Nm 36 - Chuj San Sebastian Bible

Smacl lum eb' 'ix 'ix

¹ A eb' yajl yaj 'a scal eb' yunnal Galaad, atn eb' yin̈tl can Maquir, yunnal Manasés yixchicn José. A eb' tic xc'och 'a Moisés yet' 'a eb' yajl yaj 'a scal eb' yit israelal, 'ix yaln eb' 'ixtc 'a eb':

² A Jehová a 'ix alni, to ach Moisés ach tic, ach tza pojc' lum qui macl lum chi 'a 'ayon̈. To suerteal tz'aj lum spojx 'eq'ui, yaln̈ej 'aj tzcan yic junjn mach. Xyaln pax Jehová to a lum smacl win Zelofehad, win quican on̈, atn win xi'lb'a, to tzac' lum smacl win chi 'a eb' 'ix yisil.

³ Palta q'uinloc tzyij sb'a eb' 'ix yet' junc win quit chon̈b' chuc 'in̈tal, ax lum slum eb' 'ix cha, man̈x 'a am yaln lum yic 'a lum quic chi 'on̈, tz'e'cn am lum yet' lum yic ewin tzyij sb'a yet' eb' 'ix cha. Toto 'ixta', 'ipn ye'x can lum qui macl chi tzqui chaj chi 'on̈.

⁴ Ax yic 'oj jawc jun ab'il yic tz'el junc tas 'a libre 'a qui cal, ax lum slum eb' 'ix cha, ax 'ijnoc am ye'cn lum yico'oc junc xo 'in̈tal chi 'a jun 'ejmn̈ej. 'Ixta am tz'aj lum yelcn 'a yol qui macb'en on̈, xchi eb'.

⁵ Xlajw cha, 'ix yaln Moisés 'ixtc 'a eb', a tzyal 'ix yutj Jehová yalni: —Yel ton tzyal eb' yin̈tl José tic.

⁶ A eb' 'ix yisl can Zelofehad, tztac' yi'n sb'a eb' 'ix yet' eb' winc to junn̈j to yin̈tl yet' smam eb' 'ix,

⁷ sec a lum slum eb' 'ix tzchaj cha, matz tac' yec' lum yico'oc junc xo 'in̈tal. Yuj cha, smasnil eb' israel yowlal tzcol eb' smacl lum chi 'a yin̈tl cha.

⁸ Toto 'ay junc 'ix 'ix tzann̈j 'in̈tal, 'ay smacl lum 'ix, yowlal cab' a junc winc junn̈j yin̈tl yet'oc, a tzyij sb'a yet' 'ix. 'Ixtnta tzeyutj e coln can 'el e macl lum tze chaj 'a smacl e mam.

⁹ Matz tac' yec' slum junc 'in̈tal yico'oc junc xo 'in̈tal. Junjn 'in̈tal eb' israel, mun tzcan eb' yet' smacl lum tzcha'aj, xchi Moisés.

^10-11 Yuj cha, ax eb' 'ix yisl Zelofehad, syiclj eb' 'icha xyutj Jehová yaln 'a Moisés, atn 'ix Maala, Tirsa, Hogla, Milca yet' 'ix Noa. 'Ix laj yij sb'a eb' 'ix yet' ewin yican can smam,

¹² atn ewin yin̈tl Manasés, win yunnal can José. 'Ixta x'aj scancn smacl lum eb' 'ix chi 'a yol smacb'en eb' 'aj cotnc yin̈tl smam eb' 'ix.

¹³ Atn jun tzo'n̈ ley yet' checnb'il tic 'ix yac' Jehová 'a Moisés, sec tzb'eylb'ej eb' israel. 'Ix alx 'a eb' yic 'ayc' eb' 'a lum ya'lical Moab, 'a sti a Jordán 'a yojltac Jericó.