mam wacx chi 'a junjn eb'. Smasnil jun tzo'n̈ tic 'ix ya'ch eb' 'a yojltac scajnub' Dios.

⁴ 'Ix yaln Jehová 'a Moisés 'ixtic:

⁵ Chaj jun tzo'n̈ chi 'a eb', tzlajw cha, tza'n 'a eb' levita, sec tzc'an eb' yic tzmunlj eb' 'a in Mantiado, a tzyal tas munljelal 'oj sb'o junjn eb', xchi.

⁶ Yuj cha, 'ix schan Moisés jun tzo'n̈ careta cha, yet' jun tzo'n̈ no mam wacx cha, spojn 'ec' 'a scal eb' levita.

⁷ A 'a eb' yin̈tl Gersón, ata 'ix yac' chab' careta yet' chan̈wn̈ no wacax, yujto a chi tzc'an eb' 'a smunljel.

⁸ Ax 'a eb' yin̈tl Merari, ata 'ix yac' chan̈e careta yet' wajxcwan̈ no wacax, yujto a chi tzc'an eb' 'a smunljel tz'ajx yuj win Itamar, win yunnal Aarón.

⁹ Ax pax 'a eb' yin̈tl Coat, ma'ix 'ajx scareta eb' yet' no wacax, yujto a eb' tz'i'n 'at smasnil syamc'ab'il scajnub' Dios 'a squelab'.

¹⁰ A yic x'ochcn yopiso jun yet'l xajmb'al, ax eb' yajl yaj 'a junjn macn̈ 'in̈tal, 'ix yij cot eb' yofrenda 'a yojltac jun yet'l xajmb'al cha.

¹¹ 'Ix yaln Jehová 'ixtc 'a Moisés: 'A junjn c'u, chucchc eb' syajlil junjn 'in̈tal eb' 'oj yi' cot yofrenda yuj yochcn yopiso jun yet'l xajmb'al tic, xchi.

^12-83 'A yic b'ab'l c'u, 'ix yij cot Naasón win yunnal Aminadab yofrenda, win yajl yaj 'a eb' yin̈tl Judá. 'A schab'l c'ual, 'ix yij cot Natanael win yunnal Zuar yofrenda, win yajl yaj 'a eb' yin̈tl Isacar. 'A yoxl c'ual, 'ix yij cot Eliab win yunnal Helón yofrenda, win yajl yaj 'a eb' yin̈tl Zabulón. 'A schan̈l c'ual, 'ix yij cot Elisur win yunnal Sedeur yofrenda, win yajl yaj 'a eb' yin̈tl Rubén. 'A yol c'ual, 'ix yij cot Selumiel win yunnal Zurisadai yofrenda, win yajl yaj 'a eb' yin̈tl Simeón. 'A swacl c'ual, 'ix yij cot Eliasaf win yunnal Deuel yofrenda, win yajl yaj 'a eb' yin̈tl Gad. 'A yucl c'ual, 'ix yij cot Elisama win yunnal Amiud yofrenda, win yajl yaj 'a eb' yin̈tl Efraín. 'A swajxquil c'ual, 'ix yij cot Gamaliel win yunnal Pedasur yofrenda, win yajl yaj 'a eb' yin̈tl Manasés. 'A sb'aln̈il c'ual, 'ix yij cot Abidán win yunnal Gedeoni yofrenda, win yajl yaj 'a eb' yin̈tl Benjamín. 'A slajn̈il c'ual, 'ix yij cot Ahiezer win yunnal Amisadai yofrenda, win yajl yaj 'a eb' yin̈tl Dan. 'A yuxlchil c'ual, 'ix yij cot Pagiel win yunnal Ocrán yofrenda, win yajl yaj 'a eb' yin̈tl Aser. Ax 'a slajchwil c'ual, 'ix yij cot Ahira win yunnal Enán yofrenda, win yajl yaj 'a eb' yin̈tl Neftalí. Lajnn̈ej yofrenda junjn eb' 'ix yac'a, atn jun tzo'n̈ tic: Q'uen plato b'ob'il yet' plata, 1,430 gramos yal-l junjn eb' q'ue'en, xalu b'ob'il yet' plata, 770 gramos yal-l jun jun, (a tzyal 'echtab' tzc'anlb'ax 'a scajnub' Dios). A jun tzo'n̈ cha, b'ut'n yet' 'ixm harina caw wach', calb'il yet' aceite, a chi xyac' eb' yofrendaoc. 'Ix ya'n pax eb' junjn niwquil cuchara nab'a oro, 'ay 110 gramos yal-l jun jun, b'ut'n yet' incienso, yet' pax junjn no quelm wacax, junjn no mam calnelu, junjn no quelm calnelu jun ab'il sq'uinl tz'ajx tz'a xajmb'alil, yet' junjn no mam chiwo yic tz'ajx no xajmb'al-l yuj mul. Ax 'a slajub', xya'n pax eb' no xajmb'al yic junc'ojlal: Chatcwan̈ no mam wacax, otcwan̈ no mam calnelu, otcwan̈ no mam chiwo, yet' pax otcwan̈ no quelm calnelu junjn ab'il sq'uinal. Lajnn̈ej sb'isl no xyac' junjn eb'.

⁸⁴ Yuj cha, a smasnil ofrenda 'ix yac' eb' yajl yaj 'a eb' yin̈tl Israel, yic 'ix 'ochcn yopiso jun yet'l xajmb'al cha, atn jun tzo'n̈ tic: Lajchwe q'uen plato b'ob'il yet' plata, lajchwe pax xalu b'ob'il yet' plata, yet' pax lajchwe q'uen niwc cuchara nab'a oro.

⁸⁵ A junjn q'uen plato cha, 'ay 1,430 gramos yalil, ax junjn xalu cha, 'ay 770 gramos yalil. Yuj cha, a q'uen plata x'och 'a jun tzo'n̈ plato cha, yet' 'a jun tzo'n̈ xalu, 'ay 26,400 gramos yalil, a tzyal 'echtab' tzc'anlb'ax 'a scajnub' Dios.

⁸⁶ 'Ay pax lajchwe niwc cuchara nab'a oro b'ut'n yet' incienso, 'ay 110 gramos yal-l jun jun, a tzyal 'echtab' tzc'anlb'ax 'a scajnub' Dios. Yuj cha, a q'uen oro x'och 'a jun tzo'n̈ cuchara cha 'ay 1,320 gramos yalil.

⁸⁷ A sb'isl no noc' 'ix 'ajx tz'a xajmb'alil, lajchwan̈ no quelm wacax, lajchwan̈ no mam calnelu, lajchwan̈ no quelm calnelu junjn ab'il sq'uinal, yet' pax yofrendail 'ixm harina, yet' lajchwan̈ no mam chiwo x'ajx xajmb'al-l yuj mul.

⁸⁸ Ax pax no noc' x'ajx xajmb'al-l yuj yic junc'ojlal, chan̈eschawinc no quelm wacax, 'oxwinc no mam calnelu, 'oxwinc no mam chiwo, 'oxwinc no quelm calnelu junjn ab'il sq'uinal. Atn smasnil jun tzo'n̈ ofrenda tic 'ix 'ajxi, yic x'ochcn yopiso jun yet'l xajmb'al chi yico'oc Dios.

⁸⁹ A yic tz'och Moisés paxtinc yet' Dios 'a yol Mantiado, tzyab' spaxtin 'elt Dios chi 'a snan̈l chawn̈ yechl querubín 'a yib'n̈ smacl scaxail trato 'a 'aj tz'ajx lajwc mul.