Nm 3 - Chuj San Sebastian Bible

A tas yowlal tzb'o eb' levita

¹ Atn eb' yunnal Aarón yet' eb' yic Moisés tic, 'a yic spaxtin Jehová 'a Moisés 'a sjolm lum witz Sinaí:

² Eb' yic Aarón: atn Nadab win b'ab'l 'unnab'il, tza'n win Abiú, Eleazar yet' Itamar.

³ A eb' chan̈wn̈ tic, 'ix si'x 'el eb' yic tz'ochcn eb' ya'malc 'och sti eb' 'anma 'a Dios.

⁴ Palta a Nadab yet' Abihú, 'ix cham eb' 'a yojltac Jehová 'a lum cusltac lum yic Sinaí, yujn̈ej to xya'ch eb' jun c'ac' chuc yel 'a yojltac Jehová, mant 'a xon yunnal eb'. Yuj cha, cojxn Eleazar yet' Itamar 'ix 'och ya'malc 'och sti eb' 'anma 'a Dios 'a yaln̈ schecnb'il Aarón, atn smam eb'.

⁵ 'Ix yaln pax Jehová 'a Moisés 'ixtic:

⁶ 'Awtj cot smasnil ewin yin̈tl Leví, yic tz'och eb' colwjoc yet' Aarón win ya'mal 'och sti eb' 'anma 'ayin, a tas 'oj yala', a 'oj sb'o eb'.

⁷ A eb' 'oj sc'anlb'oc Aarón yic tz'a'w servil eb' 'a eb' chon̈ab', 'a jun Mantiado 'aj tzin chaj in b'a eyet'oc. 'Ixta 'oj yutc eb' ya'n servil smasnil eb' eyit chon̈b' israel 'a in cajnub'.

⁸ Tztan̈wni pax eb' smasnil syamc'ab'il jun Mantiado cha, 'ixta tz'aj ya'w servil eb' 'a eb' israel 'a smasnil munljel 'a in cajnub'.

⁹ Pojl eb' levita 'a scal smasnil eb' eyit israelal, yic wach' tzc'anlb'ej Aarón eb' yet' 'a smasnil eb' yin̈til.

¹⁰ Cojn Aarón yet' eb' yin̈til, cojn eb' tz'ochcn yopiso ya'malc 'och sti eb' 'anma 'ayin. Toto 'ay junc 'anma man̈ 'ayc 'och jun 'opiso chi 'a yib'an̈, tzlajw cha, tzb'on 'icha tzb'o eb' 'ay yopiso cha, yowlal tzchami, xchi Dios.

A eb' levita yic Jehová yaj eb'

¹¹ 'Ix yaln Jehová 'a Moisés 'ixtic.

¹² A ticnec 'ix in si'cn 'el eb' levita sjelc junjn b'ab'l winc 'unn 'a scal eb' et israelal, yujto wic yaj eb' levita cha.

¹³ A yic xwa'n cham smasnil eb' sb'ab'l winc 'unn eb' 'aj Egipto, 'ix in colcn 'el eb' sb'ab'l winc 'unn eb' et israelal yic tz'och eb' wico'oc. 'Ixta pax smasnil sb'ab'l 'une no scajb'en noc' eb', wic yaj no'. An Jehová in, an tzwala, xchi Dios.

'Ix q'ue wan sb'isl eb' levita

¹⁴ 'Ix paxtin Jehová 'a Moisés 'a lum cusltac lum yic Sinaí, 'ix yaln 'ixtic:

¹⁵ 'Ij q'ue wan sb'isl eb' levita, a tzyal smacquixtacl yaj yin̈tl eb', tz'el yich 'a eb' jun 'ujl sq'uinal yet' 'a yojltac, xchi Dios.

¹⁶ Yuj cha, 'ix yi'n q'ue wan Moisés sb'isl eb', 'icha wal xyutj Jehová yalni.

¹⁷ A eb' yunnal Leví: atn Gersón, Coat yet' Merari.

¹⁸ A eb' yin̈tl Gersón: atn Libni yet' Simei, a tzyal smacquixtacl yaj yin̈tl eb'.

^19-20 A eb' yin̈tl Coat; atn Amram, Izhar, Hebrón yet' Uziel; eb' yin̈tl Merari, atn Mahli yet' Musi. A jun tzo'n̈ eb' tic, yajl yaj eb' 'a junjn macn̈ eb' yin̈tl Leví.

²¹ A eb' yin̈tl Gersón: atn eb' yic Libni yet' eb' yic Simei.

²² A sb'isl eb' winc 'a smasnil, x'el yich 'a eb' jun 'ujl sq'uinal yet' 'a yojltac; a 'a smasnil 'ay 7,500 sb'isl eb'.

²³ A smasnil jun tzo'n̈ eb' tic, ata 'ay smantiado eb' 'a stojlal 'aj tz'em c'u 'a spatquil 'el scajnub' Dios.

²⁴ A pax mach yajl yaj 'a eb' yin̈tl Gersón cha, atn Eliasaf yunnal Lael.

²⁵ A eb' tz'iln jun tzo'n̈ smacl yib'n̈ Mantiado yet' te cortina 'aych smacloc sti 'aj tzon̈ 'ochi,

²⁶ yet' te cortina 'aych smacloc sti 'amac', yet' pax te 'aych smacloc 'aj tzon̈ 'och 'a 'amc' cha, atn te oyn 'och 'a scajnub' Dios, yet' 'a yet'l xajmb'al, yet' pax sch'an̈l 'aych syamnub'loc.

²⁷ A eb' yin̈tl Coat, chan̈ macn̈ yaj eb', atn eb' yic Amram, eb' yic Izhar, eb' yic Hebrón yet' eb' yic Uziel.

