Nm 34 - Chuj San Sebastian Bible

A smon̈jonal jun nacion̈ cha

¹ 'Ix yaln pax Jehová 'ixtc 'a Moisés:

² Al smasnil jun tzo'n̈ cuynb'il tic 'ixtc 'a eb' et israelal: Jab'xoj wal e c'och 'a lum Canaán. A jun lum cha, to eyic yaji, yuj cha, yaj smon̈jonal 'aj 'oj c'ochoc.

³ A smon̈jonal 'a stojlal sur, ata tz'ec' 'a lum cusltac lum yic Zin, 'a sti smon̈jonal lum Edom. Tzchaj 'el yich 'a stojlal 'aj tzq'uel c'u, masnto tzc'och 'a stojlal sur yic 'a Mar Muerto.

⁴ Tz'e'n̈j 'a stojlal sur cha, masnto tzc'och 'a yich witz Acrabim, tz'atxi, tz'ec' 'a Zin masnto tzc'och 'a Cades-barnea. Tz'atxi, tz'ec' 'a Hazar-adar masnto tzc'och 'a Asmón.

⁵ Tz'atx 'a Asmón cha, masnto tzc'och 'a a b'eymal a yic Egipto, axta tzlajw c'och 'a sti a Mar Mediterráneo.

⁶ A smon̈jonal 'a stojlal 'aj tz'em c'u, atnn̈ej sti a Mar Mediterráneo.

⁷ Smon̈jonal 'a stojlal norte, tz'eln̈j yich 'a sti a Mar Mediterráneo masnto tzc'och 'a sjolm lum witz tzcuch Hor.

⁸ Tz'atx 'a jolm witz Hor, masnto tzc'och 'a 'aj tzon̈ 'ochch 'a Hamat, tz'atxi, masnto tzc'och 'a Zedad.

⁹ Tz'atx 'a Zedad cha, masnto tzc'och 'a Zifrón, axta tzlajw c'och 'a Hazar-enán.

¹⁰ Ax smon̈jonal 'a stojlal 'aj tzq'uel c'u, tojln̈ej s'at 'a Hazar-enán, masnto tzc'och 'a Sefam.

¹¹ Tz'atx 'a Sefam masnto tzc'och 'a Ribla, 'a stojlal 'aj tzq'uel c'u 'a Aín. Tzlajw cha, tz'emx jun mon̈jon chi 'a stojlal 'aj tzq'uel c'u 'a spac'b'il a niwquil pama tzcuch Cineret,

¹² tz'atxn̈ej 'a sti a Jordán, masnto tzlajw c'och 'a sti a Mar Muerto. A smasnil jun tzo'n̈ mon̈jon cha, a tz'ochcn smon̈jonoc e lum cha, xa chi 'a eb', xchi Dios 'a Moisés.

A tas tz'aj spojx 'ec' lum lu'um

¹³ Yuj cha, 'ix yaln Moisés jun tzo'n̈ checnb'il tic 'ixtc 'a eb' israel: A jun lum cha, to 'oj e mol pojc 'ec' 'a e cal, a tzyal e suerte junjn c'aj ex, atn jun lum chi xyal Jehová to tzpojx 'ec' 'a snan̈l slajn̈il to 'in̈tal eb' quit israelal to mant 'a slu'um.

^14-15 Yujto a nan̈l yoxl 'in̈tal eb', tox 'ix schaj eb' smacul, atn eb' yin̈tl Rubén, Gad yet' spacl eb' yic Manasés, atn lum xcan 'a sc'axpil 'e't sti a Jordán, 'a stojlal 'aj tzq'uel c'u, lum tzcan 'a yojltac Jericó, xchi Moisés.

¹⁶ 'Ix yaln pax Jehová 'ixtc 'a Moisés:

¹⁷ A eb' 'oj pojnoc 'ec' lum lum chi 'a scal eb' et israelal, atn Eleazar ya'mal 'och sti eb' 'anma 'ayin, yet' Josué win yunnal Nun.

¹⁸ Palta yowlal tzeyawtj cot junjnoc eb' yajl yaj 'a scal junjn 'in̈tal eb' chon̈b' cha, yic tzpoj lu'um.

¹⁹ A eb' winc tzeyawtj cot cha, atn eb' tic: A 'a eb' yin̈tl Judá, tzcot Caleb win yunnal Jefone.

²⁰ 'A eb' yin̈tl Simeón, tzcot Semuel win yunnal Amiud.

²¹ 'A eb' yin̈tl Benjamín, tzcot Elidad win yunnal Quislón.

²² 'A eb' yin̈tl Dan, tzcot Buqui win yajl yaj 'a scal eb', atn win yunnal Jogli.

²³ 'A eb' yin̈tl Manasés win yunnal José, tzcot Haniel win yajl yaj 'a scal eb', atn win yunnal Efod.

²⁴ 'A eb' yin̈tl Efraín, tzcot Quemuel win yajl yaj 'a scal eb', atn win yunnal Siftán.

²⁵ 'A eb' yin̈tl Zabulón, tzcot Elizafán win yajl yaj 'a scal eb', atn win yunnal Parnac.

²⁶ 'A eb' yin̈tl Isacar, tzcot Paltiel win yajl yaj 'a scal eb', atn win yunnal Azán.

²⁷ 'A eb' yin̈tl Azer, tzcot Ahiud win yajl yaj 'a scal eb', atn win yunnal Selomi.

²⁸ Ax 'a eb' yin̈tl Neftalí, tzcot Pedael win yajl yaj 'a scal eb', atn win yunnal Amiud, xchi Dios.

²⁹ A 'a yol sc'ab' eb' winc tic, ata 'ix can lum Canaán yuj Jehová yic tzpojn 'ec' eb' lum 'a eb' yit israelal cha.