Nm 5 - Chuj San Sebastian Bible

Ley 'a eb' 'anma man̈ wach'c yaji

¹ 'Ix yaln Jehová 'a Moisés 'ixtic:

² Al 'a eb' et israelal cha, to tz'ijx 'el eb' 'anma ya'ay yuj lepra 'a spatc 'el camplamento yuj eb', eb' tztob' yin̈tl yuj junc yailal 'aych 'a 'a, mto eb' tzyamn junc chamnc 'anma'.

³ Smasnil jun tzo'n̈ 'anma cha, tz'ijx 'el eb' 'a spatquil 'el camplamento, eb' winac mto eb' 'ix 'ix, sec wach' may tas to man̈ wach'c 'ayc' 'a yojl camplamento 'a 'aj 'ayn 'ec' eyet'oc, xchi Dios.

⁴ 'Ix syiclj eb' israel tas xyal Jehová 'a Moisés, 'ix yij 'elt eb' jun tzo'n̈ 'anma cha.

Ley 'a eb' tz'och smul 'a junc tas

⁵ 'Ix yaln Jehová 'a Moisés 'ixtic:

⁶ Al jun tzo'n̈ tic 'a eb' et israelal: To an Jehová in, an tzwala, toto 'ay junc winac, mto junc 'ix matz yiclj tas tzwala, mto tzsay smulc 'a junc yit 'anma'il, a jun cha, wan yoch smul.

⁷ Yowlal tzyojquej 'el tas 'aj tz'och smul cha. An̈jtona', yowlal pax tzyac' sjel jun 'aj tzsay smulc cha, tzya'n pax junc xo yomacn̈il 'a yib'n̈ 'icha 'aj tz'och smul cha.

⁸ Toto tox xcham junc 'anma chi 'aj say smuloc, mto man̈x 'a pax junc mach 'ayt yuj sb'a yet'oc, junc smoj schan sjel junc tas cha, to 'ixta', a junc cha, tz'ochcn wico'oc, ax 'a yol sc'ab' junc ya'mal 'och sti eb' 'anma tzcani. An̈jtona tzya'n pax junc no mam calnelu xajmb'aloc, sec wach' tz'ajx can lajwc smul jun 'anma cha.

⁹ Smasnil ofrenda tzyac' eb' israel 'ayin, tz'ijx 'at 'a yojltac win ya'mal 'och sti eb' 'anma cha; a jun tzo'n̈ cha, yic win tz'aji.

¹⁰ Smasnil tas tz'ajx 'ayin, to tz'ijx 'at 'a winac, yic win tz'aji, xchi Dios.

Ley 'a yib'n̈ c'a'lc'ojlal

¹¹ 'Ix yaln Jehová 'ixtc 'a Moisés:

¹² Al jun tzo'n̈ tic 'a eb' et israelal: To an Jehová in, an tzwala, toto 'ay junc winc tzna'a, to tzmuln yistzil 'a yol sc'ab',

^13-14 mto tox 'ix muln 'ix yet' junc winac, palta matz nachj 'el yuj win yichmil 'ix cha, yujto matz yal 'ix, may pax junc mach x'iln smuln 'ix. Mto 'ay pax junc winc ton̈j tznan chan̈ junc chi 'a spatc yistzil 'a nab'an̈ej, toxn̈ej may smul 'ix tzya'ch 'a yol sc'ab' yichmil cha.

¹⁵ A chab' nab'en tic, a win winc cha, tzyij 'at win 'ix yistl chi 'a yojltac win ya'mal 'och sti eb' 'anma'. Tzlajw cha, tzya'n chan̈e'oc libra 'ixm harina cebada 'icha ofrendail yuj 'ix. Matz secx 'ejm aceite 'a yib'n̈ 'ixim, matz 'ajx pax incienso yet'oc, yujto a jun ofrenda cha, yic c'a'lc'ojlal yaji, ofrenda yic tzya'n checljoc 'el 'ajmulal.

¹⁶ Ax win ya'mal 'och sti eb' 'anma cha, a 'oj alnoc, to tznitz cot sb'a 'ix. Tzlajw cha, tzjaw 'ix 'a wojltac an Jehová in.

