Nm 4 - Chuj San Sebastian Bible

A smunljel eb' levita

¹ 'Ix yaln Jehová 'a Moisés yet' 'a Aarón 'ixtic:

² 'Ijec q'ue wan sb'isl eb' levita, atn eb' yin̈tl Coat, a tzyal smacquixtacl yaj yin̈tl eb'.

³ Tz'el yich 'a eb' 30 ab'il sq'uinal, tzc'och 'a eb' 50 ab'il. A eb' tic smoj ya'w servil 'a in Mantiado 'aj tzin chaj in b'a eyet'oc.

⁴ A smunljel eb' yin̈tl Coat, to tztan̈wj eb' jun tzo'n̈ tas caw wicn̈ej yaji, atn jun tzo'n̈ tic:

⁵ A yic tz'atx eb' chon̈ab', ach xo Aarón yet' eb' onnal, ax tzeyij 'el eb' te cortina 'aych smacloc jun Lugar to cojn in 'ay wico'. Tzlajw cha, tze lan̈n scaxail in trato yet' te'.

⁶ Ax 'a yib'an̈, ata tzeyac' q'ue junc tz'um caw lab'mtac, sec a tzq'ue smacloc, ax 'a yib'n̈ jun tz'um cha, tzeyac' q'ue junc q'uic'mucnac nip. Tzlajw cha, tzeya'n 'och sb'achnub'al, sec wach' yijx b'eyoc.

⁷ Tzeya'n q'ue pax junc q'uic'mucnac nip 'a yib'n̈ mexa 'ay 'a wojltac, ax 'a yib'an̈, ata tzeyac' q'ue jun tzo'n̈ 'uc'ab', jun tzo'n̈ q'uen niwc cuchara, jun tzo'n̈ vaso, jun tzo'n̈ xalu yic yal uva tz'ajx ofrendail, yet' 'ixm pan to tz'ajx xoni.

⁸ Ax 'a yib'n̈ jun tzo'n̈ cha, ata tzeyac' q'ue junc chac nip, tze macn pax yib'n̈ chi yet' junc no tz'um caw wal wach', tzeya'n 'och sb'achnub'al, sec wach' yijx b'eyoc.

⁹ Tzlajw cha, tzeyi'n cot pax junc xo te q'uic'mucnac nip, tzeya'n q'ue 'a yib'n̈ jun tzo'n̈ tic: jun yet'l cantil yet' scantilal cha, q'uen tzluchn 'el stan̈il mecha, jun tzo'n̈ yuc'b'al, yet' 'a smasnil jun tzo'n̈ vaso tzc'anx 'a aceite.

¹⁰ Smasnil jun tzo'n̈ cha, 'oj e lan̈ yet' junc no tz'um caw tzlab'b'i. Tzlajw cha, tzeya'n q'ue 'a yib'n̈ sb'achnub'al, sec wach' sb'achx b'eyoc.

¹¹ Ax eya'n q'ue pax junc q'uic'mucnac nip 'a yib'n̈ jun yet'l xajmb'al nab'a oro. Tzlajw cha, tze lan̈n yet' junc no tz'um caw tzlab'b'i cha. Tzeya'n 'och sb'achnub'al, sec wach' yijx b'eyoc.

¹² Tzeyamb'tzan pax smasnil yamc'ab' tzc'anx 'a in cajnub', tze pichn 'och 'a yol junc q'uic'mucnac nip, tzeya'n pax 'och junc tz'um caw tzlab'b'i 'a 'a, tzeya'n pax 'och sb'achnub'al.

¹³ Yowlal tzeyij 'el q'uen ta'an̈ yet' no xepu tox scalj sb'a yet' q'ue'en 'a yet'l xajmb'al. Tzlajw cha, tze lan̈n jun yet'l xajmb'al chi yet' junc te nip púrpura.

¹⁴ Ax 'a yib'an̈, ata tzeyac' q'ue smasnil tas tzc'anx 'a jun yet'l xajmb'al cha: atn jun tzo'n̈ yet'l stzac'ac', jun tzo'n̈ syamnub'al, jun tzo'n̈ sluchlab'il, jun tzo'n̈ niwc 'uc'ab', yet' smasnil syamc'ab'il jun yet'l xajmb'al cha. Ax 'a yib'n̈ smasnil jun tzo'n̈ tic, ata tzeyac' q'ue junc no tz'um caw tzlab'b'i, tzeya'n pax 'och sb'achnub'al.

¹⁵ A yic tzlajw e pichn smasnil jun tzo'n̈ tas caw niwn yel'ch tic, yic wach'x yaji, tztac' xo sjaw eb' yin̈tl Coat, yic tzyi'n 'at eb' smasnil. Palta a smasnil jun tzo'n̈ wic yaj tic, matz tac' syamn eb' yet' sc'ab', sec wach' matz cham eb' yu'uj. Smasnil jun tzo'n̈ syamc'ab'il Mantiado cha, a eb' yin̈tl Coat yowlal a eb' tz'i'n 'ati.

