Nm 6 - Chuj San Sebastian Bible

Ley 'a eb' tz'och nazareoal

¹ 'Ix yaln pax Jehová 'a Moisés 'ixtic:

^2-3 Al jun tzo'n̈ tic 'a eb' et israelal: To an tzwala, toto 'ay junc winac, mto junc 'ix tzyac' sti ya'n 'och sb'a 'a yol in c'ab' 'icha nazareoal, a jun cha, man̈xtzac stac' yu'n 'an̈, man̈xtzac stac' yu'n junc xo tas jawnc xo sti', man̈xtzac stac' yu'n vinagre, man̈xtzac stac' yu'n yal uva, yet' te sat uva taquin̈, man̈xtzac stac' sloni.

⁴ Ya' sb'a 'aych 'a stiempoal yic tzya'n sti cha, may xon jac tztac' sc'uxn 'a tas tz'elt 'a te uva cha, toxn̈ej am tas sb'o'i.

⁵ Man̈xtzac pax stac' sjoxn 'el xil sjolom, toxn̈ej tzchaj q'uib'oc, masnto tz'acw stiempoal yic tzya'n sti', yujto an Jehová in, wicn̈ej tz'aji.

⁶ A 'a yic jun tiempoal cha, matz tac' sc'och 'a stz'ey junc chamnc 'anma',

⁷ wach'xam a smam mto a snun tzchami, mto junc yu'tac, junc yanab', palta matz tac' xon sc'och 'a stz'ey, yujto man̈ wach'c tz'aj yu'uj, yowlal wach'n̈j tzyutj sb'a, yujto wic tz'ajcni.

⁸ A 'a yic jun tiempoal yic tzya'n sti cha, jun 'ejmn̈ej to wic tz'aj an Jehová in tic.

⁹ Toq'ue jun yaj yet' junc 'anma tzchami, yuj cha, man̈ wach'c tz'ajcn xil sjolom, jun 'ac'b'il cob' 'ayn yu'uj. Toto 'ixta', ax 'a yucl c'ual, tzya'n joxxoc 'el xil sjolm cha, atn 'a yic sc'ul tzsacb'tzaxi.

¹⁰ Ax 'a swajxquil c'ual, tzyi'n 'at chawn̈oc no cowojte', mto chawn̈oc no cotc parama 'a win ya'mal 'och sti eb' 'anma', 'a 'aj tzex 'och 'a yol Mantiado 'aj tzin chaj in b'a eyet'oc.

¹¹ A win ya'mal 'och sti eb' 'anma cha, a 'oj 'a'nc junc no xajmb'al-l yuj mul, ax junc xo no 'oj yac' tz'a xajmb'alil, 'ixta 'oj wutc wa'n lajwc smul cha, yujto jun x'aj yet' jun chamnc cha. A 'a yic jun c'u cha, a xil sjolm 'oj q'uib'xi, wic tz'ajx cani.

¹² Tz'el yich junx tiempoal 'aj tzyac' sti chi 'ayin. A jun tiempoal 'ix 'ec' 'a yic yaln̈tax cha, man̈xtzac 'och stz'acb'oc, yujto a xil sjolom, tox 'ix juw 'eli. An̈jtona', yowlal tzyij 'at pax junc no calnelu jun ab'il sq'uinl 'ayin, yic tz'och xajmb'al-l yuj smul x'och cha.

¹³ A yic tzlajw stiempoal ya'n win nazareo chi sti', yowlal tz'at 'a 'aj 'ay smac Mantiado cha.

¹⁴ Tzlajw cha, tz'ajx tz'a junc no quelm calnelu xajmb'alil, no jun ab'il sq'uinal, no may spaltail. An̈jtona', tz'ajx pax junc no cob's calnelu jun ab'il sq'uinal, no may spaltail, a jun cha, xajmb'al yic tz'ajx lajwc mul. Tz'ajx pax junc no mam calnelu xajmb'al-l yic junc'ojlal 'ayn an Jehová in.