²⁸ A sb'isl eb' winc 'a smasnil, x'el yich 'a eb' jun 'ujl sq'uinal yet' 'a yojltac, 'ay 8,600 eb', a eb' tz'iln scajnub' Dios.

²⁹ Ata 'ay smantiado eb' 'a schicn scajnub' Dios 'a stojlal sur.

³⁰ A mach yajl yaj 'a jun tzo'n̈ eb' tic, atn Elizafán yunnal Uziel.

³¹ A eb' tic tz'iln te scaxail trato, te mexa, yet'l cantil, chab' yet'l xajmb'al, smasnil yamc'ab' tzc'anx 'a yol scajnub' Dios, yet' pax te cortina 'aych 'a yojol.

³² A mach sat yajl yaj 'a scal eb' levita, atn Eleazar yunnal Aarón, atn win ya'mal 'och sti eb' 'a Dios, a tz'iln smasnil eb' tzmunlj 'och 'a scajnub' Dios cha.

³³ A eb' yin̈tl Merari, atn eb' yic Mahli, yet' eb' yic Musi.

³⁴ Ax sb'isl eb' winc 'a smasnil, x'el yich 'a eb' jun 'ujl sq'uinal yet' 'a yojltac, 'ay 6,200 eb'.

³⁵ A mach yajl yaj 'a eb', atn Zuriel yunnal Abihail, ata 'ay smantiado eb' 'a junx schicn scajnub' Dios 'a stojlal norte.

³⁶ A eb' tic 'aych yilmalc te 'a'nte yic scajnub' Dios, scan̈nub'al, yoyal, sb'achnub'al yalan̈ yet' smasnil syamc'ab'il,

³⁷ yet' pax te yoyl oyn 'och 'a sti yamq'uil, sb'achnub'al yaln̈ eb' te', yistacail yet' pax smasnil sch'an̈il.

³⁸ Ax 'a stojlal 'aj tzq'uel c'u 'a yojltac scajnub' Dios, 'a yojltac Mantiado 'aj tzchaj sb'a eb' 'anma yet'oc, ata 'ay smantiado Moisés yet' Aarón, yet' pax eb' yunnal Aarón cha, atn eb' tz'a'w servil 'a yojl scajnub' Dios sjelc eb' yit israelal. Toto 'ay mach tzcomn 'och 'a jun 'opiso cha, to man̈ yopisooc yaji, yowlal tzchami.

³⁹ A yic xyi'n q'ue wan Moisés yet' Aarón sb'isl eb' levita cha, a tzyal smacquixtacl yaj yin̈tl eb'. 'Icha wal xyutj Jehová yalni, 'ixta x'aji, x'el yich 'a eb' jun 'ujl sq'uinal yet' 'a yojltac, 'ay 22,000 eb' 'a smasnil.

A tas tz'och sjelc eb' b'ab'l 'unin

⁴⁰ 'Ix yaln Jehová 'ixtc 'a Moisés: 'Ij q'ue wan sb'isl eb' sb'ab'l 'unnal eb' et israelal, tz'el yich 'a eb' jun 'ujl sq'uinal yet' 'a yojltac, yet' sb'i junjn eb'.

⁴¹ A eb' levita tic, wic tz'aj eb' yuj sjelc sb'ab'l 'unnal eb' et israelal cha. 'Ixta pax yuj sb'ab'l 'une no scajb'en noc' eb', wic tz'ajcn scajb'en noc' eb' levita yuj sjelc no eyic cha. An Jehová in, an tzwala, xchi Dios 'a Moisés.

⁴² Yuj cha, xyi'n q'ue wan Moisés sb'isl smasnil eb' sb'ab'l 'unnal eb' israel 'icha wal xyutj Jehová yalni.

⁴³ Smasnil eb' b'ab'l winc 'unn jun 'ujl sq'uinal yet' 'a yojltac, 'ay 22,273 sb'isl eb'.

⁴⁴ 'Ix yaln pax Jehová 'ixtc 'a Moisés:

⁴⁵ An Jehová in, an tzwala: 'A'cn 'och eb' levita sjelc eb' b'ab'l 'unn 'a scal eb' chon̈b' israel. 'Ixta pax no scajb'en noc' eb' levita, a no tz'ochcn sjelc no scajb'en noc' eb' israel, yujto a eb' levita tic, wic yaj eb'.

⁴⁶ Palta yel xo wal niwn sb'isl eb' sb'ab'l 'unnal eb' israel tic 'a yib'n̈ eb' levita. 'Ay 273 eb' b'ab'l 'unn tzyac' sobra.

⁴⁷ A yuj eb' tzyac' sobra cha, tza c'an o'e'oc q'uen tumn plata yuj junjn eb', a tzyal yal-l q'uen tzc'anlb'ax 'a in cajnub', atn q'uen 11 gramos yalil.

⁴⁸ Tzlajw cha, tza'n q'uen 'a Aarón yet' 'a eb' yunnal, a q'uen tz'och sjelc eb' b'ab'l 'unn tzyac' sobra cha, xchi Dios.

⁴⁹ 'Ixta xyutj Moisés syamb'tzan q'uen tumn x'och sjelc eb' b'ab'l 'unn xyac' sobra 'a scal eb' israel cha.

⁵⁰ A q'uen tumn syamb'tzej Moisés cha, 'ay 1,365 q'uen tumn plata, 'icha yal-l q'uen tzc'anlb'ax 'a scajnub' Dios.

⁵¹ Xlajw cha, xya'n Moisés q'uen 'a Aarón yet' 'a eb' yunnal, 'icha wal xyutj Jehová yalni.