¹⁶ A Eleazar yunnal Aarón ya'mal 'och sti eb' 'anma 'ayin, a tz'iln aceite tzc'anx 'a cantil, incienso caw wal wach' sjab', ofrenda 'a 'ixm trigo to yowlal tz'ajx 'ayin, yet' perjuma tzc'anlb'ax 'a yic tzsi'x 'och junc 'anma wico'oc, mto junc xo tas. A tztan̈wni in cajnub' yet' smasnil syamc'ab'il, xchi Dios.

¹⁷ 'Ix yaln pax Jehová 'a Moisés yet' 'a Aarón 'ixtic:

¹⁸ Man̈ e cha satl eb' yin̈tl Coat 'a scal eb' levita,

¹⁹ sec wach' ma'oj comn cham eb', yic tzyamn eb' jun tzo'n̈ tas to wic yaji. Yowlal tze b'eylb'ej jun tzo'n̈ 'oj wal tic: Ach Aarón ach tic yet' eb' onnal, yowlal ax 'oj eyal 'a eb' tastc 'oj sb'o junjn eb', yet' pax tastc 'oj yic' eb'.

²⁰ Yuj cha, matz tac' yoch eb' junc rato 'at yil jun tzo'n̈ tas to wicn̈ej yaji, sec wach' matz cham eb' yu'uj, xchi Dios.

²¹ 'Ix yaln pax Jehová 'ixtc 'a Moisés:

^22-23 'Ij q'ue wan pax sb'isl eb' yin̈tl Gersón, a tzyal smacquixtacl yaj yin̈tl eb', tz'el yich 'a eb' 30 ab'il sq'uinal, masnto 'a eb' 'aych 'a 50 ab'il. Eb' smoj ya'w servil 'a in Mantiado 'aj tzin chaj in b'a eyet'oc.

²⁴ A smunljel eb' yin̈tl Gersón, atn tic:

²⁵ Yowlal a eb' tz'i'n 'at jun tzo'n̈ cortina 'ay q'ue smacloc yib'n̈ in cajnub' yet' chab' xo smacl yib'an̈; no tz'um caw tzlab'b'i, yet' te cortina 'aych 'a spuertail;

²⁶ te cortina 'aych 'a stitc yamq'uil in cajnub', te yic yet'l xajmb'al, te cortina 'aych 'a spuertail yamq'uil in cajnub', smasnil sch'an̈il yet' pax smasnil syamc'ab'il tzc'anx 'a 'a.

²⁷ Ach Aarón yet' eb' onnal, ax 'oj eyi'b'ey eb' yin̈tl Gersón 'a tas munljel tzb'o'o, yet' yic tzyi'n 'at eb' tas to smoj tz'ijx 'ati, tze ch'ox tas tzyij 'at junjn eb'.

²⁸ Atn wal yopiso eb' yin̈tl Gersón tic, yic tzmunlj eb' 'a in Mantiado 'aj tzin chaj in b'a eyet'oc; yiclum cab' eb' 'a smasnil tas tzyal Itamar, win onnal.

^29-30 'Ij q'ue wan pax sb'isl eb' yin̈tl Merari, a tzyal smacquixtacl yaj yin̈tl eb', tz'el yich 'a eb' 30 ab'il sq'uinal, masnto 'a eb' 'aych 'a 50 ab'il. Eb' smoj ya'w servil 'a in Mantiado cha.

^31-33 A smunljel eb', to a eb' tz'i'n 'at smasnil te stel Mantiado cha, atn ya'nte'al, scan̈nub'al, yoyal, sb'achnub'al; smasnil te 'oy oyn 'och 'a stitc yamq'uil in cajnub', sb'achnub'al, sch'an̈il, yistacail yet' smasnil syamc'ab'il tzc'anx 'a 'a. A Itamar onnal, a 'oj alnoc 'a eb' yin̈tl Merari tas 'oj sb'o junjn eb' yet' tas smoj yi'n 'at junjn eb', xchi Dios.

^34-48 Ax Moisés yet' Aarón, yet' pax eb' syajlil chon̈ab', 'ix yij q'ue wan eb' sb'isl eb' yin̈tl Coat 'a 'icha smacquixtacl yaj eb'. A eb' winc xq'ue wan sb'isl cha, 'ay 2,750 eb' 'a smasnil. A sb'isl eb' yin̈tl Gersón 'a stzolil, 'ay 2,630 eb' winc 'a smasnil. Eb' yin̈tl Merari 'a stzolil, 'ay 3,200 eb' winc 'a smasnil. Yuj cha, a sb'isl eb' levita xya' tz'ib'xoc sb'a 'a smasnil, 'ay 8,580 eb' winac. Atn eb' 'aych 'a 30 ab'il sq'uinal masnto 'a eb' 50 ab'il, eb' smoj ya'w servil 'a sMantiado Dios.

⁴⁹ 'Ix 'ijx q'ue wan sb'isl eb' winc tic, xlaw cha, 'ix alx 'a junjn eb' tas yowlal 'oj sb'o eb', yet' tas smoj 'oj yi't eb', 'icha 'ix yutj Jehová yaln 'a Moisés.