¹⁵ An̈jtona', yowlal tz'ajx pax junc yune xuc 'ixm pan may yich, b'ob'il 'a 'ixm harina caw wach', calb'il yet' aceite. Tz'ajx pax 'ixm c'oxox pan may yich, 'aych aceite 'a 'a. Junn̈j tzyutj ya'n yet' yofrendail 'ixm harina yet' pax yic te yal uva.

¹⁶ Ax win ya'mal 'och sti eb' 'anma cha, a 'oj wul 'a'nc junc no xajmb'al yuj mul chi 'a wojltac, yet' pax no xajmb'al tz'ajx tz'a smasnil,

¹⁷ yet' pax no calnelu tz'ajx xajmb'al-l yic junc'ojlal. Junn̈j tzyutj ya'n yet' 'ixm pan may yich cha, yet' yofrendail 'ixm harina, yet' yic yal uva cha.

¹⁸ A jun tzyac' sti yoch nazareoal cha, ata 'oj joxxoc 'el xil sjolm 'a yojltac Mantiado cha, ax si'n chan̈ jun tzo'n̈ xil sjolm wicn̈ej yaj cha, ax yajx tz'a 'a scal te c'ac' 'aych 'a yaln̈ no xajmb'al yic junc'ojlal cha.

¹⁹ A yic tox xlajw sjoxx 'el xil sjolm cha, ax win ya'mal 'och sti eb' 'anma cha, a 'oj 'i'noc cot schib'jal squelb' no calnelu tajnac xo cha, yet' junc 'ixm pan may yich 'ay 'ejm 'a yol te yune xu'uc, yet' junc 'ixm c'oxox pan may yich, ax ya'n 'och smasnil 'a yol sc'ab' jun xya'ch sb'a nazareoal cha.

²⁰ 'Oj lajwc cha, ax sb'achn 'och win ya'mal 'och sti eb' 'anma chi jun tzo'n̈ chi 'a wojltac an Jehová in, atn sn̈i sc'ojl no xajmb'al yet' pax xub' no'. To tzsi'x can 'el jun tzo'n̈ cha, yic win ya'mal 'och sti eb' 'anma chi tz'aji. Ax yic tzlajw 'ec' jun tzo'n̈ cha, a jun xya'ch sb'a nazareoal cha, tztac' xo yu'n pax yal uva cha.

²¹ Atn jun checnb'il tic 'a junc mach tzta'wj stic 'ayn an Jehová in, yic tzya'n 'och sb'a nazareoal. Yowlal 'oj yac' jun tzon̈ ofrenda tic 'ayin. Toto tznib'j tzyac' sti ya'n jun tzo'n̈ocx ofrenda 'a yib'n̈ 'icha sleyal, yowlal tzyiclj sb'on 'a tas 'aj tzyac' sti cha, xchi Dios.

A wach' paxti tzyal eb'*r* ya'mal 'och sti eb' 'anma 'a Dios

²² 'Ix yaln Jehová 'a Moisés 'ixtic:

²³ Al jun tic 'a Aarón yet' 'a eb' yunnal, a 'a yic 'oj yaln̈c eb' wach' paxti 'a yib'n̈ eb' eyit israelal, 'ixtc wal 'oj yutc eb' yalni:

²⁴ Ya' cab' Jehová syaxil 'a eyib'an̈, ax ex stan̈wni paxi.

²⁵ Yet' cab' stzaljc'ojlal Jehová, tzex yiln 'ochi, 'o'ch cab' sc'ojl 'ayex.

²⁶ Yet' cab' schamc'ojlal Jehová, tzex yiln 'ochi, tzya'n pax sjunc'ojlal 'ayex, 'oj schic cab' eb'.

²⁷ 'Ixta 'oj yutc eb' in sb'inan 'a yib'n̈ eb' eyit israelal, an xo 'oj wac' in yaxilal 'a yib'n̈ eb', xchi Dios.