Nm 33 - Chuj San Sebastian Bible

A tas x'aj sb'ey cot eb' israel

¹ 'Ixtc wal x'aj sb'ey cot eb' israel yic 'ix 'elt eb' 'a Egipto, stzol-l x'aj eb' scoti. A Moisés yet' Aarón, a eb' xjucb'tzan eb'.

² A Moisés 'ipn stz'ib'n can sb'i jun tzo'n̈ lugar 'aj xlaj b'ey cot eb' cha. Jab'jnal x'aj eb' sb'eyi, yujto 'ixta xyutj Jehová yalni, atn sb'i jun tzo'n̈ lugar tic 'aj xlaj 'ec' eb'.

³ A 'a olajn̈e yoch b'ab'l 'uj yic jun ab'il cha, 'ix 'elt eb' israel 'a Ramesés 'a yewial xo yec' q'uin̈ yic yel eb' 'a libre. 'Ix 'elt eb' yet' sjelnal 'a sat eb' 'aj Egipto cha,

⁴ ya' sb'a wanto smucn eb' 'aj Egipto chi eb' sb'ab'l 'unnal 'ix yac' cham Jehová. 'Ix 'el pax sq'uixwel sdiosal eb' 'aj Egipto chi yuj Jehová.

⁵ 'Ix 'elt eb' israel 'a Ramesés, axta xjaw eb' 'a lum Sucot.

⁶ X'elx eb' 'a Sucot, axta xjaw eb' 'a lum Etam, 'a smon̈jonal lum cusltac lu'um.

⁷ X'elx eb' 'a Etam, axta smeltzj eb' 'a lum Pi-hahirot. A jun lugar cha, ata 'ay 'a stojlal 'aj tzq'uel c'u 'a yol yic Baal-zefón, ata xcan eb' 'a yojltac cot Migdol.

⁸ 'Ix 'elx eb' 'a Pi-hahirot, 'ix 'e't eb' 'a yojl a mar, ax 'a lum cusltac lum xjaw eb'. 'Oxe c'u xb'ey eb' 'a lum cusltac lum yic Etam, axta xjaw eb' 'a Mara.

⁹ 'Ix 'elx eb' 'a Mara, axta xjaw eb' 'a lum Elim. Ata 'ay lajchwe spac'b'a', ata 'ay pax 70 te palma, axta xcan eb' 'a jun lugar cha.

¹⁰ 'Ix 'elx eb' 'a Elim, axta x'e'x eb' 'a sti a Chac Mar.

¹¹ 'Ix 'elx eb' 'a sti a Chac Mar, axta xjaw eb' 'a lum cusltac lum yic Zin.

^12-36 A yic 'ix 'elx eb' 'a lum cusltac lum Zin, 'ix 'e't eb' 'a Dofca, Alús yet' 'a Refidim. May a a wach' yu'n eb' ta'. 'Ix 'e't pax eb' 'a cusltac lum yic Sinaí, 'a Kibrot-hataava, 'a Hazerot, 'a Ritma, 'a Rimón-Peres, 'a Libna, 'a Rissa, 'a Ceelata, 'a Sefer, 'a Harada, 'a Macelot, 'a Tahat, 'a Tara, 'a Mitca, 'a Hasmona, 'a Moserot, 'a Bene-jaacán, 'a Hor 'a switzl Gidgad, 'a Jotbata, 'a Abrona, 'a Ezión-geber, yet' 'a lum cusltac lum yic Zin, tzyal 'el'chi, atn lum Cades.

³⁷ 'Ix 'elx eb' 'a Cades, axta xcan eb' 'a yich switzl Hor, 'a smon̈jonal lum Edom.

³⁸ Yujto a Jehová 'ix alni, yuj cha, 'ix 'at Aarón 'a sjolm lum witz Hor, axta 'ix chamcni, 'a b'ab'l c'u yic yol 'uj schan 'el yich schawinquil ab'il yelt eb' israel 'a Egipto.

³⁹ A yic xchamcn Aarón 'a lum jolm witz Hor, 123 ab'il sq'uinal.

⁴⁰ Ax win sreyl eb' cananeo 'aj Arad, atn win cajn 'a Neguev 'a yol yic Canaán, 'ix yab' sb'a chajtlto xc'och eb' israel 'a jun lugar cha.

^41-44 A yic 'ix 'elx eb' israel 'a yich witz Hor, 'ix 'e't eb' 'a Zalmona, 'a Punón, 'a Obot, yet' 'a Ije-abarim 'a smon̈jonal xo Moab.

^45-47 'Ix 'e't pax eb' 'a Dibón-gad, 'a Almón-diblataim, yet' 'a eb' lum switzl Abarim 'a stojlal 'aj tzq'uel c'u 'a Nebo.

⁴⁸ 'Ix 'elx eb' 'a lum switzl Abarim, axta xjaw eb' 'a lum ya'lical Moab, 'a sti a Jordán 'a yojltac Jericó.

⁴⁹ A jun camplamentoal eb' 'anma 'a sti a Jordán cha, 'ix 'atn̈j eb' 'a Bet-jesimot masnto xc'och eb' 'a Abel-sitim, 'a lum ya'lical Moab.

Sleyl tas tz'aj spojx 'ec' lum Canaán

⁵⁰ A 'a lum ya'lical Moab, lum 'ay 'a sti a Jordán 'a yojltac Jericó, ata xpaxtin pax Jehová 'a Moisés, 'ix yaln 'a 'ixtic:

⁵¹ Al smasnil jun tzo'n̈ tic 'a eb' et israelal, to an tzwal 'ixtic: A yic tzex c'axw 'ec' 'a yojl a Jordán, yic tzex c'och 'a lum Canaán cha,

⁵² tze pechl smasnil eb' 'anma cajn 'a jun tzo'n̈ nacion̈ cha. Tze ma'n can poj smasnil yechl 'aj tzyal sb'a eb', atn eb' q'uen q'uen b'ob'il yuj eb', q'uen josb'il, yet' smasnil jun tzo'n̈ smacsej eb' 'ay 'a jolmctac witz, c'uxn tzema'cn juwoc.

⁵³ A yic tzeya'n ganar eyi'n 'ec' lum lum cha, yajn̈j cha, tze b'on 'och e b'a 'a sat lu'um, tzex can cajn 'a 'a, yujto an tzwac' e caj lu'um.

⁵⁴ Palta yowlal suerteal 'oj eyutc e pojn 'ec' lum 'a junjn macn̈il, a tzyal jantc e b'ey 'a junjn 'in̈tal. A eb' niwn sb'isul, niwquil slum eb' chi tz'ajxi. A pax eb' to jaywn̈ej sb'eyi, jab' wal slum eb' tz'ajxi. Junjn 'in̈tal, 'oj scha smacl 'a 'aj suerte scani.

⁵⁵ Palta toto ma'oj e pechl eb' 'anma chi 'a sat lum lum cha, toto 'oj laj can eb' eyet'oc, caw 'oj ex yixtc eb'. 'Icha tzyac' junc c'alem tz'at 'a yol e sat, mto 'icha tzyac' te q'uix tzcan 'a e niwnal, 'ixta 'oj ex yutc eb', 'a yic 'oj e can cajn 'a lum lum cha.

⁵⁶ Ax 'a eyib'an̈, ata 'oj jawc tas to nab'ilx wuj 'a yib'n̈ eb', xchi Dios.