Nm 30 - Chuj San Sebastian Bible

Sleyl tas tzcutj ca'n 'el'choc qui ti'

¹ 'Ix yaln Moisés jun tzo'n̈ tic 'a eb' yajl yaj 'a scal junjn c'aj eb' yit israelal cha, 'ix yaln 'ixtic: A Jehová a tzaln jun tzo'n̈ tic:

² Toto 'ay mach tzyac' sti' ya'n junc tas 'a Jehová, mto junc strato tzb'o yet'oc, yowlal tzyac' 'el'choc spaxti cha, matz tac' sma'n 'ec' tas 'aj tzyac' sti cha.

³ A junc 'ix cob's 'ix 'ayt 'ec' 'a smam, toto 'ay junc tas tzyal 'ix yac' 'a Jehová, mto tzyac' 'ix sti' yic matz b'o 'ix junc tas,

⁴ ax yic tzyab'n smam 'ix yuj jun cha, palta may tas tzyal win yu'uj, toto 'ixta', yowlal tzyac' 'el'choc 'ix tas alb'il yuj cha.

⁵ Palta toto ax tzyab'n sb'a win mamb'il cha, to 'ay sti 'ix ya'jnac, yuj cha, tzcot yowl winac, to 'ixta', man̈x yowlalc tzyac' 'el'choc 'ix tas alb'il yu'uj. Ax Jehová 'oj yac' niwnc'ojlal 'a 'ix yuj 'aj matz yac' 'el'choc sti cha, yujto a win mamb'il chi tzma'n 'eq'ui.

⁶ A junc 'ix 'ix tzyac' sti 'a Jehová, tzlajw cha, tzb'on junc strato 'a sji'lti'al yic tznupn muc'uc,

⁷ ax yic tzyab'n sb'a win yichmil 'ix cha, q'uinloc may tas tzyal win yu'uj, yowlal tzyac' 'el'choc 'ix tas alb'il yuj cha.

⁸ Palta toto a yic tzyab'n sb'a win yuj jun cha, tzcot yowl win yu'uj, to 'ixta', man̈x yowlalc tzyac' 'el'choc 'ix sti cha. Ax Jehová 'oj yac' niwnc'ojlal 'a 'ix.

⁹ A junc 'ix 'ix tzyac' sti 'a Jehová, junc 'ix chamnc yichmil mto junc 'ix spojjnac sb'a yet' yichmil, yowlal tzyac' 'el'choc 'ix tas 'aj 'ix yac' sti'.

¹⁰ A junc 'ix 'ix 'ay yichmil, tzta'wni 'ix ya'n junc tas yic 'ayc' 'ix 'a yatut yichmil cha,

¹¹ ax yic tzyab'n sb'a win yichmil 'ix cha, to 'ay 'aj ya'jnac 'ix sti', q'uinloc may tas tzyal win yu'uj, mto matz yac' win yowlal, to 'ixta', yowlal tzyac' 'el'choc 'ix tas alb'il yuj cha.

¹² Palta toto a yic tzyab'n win yichmil 'ix cha, ax win tzma'n 'eq'ui, to 'ixta', man̈x yowlalc tzyac' 'el'choc 'ix sti cha. A Jehová 'oj yac' niwnc'ojlal 'a 'ix, yujto a yichmil 'ix chi tzma'n 'eq'ui.

¹³ A win yichmil 'ix cha, a win tztac' yalni, toto tzyac' 'el'choc 'ix yistl win chi sti 'a 'aj ya'jnac sti cha, mto ma'ay.

¹⁴ Palta toto a win yichmil 'ix cha, 'ayx sjayloc c'u yab'n win jun tzo'n̈ cha, may pax tas tzyal win yu'uj, wach' tzyac' 'el'choc 'ix tas ta'wb'il yuj cha.

¹⁵ Q'uinloc cob' tzya' to win yowlal, palta 'e'nc xo stiempoal, to 'ixta', a 'a yib'n̈ win winc chi tzcan smul yistl cha, xchi.

¹⁶ Atn jun tzo'n̈ ley tic xyal Jehová 'a Moisés, yuj tas tz'aj win winc yet' yistzil, yet' pax win mamb'il yet' yisil, yic 'ayt 'ec' 'ix yet' smam cha.