Nm 35 - Chuj San Sebastian Bible

A schon̈b' eb' yin̈tl Leví

¹ 'Ix yaln pax Jehová 'ixtc 'a Moisés yic 'ayc' eb' 'a lum ya'lical Moab, 'a sla'nil sti a Jordán 'a yojltac Jericó:

² Al 'a eb' et israelal tic: A 'a lum slum eb' chi tzchaj cha, ata tzcan yet'l schon̈b' eb' yin̈tl Leví 'aj 'oj can cajan, tzcan pax swalab' scajb'en noc' eb' 'a stz'ey schon̈b' cha.

³ A 'a jun tzo'n̈ chon̈b' chi 'aj 'oj can eb', ax 'a stz'ey schon̈b' eb' chi 'oj wa scajb'en noc'.

⁴ A swalab' scajb'en noc' eb' cha, 450 metro tz'ajl 'a 'aj 'ay smuroal chon̈b' cha.

⁵ A smasnil lum lum cha, 900 metro tz'ajcn 'a junjn spac'b'il. Lajn tz'aj yechl 'a schan̈paq'uil, 'a norte, 'a sur, 'a 'aj tzq'uel c'u yet' 'a 'aj tz'em c'u. Ax 'a spacl snan̈l lu'um, ata tzcan junjn chon̈b' cha.

⁶ A 'a scal jun tzo'n̈ chon̈b' tz'ajx 'a eb' levita cha, ata 'ay waque chon̈b' 'aj wach' tz'at scol sb'a eb' 'anma tzmil cham junc yit 'anma'il, toto man̈ sc'anc sc'ojol. Chuc pax tzeyac' junc xo 42 chon̈b' chi 'a eb'.

⁷ Ax tz'aj eya'n can 'elt schon̈b' eb' levita cha, yet' swalab' scajb'en noc' eb', 'ay 48 'a smasnil.

⁸ A 'a smacl lum eb' yit israelal eb' cha, ata tz'elt jun tzo'n̈ chon̈b' chi tz'ajx 'a eb' levita cha. Yuj cha, junjn 'in̈tal eb', 'oj yac' 'elt eb' jayjnoc chon̈b'al. A eb' niwc slu'um, niwn chon̈b' chi 'oj yac' 'elt eb', ax eb' jab' wal slu'um, jayen̈ej chon̈b' chi tzyac' eb', xchi Dios.

Eb' chon̈b' 'aj tzcol sb'a eb' 'anma'

⁹ 'Ix yaln Jehová 'a Moisés 'ixtic:

¹⁰ Al jun tzo'n̈ tic 'a eb' et israelal: A yic tzex c'axw can 'ec' 'a a Jordán tic, yic tzex c'och 'a lum Canaán,

¹¹ yowlal tze si'cn 'el jaye'oc chon̈b'al 'aj wach' 'at scolnc sb'a eb' 'anma tzmil cham junc yit 'anma'il, eb' to man̈ sc'anc sc'ojl tzmilwji.

¹² Ata tzcol sb'a junc 'anma cha. Wach'xam tzsayx 'ec' yuj junc 'ayt yuj sb'a yet' jun tzcham cha, matz tac' scomn chami, toto mantzac b'eyc'ojlax yuj eb' yajl yaj 'a scal eb' chon̈b' cha.

¹³ A 'a scal smasnil chon̈b' cha, waque chon̈b' chi 'aj wach' scoln sb'a eb' 'anma cha:

¹⁴ 'Oxe tzcan 'a sc'axpil 'e't sti 'a Jordán 'a stojlal 'aj tzq'uel c'u, 'oxe pax tzcan 'a yol yic Canaán.

¹⁵ A 'a waque chon̈b' cha, ata tzcol sb'a eb' 'anma tzmiln junc xo mach. Ata tzcol sb'a eb' et israelal, mto eb' chuc chon̈b'al cajn 'a e cal, yet' pax eb' ton̈j 'e'lb'a yec' 'a e cal, eb' to man̈ sc'anc sc'ojl tzmilwji.

^16-18 Toto 'ay mach tzma'n junc 'anma yet' junc q'uen yamc'ab' yic owal, mto yet' junc comn q'ue'en, mto yet' junc te te', ax jun tzma'x cha, toto tzlajwi, ax tz'aji tzchami, a jun tzma'wj cha, milj cham 'anma tzb'o'o, yowlal tzma'x cham pax jun xo.