¹⁷ Ax win ya'mal 'och sti eb' 'anma cha, yajn̈ej tzyi'n cot jac a a to wicn̈ej yaj 'a yol junc 'uc'ab', tzyi'n chan̈ jac pococ 'ay 'a in cajnub', tzya'n 'ejm 'a scal a a cha.

¹⁸ Tzyi'n 'och wan win 'ix 'a wojltac, tzyi'n 'el win spotl sjolm 'ix, tzya'n 'och win jun ofrenda yic c'a'lc'ojlal chi 'a yol sc'ab' 'ix, yic tzya'n checljoc 'el smul 'ix; ax win ya'mal 'och sti eb' 'anma cha, a tz'i'n cot a a caw c'a, jun tz'i'n cot yailal,

¹⁹ ax 'oj 'a'nc yac' 'ix 'ix chi sti', 'oj yalnc 'a 'ix 'ixtic: Toto caw yel may 'aj ach muln yet' junc winc 'a yol sc'ab' echmil tic, may pax junc winc xa c'umej, yic tzach juw 'el yu'uj, to 'ixta', may tas 'oj aji, yic 'oj o'nc a a c'a 'et'jnac yailal tic.

²⁰ Palta toto ach muln yet' junc xo winac, xa'n 'och a mul 'a yol sc'ab' echmil, yic man̈ wach'c tzach 'ajcn yuj winac,

²¹ a Jehová, a 'oj a'n 'och ch'oxnb'ilal 'a scal eb' et chon̈ab', yic tzach sb'inan eb' a maysch'olnilal, 'oj malchan̈ a c'ojol, ax stz'onb' pax 'el a niwnal.

²² Atn wal jun yailal chi 'oj jawc 'a eb'an̈, yic 'oj o'nc 'ejm jun a a 'et'jnac yailal tic, 'oj schic win 'a 'ix. Ax sta'w 'ix 'ix chi 'ixtic: B'o cab' 'ixta', xchi 'ix.

²³ Ax win ya'mal 'och sti eb' 'anma cha, 'oj stz'ib'c jun tzo'n̈ paxti tic 'a junc ch'an̈ u'un̈, ax sb'icn 'el yet' a c'a a cha.

²⁴ Tzlajw cha, tz'ajx yuc' 'ix, sec c'a tz'aj yol sc'ojl 'ix yuj a'.

²⁵ Tzchan 'ec' jun ya'mal 'och sti eb' 'anma chi jun ofrenda yic c'a'lc'ojlal chi 'a yol sc'ab' 'ix; ax win tzwul 'a'nc 'a wojltac,

²⁶ tzyi'n chan̈ jun jopoc jun ofrenda cha, ax ya'n tz'a 'a yib'n̈ yet'l xajmb'al, yuj snanb'ilc cot smasnil jun ofrenda cha. Tzlajw cha, tzya'n win yuc' 'ix a a cha.

²⁷ Toto x'och smul 'ix 'a yol sc'ab' yichmil, a jun a 'oj yuc' 'ix cha, c'a 'oj 'aj yol sc'ojl 'ix yuj a', 'oj malchan̈ sc'ojl 'ix, ax stz'onb' pax 'el sniwnal 'ix, ax yochcn 'ix ch'oxnb'il yic maysch'olnilal 'a scal eb' yit chon̈ab'.

²⁸ Palta toto may smul 'ix, may xon 'oj 'aj 'ix, 'oj stac' yaljn̈ej yune 'ix.

²⁹ Atn jun ley tic tz'och 'a yib'n̈ 'ix 'ix, toto tzmuln 'ix 'a yol sc'ab' yichmil, yuj yi'n cot sc'a'lc'ojlal winac,

³⁰ mto 'ay junc win ton̈j tzowx 'och 'a spatquil yistzil. A win 'ichmilab'il cha, yowlal tzyij cot win yistl chi 'a wojltac, ax win ya'mal 'och sti eb' 'anma cha, a win tzb'on yaj 'ix yet' tas tzyal jun ley tic.

³¹ May yailal 'oj jawc 'a yib'n̈ win yichmil 'ix cha; palta toto a 'ix 'ix chi 'ay smul, mun a 'a yib'n̈ 'ix 'oj jawc yailal, xchi Dios.