¹⁹ A junc 'ayt yuj sb'a yet' junc 'anma tzcham cha, a tztac' ya'n spac jun tzcham cha, yaln̈ej 'aj tzchaj sb'a yet' jun milm cham 'anma cha.

²⁰ Toto 'ay mach tzecn telwc junc mach yuj schichnc'ojlal, mto tzjulch junc tas 'a junc xo mach yuj stu nab'enal,

²¹ mto 'ajc'ojl yajch junjn eb' 'a 'a, yuj cha, tzma'n yet' sc'ab', ax tz'aji tzcham junc 'anma chi yu'uj, a jun tzma'wj cha, milj cham 'anma tzb'o'o, yowlal tzcham pax jun xo. Ax junc 'ayt yuj sb'a yet' jun tzcham cha, a tztac' smiln chamoc.

²² Q'uinloc 'ay mach tzecn telwc junc mach to man̈ sc'anc sc'ojol, man̈ yujoc pax schichnc'ojlal, ax tz'aji, tzchami. Q'uinloc tzjulch pax junc tas 'a junc mach, palta man̈ yujoc stu nab'enal, ax tz'aji, tzchami.

²³ Q'uinloc matz yila yic tzjuln 'at junc q'uen q'uen 'a junc yit 'anma'il, ax tz'aji tzchami, palta man̈ 'ajc'ojloc yajch junjn eb' 'a 'a, man̈ nanoc pax yu'uj toto tz'och smul 'a jun 'anma cha.

²⁴ Toto 'ixta', ax eb' 'anma 'aj chon̈b' 'aj tzuj jun cha, a eb' tzb'onyaj win tzmilwj cha, yet' pax win yican junc 'anma chi tzcham cha, a tzyal tas tzyutj eb' sb'onyaji.

²⁵ Ax eb' chon̈b' cha, a eb' tzcoln win tz'och smul chi 'a yol sc'ab' win yican junc tzcham cha. Yowlal tzya'x meltzjoc eb' jun 'ay smul chi 'a jun chon̈b' 'aj tzcol sb'a cha, tzcann̈j ta', masnto tzcham win sat ya'mal 'och sti eb' 'anma sic'b'il can 'och 'a yopiso.

²⁶ Palta toto tz'el 'a yol smacb'en jun chon̈b' chi 'aj 'ayc' scol sb'a cha,

²⁷ ax tz'aji, tzchan sb'a yet' junc yican jun chamnc cha, toto tzmilx can cham yu'uj, a jun cha, matz 'och smulc jun tzmilwj cha.

²⁸ A jun tzmilwj cha, yowlal tzcan 'a jun chon̈b' chi 'aj wach' scoln sb'a, masnto tzcham win sat ya'mal 'och sti eb' 'anma 'ayin. 'Ixta to b'i'an, tztac' spax win 'a slu'um.

²⁹ A jun tzo'n̈ tic ley tz'ajcn 'a e cal, yet' 'a eb' eyin̈tl b'aq'uin̈, yaln̈ej 'ajtil 'ayx 'eq'ui.

³⁰ Toto 'ay jaywn̈oc mach tzyac' testigoal sb'a yuj junc mach tzmilwji, a jun tzmilwj cha, tztac' schami, palta toto cojn junc mach tzyac' testigoal sb'a yu'uj, a jun 'anma cha, matz tac' schami.

³¹ Matz tac' schax tumn 'a junc milm cham 'anma', toto tox x'ajx 'och 'a yib'an̈, tojln̈ej schami.

³² Matz tac' schax tumn 'a win milm cham 'anma', sec tztac' yelt 'a 'aj 'ayc' scol sb'a cha, sec tzpax 'a slum 'a yic mantzac cham win sat ya'mal 'och sti eb' 'anma cha.

³³ Man̈ eyixtc 'el lum lum chi 'aj 'oj eyaj cajn chi yuj schic'l eb' 'anma tzmilx chamoc. Toto 'ay chic' tz'elcn 'a sat lu'um, may junc xo tas tztac' ya'n tupoc, cojxnto tzcham jun 'ay smul cha.

³⁴ Yuj cha, man̈ eyixtc 'el sat lum lum 'aj 'oj e c'och cajn cha, yujto an Jehová in tic, 'oj waj cajn pax eyet' 'a lum lum cha, xchi Dios.